عايز رأيكم فى عربية جولف 4
السلام عليكم و رحمة الله و بركاتة
اولا: احب اشكر اعضاء المنتدى على الافادة العامة فى كل المجالات.
ثانيا: كنت عايز رأيكم انا نويت ان شاء الله اشترى عربية جولف 4 بعد ما قريت كتير فى المنتدى هنا عنها و مقارنات كتير بين عربيات كنت محتار بينها بس الحمد لله خلاص استقريت على جولف 4 و بدور على واحدة تكون نضيفة و ربنا يكرم ان شاء الله.
عايز اخد رأيكم فى عربية شوفتها امبارح جولف 4 موديل 99 هى فابريكة دواخل بالكامل و ما شاء الله موتور 1400 كأنة زيرو و الحوض و الشنطة و القوايم كلها زيرو و من برة رشة رفرف خلفى و اكصدام امامى بس لون العربية كلها مكلح من الشمس و عايزة تترش و كمان هى بتاعت بنت فمكحوتة كدة من حتت كتير و وخدة خبطة فى العتب من رصيف محتاجة تترد المهم العربية كلها عايزة سمكرو و رش و الفنوسين الاماميين قواعدهم مكسورة و ملحومة و عايزيين يتغيروا و كذلك الشبكة الى فى الاكصدام الامامى و البربريز كمان عايز يتغيير علشان مكسور نيجى بأة جوة العربية فرشها ما شاء الله نظيف جدآ و لكن بعض البلاستيكات مكسورة مثل الكونصول الى فية فرامل اليد و البلاستيكة بتاعت المرايات الكهربا و البلاستيكة الى بتفتح الكبوت يعنى شوية اكسسوارات كدة بسيطة لكن التابلوة نضيف جدآ اة و كمان حاجة فرش السقف متغير او متصلح قالتلى انها كانت بتنضف فى بنزينة و وقع و عملتوا عند سروجى المهم العربية عامله 115 الف كيلو و محتاجة تغيير السيور و السرفيس كلوا و كمان التكييف مش بيبرد حلو اوى يعنى متوسط يمكن محتاج فريون و العفشة كويسة جدآ
انا كدة قولت حالة العربية هى بقى عايزة 65 الف و مش هتنزل جنية هى بتاعتها من الزيرو انا عايز اعرف رأيكم هى كدة تستاهل اجبها و لا استنى اشوف حاجة تانية و شكرآ جزيلآ