مين سافر على طريق القاهرة شرم الشيخ من وقت قريب؟

يا ريت لو حد سافر على طريق القاهرة شرم شرم الشيخ قريب يجاوبنى على الأسئلة التالية علشان أنا هسافر فى أجازة العيد وأول مرة أسوق عليه:

- المسافة كلها تقريباً كام كم؟
- هل هناك لوحات إرشادية بشكل كافى على الطريق ولا ممكن لو حد أول مرة يسافر عليه يتوه؟
- إيه الأماكن الخطرة اللى المفروض الواحد يخلى باله منها، سواء منحنيات أو إصلاحات؟
- إيه هى العلامات المميزة اللى هشوفها على الطريق تؤكد إنى ماشى صح وأماكنها؟
- هل هناك أى نصائح مهمة حول الطريق والسفر عليه؟
- هل على الطريق هلاقى كل شوية لافتة بتقول فاضل على شرم كام كيلو، ولا هتكون الافتات عن المدينة التالية على الطريق فقط؟

اقتباس:

---

المشاركة الأصلية كتبت بواسطة mostafaomran

يا ريت لو حد سافر على طريق القاهرة شرم شرم الشيخ قريب يجاوبنى على الأسئلة التالية علشان أنا هسافر فى أجازة العيد وأول مرة أسوق عليه:

- المسافة كلها تقريباً كام كم؟
- هل هناك لوحات إرشادية بشكل كافى على الطريق ولا ممكن لو حد أول مرة يسافر عليه يتوه؟
- إيه الأماكن الخطرة اللى المفروض الواحد يخلى باله منها، سواء منحنيات أو إصلاحات؟
- إيه هى العلامات المميزة اللى هشوفها على الطريق تؤكد إنى ماشى صح وأماكنها؟
- هل هناك أى نصائح مهمة حول الطريق والسفر عليه؟
- هل على الطريق هلاقى كل شوية لافتة بتقول فاضل على شرم كام كيلو، ولا هتكون الافتات عن المدينة التالية على الطريق فقط؟

---

المسافة من أول ما تمسك طريق السويس 470كم
هتلاقى لوحات ارشادية بس مش كتير, عموما الطريق سهل و مش هتلاقى تقاطعات تحيرك
مفيش قلق من قطاع طرق أو سرقة عربيات من بعد النفق
المناطق الخطر فى السواقة(ملفات أبو زنيمة-أخر 20كم قبل بوابات شرم الشيخ فيها ملفات خطيرة- الحتة بتاعة راس سدر لأن بتلاقى عربيات كتير من العرب بتقطع الطريق بدون انتباه علشان تعدى للناحية التانية و عموما وصلة راس سدر بكرهها فى الطريق)
خلى عربيتك مفولة بنزين علطول, كل لما تلاقى محطة مون و أعمل حسابك و أنت هناك فى شرم عربيتك تكون مفولة علطول لرحلة العودة, أزمات البنزين هنا بتظهر فى ألأعياد
متخليش الطريق يخدعك و تجرى مهما كان االطريق مفتوح و مستقيم, خليك على مهلك
جوة شرم نقسها بلاش جرى, ممكن بتلاقى الطريق زى الفل و فجأه تلاقى صينية فى وشك, ناس كتير بيغرها الطرق الواسعة و الفاضية و بتجرى
و ربنا يستر طريقك

شكراً على سرعة ردك،
وإيه أخبار الإستراحات على الطريق وهل فيه حاجة فيهم قريبة من منتصف الطريق؟ أو إستراحتين يقسموه ثلاث مسافات متساوية تقريباً؟
خصوصاً علشان دخول الحمام مهم بالنسبة للأطفال، يعنى لو مسجد مثلاً ممكن يأدى الغرض

بص يا باشا انا روحت شارم سواقة من الحلمية و انت تقريبا جمبى فى الحدائق.بس الكلام ده كان تقريبا من سنتين.تقريبا بعد ثورة 25 يناير بكام شهر وبرضوا كان ايامها فى قلق فى البلد بس الطريق كان جميل و تمام.

بص يا سيدى مبدائيا كده لازم تكون العربية تستحمل السفر كويس لأن المسافة من اول كوبرى الدائرى مع اول طريق السويس عند فندق الماريوت تقريبا 450 ك و حتلاقى اليافطة مكتوبة السويس 100ك و شرم الشيخ 450ك.و الخدمات على الطريق ضعيفة جدا تقريبا صحرا صحرا.

حتاخد طريق السويس واول ما توصل البوابة بتاعت الكارتة بتاعت السويس قبل السويس تقريبا ب 10 كيلو حتعدى البوابة وتاخد اول يو تيرن و ترجع تانى و تخوش يمين وصلة بتوديك على نفيق الشهيد احمد حمدى و الوصلة ديه حوالى 15 كيلو طريق دائرى كدة معمول جديد عشان متدخلش السويس و الكعبلة.المهم انت عند الكارتة اسألهم و هما حيشاورولك على الالدخلة بتاعت الطريق ده بس هى ذى منا وصفتهالك.

حتوصل النفق و حتلاقى بنزينة و طنية بتاعت الجيش مون منها وده اهم حاجة لازم عربيتك تبقا دايما متفولة كل بنزينة خش مون لأن فى حتت بتوصل ل 150 كيلو مافيهاش محطاط.حتعدى التفتيش و بعدين النفق و بعدين تمشى شوية فى طريق طوالى كده لحد ما حتلاقى تقاطع يمين و شمال و قدام .و حتلاقى اليافطة بتقول يمين شرم الشيخ و الطور و شمال الى العريش.

حتاخد الطريق اليمين ده و ده تقريبا طريق فردى لحد شرم الا ما رحم ربى.

اول استراحة على ما افتكر كانت ابو زنيمة و ديه بعد 150 كيلو تقريبا من النفق و فيه اخطر حتة فى الطريق الملفات ال فى الجبل ال قبل ابو رديس او ابو زنيمة مش فاكر بس ملفات صعبة اووى وما بتشوفش ال جى قدامك ال على بعد 30 متر و الطريق فردة و حدة خلى بالك.والعرب هناك الله يكرمهم بيسوقوا النص نقل كأنه سايق حمار ولا كانك هنا.فخلى بالك.

و بعدين حتوصل مدينة الطور و ديه فيه المحافظة بتاعت جنوب سينا و ديه تقريبا قبل شارم ب 100 كيلو.وديه احسن وصلة فى الطريق كله حتجيب 200 عليها اسفلت لونه احمر اليهود الله يحرقهم عليهم حبة اسفلت ولا ممر الطيرات.

حتوصل قبل شارم فى منحنيات خطر برضوا و منازل فخلى بالك ديه برضوا الحتة الخطر فى الطريق قبل شارم ببتاع 20 كيلو كده.وان شاء الله توصل بالسلامة.

انا لما روحت خدت الطريق فى 5 ساعات عشان و قفت استراحة فى ابو زنيمة كفتريات تعبانة مللة.
وانا راجع خدتها فى 4.5 ساعة لحد موصلت عندنا فى الحلمية عند شارع ابو بكر الصديق كده عشان موقفتش استراحات خالص

وكل سنة وانت طيب

ألأستراحات كتير على الطريق, يعنى مثلا قبل النفق ب 10كم هتلاقى بنزينة على أيدك الشمال و حنبيها كافيتريا الوردة البيضا و بعد كده هتلاقى نفسك داخل على تقاطع (بتكمل علطول للنفق) و قبل التقاطع و فى التقاطع نفسه هتلاقى كافيتريات و بنزينة وطنية
بعد النفق هتمشى لغاية راس سدر و هتلاقي فيها أستراحات كتير و بعد كده فى أبو زنيمة هتلاقى أستراحة كويسة و سيبك من أستراحات أبو رديس بعد كده فى الطور .
فى حاجة مهمة عن الطريق أفتكرتها, لما تعدى كمين الطور خلى بالك اليمين هايدخلك مدينة الطور نفسها و الشمال هايخليك تكمل على الطريق السريع فخليك فى الفردة الشمال

المناطق الخطر اللى فيها منحنيات دية بتظهر فجأة يعنى ممكن تتفاجأ بيها والعربية واخدة سرعتها، ولا بيكون فى قبليها لوحات إرشادية علشان تخليك تهدى سرعتك وإنت داخل عليها؟

متابع الموضوع
والف شكر للرجالة على الردود المفصلة
كل سنة وانتو كلكوا طيبين

السلام عليكم

المنحنيات الخطرة هتلاقي قبلها علي الاسفلت شريط لونه احمر في الفاصل ما بينك وبين الاتجاه التاني
لازم اول لما تشوف الخطوط الحمرا دي تهدي السرعه جداً

وخلي بالك من الملفات لاني وانا راجع كنت علي سرعة 160 كم وانا داخل الملف بنفس السرعه ومرة واحدة لقيت كمين فالحمد لله اني لحقت افرمل قبله بكم متر
كمان خلي الرخص معاك في الدرج لانك هتطلعها ييجي 7 مرات طول الطريق

وربنا يرجعك بالسلامة

توصل بالسلامه انشاء الله هو بس خد بالك لما تلاقي الشريك الأبيض اللي بين الحارتين احمر هدئ السرعه جدا لأنك داخل على ملف جامد ومتعديش عربيه في ملف طالما مش حافظ الطريق

طيب اخبار الطريق ايه بليل دلوقتى بعد العيد ؟
انا بتكلم عالامان مش السواقة

وخد باللك من التيت اللى تلاقيهم فى وشك بيعدوا بعض فى الملفات
الكافيتريا ممكن تدخل مش تلاقى مياه فى التواليت
عادى
بيشغلوها بناء على الطلب

ابعد عن السواقة بليل لان كتير جدا ببتقوم عواصف ترابية ما بتشوفش حاجة نهائي وصعب جدا تركن علي جنب لانه خطر سواء من التثبيت او من العربيات اللي جاية وراك مش شايفاك
وفعلا منطقة راس در زبالة عادي جدا عرباوي يقطع الطريق ويقف وكنت هالبس فيه فرملت العيال جمن الكنبة الخلفية عندي قدام وهو في الطراوة ضارب مخدرات لما معمي
والسفر من شهر 11 ل شهر 4 حاول تجلد عربيتك اي استيكر رخيص لان التراب بيصنفر العربية بجد مش هزار

اقتباس:

---

المشاركة الأصلية كتبت بواسطة karim_monir

ابعد عن السواقة بليل لان كتير جدا ببتقوم عواصف ترابية ما بتشوفش حاجة نهائي وصعب جدا تركن علي جنب لانه خطر سواء من التثبيت او من العربيات اللي جاية وراك مش شايفاك
وفعلا منطقة راس در زبالة عادي جدا عرباوي يقطع الطريق ويقف وكنت هالبس فيه فرملت العيال جمن الكنبة الخلفية عندي قدام وهو في الطراوة ضارب مخدرات لما معمي
والسفر من شهر 11 ل شهر 4 حاول تجلد عربيتك اي استيكر رخيص لان التراب بيصنفر العربية بجد مش هزار

---

منور الموضوع يا ا/كريم وشكرا عالافادة
ربنا يسترها معانا كلنا السواقة فى مصر كلها بقت قرف اوى