الموضوع: استشارة قانونية عاجلة بخصوص مستأجر مماطل

المشاركة الأصلية كتبت بواسطة lidosasa

طبعاً مش من حق حضرتك تكسر المحل وتحجز على الممتلكات لآن ده إجراء قانونى ليه شكل معين ومش إنت اللى تطبقه بنفسك.
أولاً أنا مش بحب العقود المطبوعة اللى بتتباع فى المكتبات أياً كان نوعها لغموض وعدم وضوح بعض نصوصها ولآن كل حالة المفروض ليها ظروف وشروط تعاقدية خاصة غير التانية وأفضل إن أى حد يقوم بأى تصرف إنه يروح مكتب محامى يعمله العقد سواء إيجار أو تمليك ومش مهم 200 جنيه أو 300 جنيه أتعاب مقابل إنك تضمن عقد سليم وتضمن حقوق بآلاف الجنيهات
ثانياً حضرتك تعمله إنذار على يد محضر فى العنوان اللى موجود فى بطاقته بإنه متأخر عن سداد الإيجار فى الفترة من كذا لكذا وتطالبه بالإيجار المتأخر وتنذره بالطرد طبقاً لنص البند 5 من العقد ( وهو ده التنبيه الكتابى المقصود فى العقد وممكن تعمله جواب مسجل بعلم الوصول لكن أنا أفضل الإنذار على يد محضر )
ثالثاً تتقدم بطلب إلى قاضى الأمور الوقتية بالمحكمة الجزئية التابع لها العقار وتطلب الحجز على المنقولات الموجودة بالمحل المستأجر وفاءاً لدين الأجرة المستحق على المستأجر
رابعاً ترفع دعوى لطرده من العقار طبقاً لنص البند الخامس من العقد لتأخره فى السداد
طبعاً الحاجات دى حضرتك مش حتقدر تعملها بنفسك والأفضل لو فيه محامى يقوم بيها لحضرتك
مفيش غير كده مش معنى إن الحق معاك إنك تاخده بدراعك لو فتحت المحل عنوة يقدر يعملك محضر ويعملك مشكلة جنائية وتروح النيابة والشرطة وإنت اللى تجرى وراه عشان يتنازل ويتصالح معاك

حسبي الله ونعم الوكيل
يعني أبقى أنا صاحب المكان ومأجره لواحد نصاب وأتبهدل أنا البهدلة دي مع إن المكان مكاني وواحد مبلطج عليا وقاعد فيه غصب عني ومن غير ما يدفع إيجاره وأروح أجري وراه في المحاكم والأقسام وحلني على ما القضاء الشامخ يحددلي جلسة ويحكم فيها وكله على دماغي في الآخر لأني هقعد سنة ولا اتنين من غير إيجار !
بس ازاي الكلام ده والعقد بينص على أن من حقي فسخ العقد وطرده والحجز على المنقولات بدون حكم قضائي ؟