القيادة العدائية Aggressive Driving

**Casio2000** · 10-09-2008 09:21 PM

السلام عليكم

من حوالي اسبوعين شوفت برنامج مش فاكر على انهي قناة - فتحت في نص البرنامج لقيت زي تصوير كدا لطريق سريع High Way و واضح انه في بلد غربي.

التصوير من طيارة هليكوبتر

الحارات مرسومة رسم و العربيات كأن الحارات دي لو الكاوتش لمسها حتفرقع (يعني العربيات ماسكة في نص حارتها بالمسطرة)

كل دا مش مهم

نديت على ابويا يتفرج على السواقة برة

بعدين بنتفرج لقينا زي دايرة كدا اترسمت على شاحنة ضخمة

( انا كل دا موطي الصوت و مش سامع التعليق)

الكادر نقل من الطيارة و نزلنا للارض.....عربية شرطة و الشاحنة راكنة على جنب

(عليت الصوت عشان افهم ماله دا - مسكوه ليه)

الشرطي بيفهم المذيع ان الشاحنة كانت كابسة على العربية اللي قدامها بشكل يمثل Aggressive Driving و راح مظبطه غرامة

الشاحنة يا حرام كبست على العربية اللي قدامها بشكل اجريسف = مخالفة

الزبون اللي بعده

نفس الحوار اللي فات بس ملاكي المره دي

حضرته اتنقل بين الحارات المرورية عدد من المرات اكتر من اللازم و بالتالي الشرطي اعتبره بيسوق بطريقة ايييه؟ ايون Aggressive
الترجمة = يعني خد غرزتين تلاتة يمين في شمال

الشرطي بقى بعديها بيفهمنا ان القيادة الخطيرة المرعبة اللي احنا شوفناها دي بدأت تنتشر و انهم بيحاربوها بمنتهى القوة

الملاحظات:
1- الناس دي اتمسكت من الدوريات اللي واخدة الطرق رايح جاي عشان تتابع المرور و تضبط المخالفات دي (مش كمين ثابت معروف مكانه مجهول هدفه خلاف كربسة الطريق قبله 5 كيلو)

2- الشرطي انا حسيت و هو بيوقف الناس دي انهم موتولوا حد من عياله - الراجل بيتكلم زينا كدا - "شوفوا الجنان يا جماعة" "مش ممكن اللي الراجل دا بيعمله" حاجات زي كدا و مع ذلك منتهى الاحترام في التعامل مع القائد المخالف - مع لوم متصل على مدى خطورة اللي عمله دا

3- اهم من دا كله

هي فين بقى ال اجريسف درايفينج دي ؟؟ الكام غرزة و البيه اللي لازق في العربية اللي قدامه عشان توسعله ؟

هي دي ؟

امال اللي بيحصل عندنا دا اسمه ايه ؟ - طب هل يعتبر اي نوع من انوا الدرايفنج اصلا ؟

**CryptonX** · 10-09-2008 09:28 PM

لأ الي عندنا ده :

Psychotic Driving
XD

وده علاجه مش حبس و لا غرامات - ده علاجه تربية و مجتمع و مدرسة .

يعني ثورة بمعنى اخر .

**1.8Tee** · 10-09-2008 10:02 PM

المشاركة الأصلية كتبت بواسطة Casio2000

الشرطي بيفهم المذيع ان الشاحنة كانت كابسة على العربية اللي قدامها بشكل يمثل Aggressive Driving و راح مظبطه غرامة

الشاحنة يا حرام كبست على العربية اللي قدامها بشكل اجريسف = مخالفة

اعتقد tailgating وصف ادق.

بتحصل معايا علطول....

**MEDO80** · 10-09-2008 10:06 PM

joking driving

**MedaSam** · 10-09-2008 10:51 PM

المشاركة الأصلية كتبت بواسطة CryptonX

لأ الي عندنا ده :

Psychotic Driving
XD

وده علاجه مش حبس و لا غرامات - ده علاجه تربية و مجتمع و مدرسة .

يعني ثورة بمعنى اخر .

بالظبط كده........حضرتك جبت من الأخر........ اللي عندنا ده جناااااااااان
السواقين عندنا محتاجيين علاج نفسي

**bemocarlo** · 11-09-2008 04:39 AM

الحاجات دي في اوربا مفيهاش رحمه.الشارع اللي انا ساكن فيه بتقاطع مع ال main road في اشاره.وانا خارج رايح ال shop اشتري حاجه ولازم اعدي الناحيه الثانيه
من الطريق.استنيت لما الاشاره تغير من ال green ل red علشان اعدي وهي لسه
علي اللون amber (الاصفر)ولد شاب شكله كان مستعجل راح كابس قبل ما تنور احمر.وحظ اهله زي الزفت عربيه ال garda كانت وراه وطبعا وقفته والبنت بتاعه الgarda اديته المخالفه اللي هيه.
bemo,ire

**hazem_khidr** · 11-09-2008 05:51 AM

في الامارات برضه
لو شاف حد بياخد غرزه او عمال يتنقل بين الحارات
كانت عربيه الشرطه توقفه و ياخد مخالفه اسمها
قياده خطر تؤدي الي هلاك الارواح باين او حاجه زي كده

**OlaOsman** · 13-09-2008 02:44 PM

يعني في أوروبا متحضرين.. و في الخليج بيحافظوا على حياة المواطن عشان غالية.. طيب و احنا.. فين احنا من ده كله؟؟

**MoToRiZeR** · 13-09-2008 03:10 PM

احنا عندنا suicidal driving
يحكمها عدة أعراف و قوانين غير مكتوبة و لكن معروفة للجميع و أشهرها
1- اللي خايف يوسع
2- ضربوا الأعور علي عينه
3- ليه توصل بيتك مبسوط لو ممكن ننكد علي أهلك ؟