التقرير الثانى المصور لسيارتى النترا 2012 (مواصفات اوروبى بالسعودية بعد قطع 11000 كم)
السلام عليكم اعضاء المنتدى وقسم هيونداى الكرام
حابب اشارككم تجربتى مع الالنترا بعد مرور 11 شهر منذ تملكها وقاطعه دلوقتى 11000 كم فقط (استخدامى قليل حبتين )
كنت عملت ضيانة ال 5 الاف كم قبل كده عند ممشى 1600 كم بالضبط و قيدتها فى الشركة 5 الاف لانى بحط زيت كاسترول ماجنتك بيقعد لحد 10 الاف
وكانت تكلفة الصيانة 205 ريال والزيت اشتريته من برا ب 90 ريال لان اللى فى الوكالة كاسترول gtx فقط
المهم روحت اول شهر 9 عملت صيانة ال 10 الاف وكلفتنى 265 ريال (زودوها مش عارف ليه مع العلم ان ال 5 وال 10 بنفس السعر) والمرة دى اشتريت شل هيلكس الترا وبصراحة انصح كل الالنتراوية باستخدامه لانه افضل وتخليقى بالكامل وصوت العربية حسيته اقوى (يمكن من وحى الاعلان افتكرتها فيرارى ):C_laugh[1]:
المهم كلفنى 105 ريال (اغلى شوية) وطبعا فى الصيانتين تكملة مياه الرادياتير وفحص العفشة وتنظيف فلتر الهواء والمكيف وحتى ظبط الكفرات معبيها نيتروجين ف ما يحتاج
نيجى بقه للاكسسوارات لانى لا استطيع انى اشوف أميرتى بدون ما ادلعها شوية واحط التاتش بتاعى
1- اول حاجة عملتها كانت انى اشيل العازل الحرارى الفاشل بتاع الوكالة النانو اللى لما الحر هجم فى ابريل اللى فات حسيته ملوش لازمة وروحت على 3Mعلى طول لانهم الافضل جوده مع سعر ممتاز وركبت كامل السيارة عازل حرارى كريستالين 70 % شفافية (عشان لو نزلتها مصر ميقولوش فيميه والهبل ده) وهو اعلى فيلم فى العزل والحماية وكنت مجربه قبل كده فى البرادو وكان سعره 2600 ريال وبعد المكاسرة خدته ب 2000 ريال (مش عارف سعره فى مصر ايه) لكن بصراحة يستاهل كل هلله لان العائد اللى من وراه وقعدتك كانك فى تلاجة ومكيفك بيشتغل مرتاح ويبطل ويفصل براحته ده غير عدم وجود اللسعة وكمان ربنا ما يوريكم حر جدة عامل ازاى 11 شهر فى السنة صيف
2-عملت كمان حماية للمرايات الجانبية وربع الكبوت والرفرفين والقايمين بلصق شفاف عشان مقاومة الهواء وكمان لو حبيت اسافر (كنت عامل قبل كده حماية للفوانيس والكشافات )
3-ركبت بورى (كلاكس) للعربية بدل الخايس اللى جاى معاها بدون تقطيع فى اسلاك كله فيش ماركة بوش صوته زى اللكزس هنا او الاكورد
4-ركبت زينون امامى فى الواطى بس مع محولات و اعتقد كتاوت او مكثفات فى الوكالة بردو بدون تقطيع بالضفيرة
5-تغيير لمبات الصالون بالكامل والشنطة مع لمبات الشماسات بلمبات ليد ابيض تلجى وكمان تغيير لمبات النواعس (اللمبتين الصغيرتين اللى بيولعوا مع اول تكة فى ذراع النور فى الكشافات الامامية)بلمبات لكزس ابيض تلجى وطبعا نفس المقاس والوات مجرد لون بدل الاصفر الكئيب ده
انطباعى عن العربية:
طبعا العربية مازلت بقول الافضل فى فئتها ويمكن تنزل للمرتبة التانية بعد الفلوينس(رايي الشخصى) لان المشكلة اللى مضيقانى فيها غير انى حابب الكروس اوفر اكتر هى التعليق الخلفى اللى بتحس ان الخلفية العربية بتلعب فى فواصل الكوبرى لو على سرعة عالية وكمان نشفان العفشة فقط
اما سحب وموتور وفتيس و رحابة داخلية ممتازة وحتى متعة السواقة وتاتش فخامة موجود للاستعمال اليومى
ملاحظات:
الملاحظة الوحيدة هى ان باب السائق بدأت اسمع صوت تكة منه كده فى المطبات يبدو محتاج وزن او تربيط والصوت جاى من مكان قفله مع الحلقة المعدنية لكن بقية الابواب كويسه مفيش اصوات
وده فيديو لعربيتى(3اكتوبر 2013) بدل ما اعمل upload ل 100 صورة كلهم هنا وبصراحة مش انا اللى عامله دى الشركة اللى عارض عربيتى للبيع عندهم
واكيد هتقولوا طب بتبيعها ليه لانى قررت اشترى فى مصر إن شاء الله كروس اوفر اما x1 او قاشقاى الشكل الجديد او ix35 او سبورتاج فقط البلد دى مينفعهاش غير كده
وفى السعودية اشتريت عربية تانية خلاص
ولو مبعتهاش بسعر حلو هنا هنزلها مصر وابيعها افضل لانهم هنا يبخسون السلعة والعربيات تمنها بيبقى النص بعد 3 او 4 سنين
وشكرا ليكم
HYUNDAI Elantra 2012 Avante MD 11xxx km full options - YouTube
