الموضوع: الحياة قبل الأنترنت

والله كانت ايام حلوة. بالذات ايام الشتا والناس تتجمع حولين الدفاية وتتفرج علي مسلسل ولا فيلم فالقناة التانية.

والله كانت احلي ايام
كان في دفئ واهتمام وتربية سليمة
مش انشقاق وعزلة لكل افراد الاسرة الوحدة

ياريت ترجع الايام دى
لا نت ولا موبايل ولا دش
النت اثر على صحتنا وخلى السمنة ماركة مسجلة
والموبايل علمنا الكسل والرغى الفاضى
والدش علمنا اللؤم والرقص والجدل

كل حاجة من دول لها مميزات وعيوب
بس الاستهلاك المفرط للشئ (اى شئ) بيحوله لجحيم
رحم الله تلك الايام الخوالى
ايام بوابة الحلوانى وبرنامج العلم والايمان وتاكسى السهرة
ولا المصارعة يوم الجمعة عالقناة التانية يااااااه :)
ايام اللى كان عنده مباشر فى التليفون كان من علية القوم ..

حتة فلسفة كده..... الموضوع فى جوهره بيعبر عن حاجة اسمها The Technology paradox يعنى معضلة اوجدتها التكنولوجيا الحديثة اللى المفروض اختراعاتها معمولة عشان تخلى حياة البنى ادم افضل و توفر فى وقته..... لكنها اوجدت معاها اثار جانبية تتمثل فى معضلة التكنولوجيا دى..... الفكرة فى المعضلة دى انه كل ما يزداد استخدامنا للتكنولوجيا كل ما وقتنا اللى بنقضيه مع انفسنا او من حولنا بيقل و يبقى مخصص اكتر لاستخدام التكنولوجيا اللى كمان بتزيد من عزلتنا عمن حولنا..... و بص كده لاى تجمع بشرى فى اى مناسبة او حتى عزومة عند حد..... هتلاقى نسبة كبيرة من اللى قاعدين بتلعب فى موبايلانها او تعمل مكالمات او تلعب العاب..... كأن كل واحد عايش فى العالم الافتراضى بتاعه و مكتفى بيه و مش عايز يخرج منه و يتواصل مع من حوله

طيب حل ده ايه؟ الحل هو اعادة التوازن و الرجوع الى عادات قديمة بيبقى فيها quality time زى القراءة مثلا لمن يحبها او بالنسبة للاجتماعيين العودة الى التواصل المباشر مع الناس بدلا من الاعتماد على اشياء مثل الفيس بوك اللى حل محل ذلك