هزة الموتور من ناحية فلتر الهوا ـ كورولا 2010
السلام عليكم،
أنا لسه عامل صيانة الـ 80 في توكيل أبو رواش عربية كورولا 2010، وأنا باستلم العربية فتحت الكبوت والموتور داير، ولقيت في هزة في الموتور خاصة من ناحية فلتر الهوا، وحطيت ايدي على الجزء ده اللي بيدخل الهوا للموتور حسيت إنه مفكوك شوية loose. ندهت على المهندس وعلى مسئول كان واقف (شكله مدير الصيانة أو حاجة زي كده) وواحد من قسم الصيانة (لابس تي شيرت أحمر) وكلهم أجمعوا إن ده طبيعي، وإن الناحية بتاعة فلتر الهوا "هي كدة" ومتبقاش متثبتة، والفني خد العربية مني ودخل جوا الصيانة وطلع بعد 5 دقايق وقال لي "يا باشا مفيش حاجة، العربية زي الفل".
خليت واحد صحبي قعد جوا يزود بنزين وأنا واقف قدام العربية، لاحظت إنه لما بيزود بنزين ويعلي الـ أر بي إم الموتور بيثبت والهزة بتروح!
قعدت بنفسي جوا العربية مكان السواق محسيتش بهزة من جوا،
المهم، أصريت إني أشوف عربية تانية دايرة والكبوت مفتوح، بس لقيتهم مشغولين في عربية تانية جنبي موديل 2011 فاتحين الكبوت والعربية مش راضية تدور أصلاً، فاضطريت إني استلم العربية وأروح عشان كنت متأخر.
المشكلة إني عندي وسوسة في الحتة دي وعايز أرجعلهم تاني لأني العربية مش معايا بقالها كتير ومش قادر افتكر هو ده الطبيعي ولا بيتهيألي، وللعلم وأنا قاعد جوا العربية مبحسش بهزة الموتور غير لما أدور العربية وهي باردة بحس برعشة الموتور لمدة ثواني لغاية ما الأر بي إم يوطى والعربية تسخن وبعد كده طبيعي.
عايز أسأل هل من الطبيعي في العربيات دي (كورولا 2010) إن الموتور يرتعش لما تفتح الكبوت وتبوص عليه، خصوصًا من ناحية فلتر الهوا؟ وهل من الطبيعي إن ناحية فلتر الهواء تبقى سايبة مش متثبتة يعني تحركها بإيدك بسهولة؟
