اريد شقة في زهراء المعادي - الهضبة الوسطى - المقطم - الزيتون - المطرية

**dr.link** · 08-10-2013 04:55 PM

اي شخص هنا يعرف المناطق المكتوبة بالعنوان

بسعر متر 1000 - 2000 كحد اقصى

او اي مناطق اخرى

ومش عايز ابعد اكتر من كده

شكراً

**Eng_hatemfathy** · 08-10-2013 05:08 PM

الرقم ده بره الزهراء والهضبة الوسطى والمقطم >واكيد مش قصدك الزلزال والسبعين فدان <وبالنسبة للزيتون الراقى مش موجود (يعنى مفيش فى سليم وترعة الجبل ونصوح والعزيز بالله وطومنباى ) لكن ممكن فى الفرعى لجوه شوية ناحية الزيتون الغربية ووابور المياه وكده
اما المطرية فلا اعرف عن اسعارها شىء لكن ممكن تلاقى انا شفت حاجات فى عين شمس فى رينج ال 2000 فعلا
وربنا ييسرلك امرك

**أبو ياسين** · 08-10-2013 05:39 PM

الهضبة الوسطى هتلاقى فيها من 1800 الى 2000 ج المتر
كان فى شقة 120 متر الدور الرابع غرفتين تصفى حوالى 90 متر فى الحى الثانى ممكن ادورك على صاحب العمارة تكلمة

**friendship7897** · 08-10-2013 05:50 PM

سبحان الله
فعلاً مبلغ 100 ألف مش صغير وفي نفس الوقت مش حاجة
للأسف مش هيجيب شقة في منطقة كويسة
الشباب دول غلابة - ربنا معاهم
أنا كان معايا المبلغ دا
أشتريت شقة في منطقة سكنية مش كويسة أوي
أجرتها
ودفعت فرق وأجرت في منطقة كويسة شوية وجنب مدرسة أبني
ممكن تعمل كدة مؤقتاً علشان متخصرش الفلوس اللي معاك وعلى ما تزود عليهم شوية
وسوق العقارات بيزيد كل يوم

**wawamoha** · 08-10-2013 07:19 PM

الاستاذ :friendship7897
هو ده التصرف المظبوط انا عملت كده برضه في 6 اكتوبر بدل ما اقعد استنى و قيمه الفلوس بتنقص كل ثانيه مش دقيقه

شكرا

**i_Am_Legend** · 08-10-2013 07:25 PM

الشقق اسعارها ناااااااار الشقق عندنا فى شبرا ولعتتتتتتتت الشقة ال50 متر في شبرا ب250 الف .. :d

**dr.link** · 08-10-2013 07:53 PM

يعنى مش حرام على الدولة كده سايبنا مع لصوص اصحاب العقارات وكل الدنيا ولعة

انا سألت خالي اللي عاصر جمال عبد الناصر والسادات

قالي العيشة كانت حلوة ومافيش حاجة بتغلى نهائي !

حتى لما رئيس الوزراء بتاع السادات لما غلى ! الرئيس في ذات الوقت سمع الكلام ورجع كل حاجة

اسمع ان اقل اسعار في المدن الجديدة هى العبور !

بس واحشتها لما شوفتها عن طريق خرايط الموبايل ! مالهاش مدخل الا عن طريق اسماعيلية الصحراوي ودي في اول الطريق بعد موقف عاشر السلام والحتة زحمة جداً

وفي اعتقادي ! ان الشيخ زايد و 6 اكتوبر في المناطق الشعبية

خاصة الحي 16 بتاع الشيخ زايد الشعبى ممكن فيه آمل

بس انا قيست الطريق من ميدان لبنان حتى مول العرب (عن طريق خرايط الموبايل النوكيا)

لقتها حوالى 22 كيلو !

حط بقى عدد الكيلوات من شبرا حتى توصل مول العرب ممكن يصل الى اكثر من 30 كيلو ولسه انت ما دخلتش 6 اكتوبر

والله العظيم حرام على الدولة !

حتى لو الشخص معاه حوالي نص مليون جنيه ! دووول يعملوا احلى مشروع ! (اوعى اي حد يقولى هنا ان النص مليون ما يعملوش مشروع ونبلهم ونشرب ميتهم كمان)

ننتظر الردود والتعقيب

**Eng_hatemfathy** · 08-10-2013 09:11 PM

الشروق المتر فيها ب 1800 جنيه وليها مدخل من طريق السويس ومدخل من طريق الاسماعيليه
اللى يحدد هو مكان شغلك علشان متتبهدلش وتدفع مواصلات او بنزين بزياده
الحى الثامن بالهضبة الوسكى رخبص اه بس اقل شفة بتعمل 230 الف جنيه وبيقولوا عليها 120 متر وهيا متكملش 80 متر