السلام عليكم ورحمة الله
عندي مستأجر مماطل بقاله 3 شهور مدفعش وقافل المكان ومفيش شهر دفعه خلال أكتر من سنتين إلا بقلة الأدب والمماطلة والتأخير والتهزيق وأنا جبت آخري منه وعايز أطرده بس أما آخد المتأخر عليه الأول لأن فواتير الكهربا كمان مش بتيجي وخايف تجيلي أنا بعد ما يغور وأتدبس فيها وكمان في فلوس كنت بخصمهاله من الإيجار مقابل إنه يشطبه ومشطبش بنص الفلوس اللي اتخصمت
فدلوقتي بفكر أكسر الأقفال وأحجز على العدة والحاجة اللي في المكان لحد ما ييجي يجيب الفلوس اللي عليه ويجيب العقد عشان نفسخه وبعدين أديله حاجته لأني لو دخلت في محضر وقضية والكلام ده الموضوع حباله طويلة وهياخد سنين في المحكمة وكله على دماغي في الآخر
فهل الكلام كده هيكون فيه شبهة قانونية وممكن يضرني أنا في شيء ؟
هو العقد بينص على إن من حقي فسخ العقد وإلزامه بدفع المستحقات بدون الحصول على حكم قضائي ولكن بعد التنبيه عليه كتابة فمش فاهم يعني ايه تنبيهه كتابة ؟ يعني عن طريق محضر ولا بأي وسيلة تانية ؟ ولو محضر يبقى كده هنخش في حوارات أقسام وقضايا ولا الموضوع ده سهل وسريع ؟
وكمان في العقد من حقي أيضا الحجز على ممتلكات المستأجر في حالة تخلفه عن دفع الإيجار فهل ده معناه إني ممكن أعمل كده من نفسي بدون أقسام وقضاء ولا لازم إجراءات معينة ؟
أرجو الإفادة للضرورة لأني كنت ناوي أحجز على الحاجة بكرة بس في ناس حذروني من كده فقلت أستشيركوا الأول
دي صورة العقد للاطلاع على نص البنود بدقة
المفضلات