مش عارف اخد قرار ...ماتفكروا معايا......
السلام عليكم ورحمه الله وبركاته
زيكوا يا جماعه عاملين ايه
انا محتار فى امر كده وبصراحه مافيش حد عارف يقيدنى فيه وانا كمان مش عارف استقر على قرار
دلوقتى انا لسه مش متجوز وعايش فى الحدائق
والدى كان شارى ليا شقه من زماااااااااان فى الشروق
ودلوقتى انا لسه شغال جديد فى شركه فى القريه الذكيه
لسه فى فتره التدريب اول 3 شهور بعدها هيبقى العقد سنوى (انا مش عارف اصلا كل القطاع الخاص العقد سنوى ولا فيه اكتر )
طبعا انا كل يوم اروح المشوار دا كله فى 3 ساعات او يوم ما اروح بدرى اروح فى 2.5 ساعه
وطبعا علشان اقعد فى الشروق مرمطه وكمان مافيش عربيه للشغل للشروق فطبعا هضطر انى اتحمل مصاريف العربيه اللى اصلا لسه ماجبتهاش علما بان م عربيه الشغل 100ج فقط
ياعنى لو هقعد فى الشروق هضطر انى انزل بعربيتى لاقرب نقطه من عربيه الشغل يبقى هتحمل مصاريف العربيتين غير الوقت والمجهود
دلوقتى انا مش عارف ادور على شقه فى اكتوبر او الشيخ زايد تبقى قريبه من الشغل طبعا انا مش ضامن انى افضل طول عمرى فى الشركه دى ولو لاقدر الله وسيبتها الشيخ زايد بالنسبه لاى مكان تانى فى وسط البلد سفر علشان الزحمه
ولا افضل فى الشروق واستحمل القرف بتاع كل يوم
مع العلم انى علشان ابيع فى الشروق واخد فى الشيخ زايد هزود على تمن الشقه مالا يقل عن 35000 دا غير التشطيب ياعنى بند العربيه هيتلغى من الاخر
انما لو قعدت فى الشروق هظبط الشقه وكمان هقدر اجيب العربيه اللى طبعا اى شاب بيحلم بيها
انا بقى مش عارف اخد قرار خاااالص فى الموضوع دا فكروا معايا يا جماعه
طبعا مع الوضع فى الاعتبار ان الموضوع دا مش هيتم الا بعد لما اعدى من فتره الاختبار الاول بس باردوا انا بحب بحسب للحاجه كويس قبل ما خد اى خطوه علشان ابقى ملم بالموضوع وابقى عارف انا بعمل ايه
اسف جدا على الاطاله
وشكرا