الموضوع: تغيير شنابر و جوان وش سلندر فى الفيرنا

السلام عليكم
انا معايا فيرنا فيفا 2006 1500 180000 كم - اول عربية من 10 شهور
المهم حاشرح تجربتى (اول مشكلة كبيرة فى العربية) للاستفادة و لو حد عنده نصائح يا ريت
انا باسافر بيها مصر من اسكندرية بمعدل مرتين فى الشهر
المهم كنت جى من مصر لاسكندرية و قارص شويتين 120 - 140 , و جيت قبل من عند النوبارية اسكندرية شديت جامد 160

المهم العربية فجاة عند ستانلى الحرارة عند ال هاى - و بطلت - ركنت على جنب و هديت كده و بصيت عالزيت و المية , ناقصين بغباء
زودت بتاع كيلو زيت من البنزينة و مية بعد ماسبتها تهدا و دورت لغاية ماروحت و قبل البيت - بطلت - و اتعافيت مع المارش شوية فالبطارية نامت
المهم قطرتها للميكانيكى
جوان وش سليندر - و شنابر و ردوية صباب و حغير بوجيهات
جينا نقفل - لقيت مدخل البنزين من عند الموتور من فوق بيخر قلت عادى بتحصل
قالى يا اما تغير الخرطوم من التوكيل ياما حالحمهولك بمادتين (معرفش ايه هما) قلت نجرب و نشوف

اسئلتى بقى
1) حد عنده نصايح قبل ماطلع بالعربية تانى ( حاسس انى خايف اركبها لتفجر بيا و لا خاحة )
2) البطارية اللى نامت ده و شحنها مشكلة - اروح اكشف عند بتاع بطاريات يعنى
3) خرطوم البنزين ده - نجرب اللحام و نشوف على ماتفرج و نغيره و لا ايه
4) خد عنده ملاحظات اخلى بالى من ايه فى العربية ده فى فترة النقاهة
و السؤال الاخير (لسة فى امل يا دكتور) و لا خلاص بقت المرحومة
و الف شكر مقدما

نسيت اقول ان سبب اللى حصل ( و الله اعلم) ان ثرومستات الكوعة قفش قفل على دورة التبريد فجزء ضعيف من طرمبة المياة ضرب فبقت تنطر المياة و حصلت المشكلة