لما كلنا ملايكه امال فين الشياطين
السؤال ده بيلح عليا من فتره لانى حاسس ان مصر كلها عايزه تهاجر وتخلع من البلد وكل شويه بقول لما كلنا محترمين ومش عارفين نعيش وسط المصريين اللى سلوكهم سئ امال فين المصريين الوحشين دول فبلاقى الاجابه ان احنا المصريين دول وسلوكنا فى كثير من الاحيان "الاشخاص اللى حابين يسافروا " بيكون وصفه انه سلوك سئ بس احنا بنبرر لنفسنا دايما الغلط ونحرمه على غيرنا
وطول عمرنا بنحب الناس تعذرنا على اخطاءنا ونتضايق جدا لما الناس متعذرناش ونحس بالقهر من كده
وفى احيان كتير بنكون فعلا مظلومين والحياه مع البيئه المحيطه سيئه بس السؤال احنا عملنا ايه علشان نغير السلوك ده فى المجتمع بمعنى كل واحد لما بيحب يتفسح بينزل يدخل سينما ويشجع المنتج الهابط ده ولا بياخد اولاده يدخلهم الاوبرا او مسرح ويفرجهم على حاجه محترمه طيب هو شخصيا لو لقى نفسه غلطان فى اى حاجه بيعترف ويتحمل غلطه ولا بيكابر ويقول علشان محدش يشيلنى الليله وهو ده اللى ماشي ولو حس ان اللى قدامه اضعف منه بيديله حقه ولا بيجى عليه ويقول اهو ده اللى ماشي وطالما اقدر عليه يبقى خلاص
الفكره كل واحد بيربي عياله على ان اللى يضربك اضريه و لا اللى يضربك اشتكيه واوعى تسيب حقك الا لما تاخده بالطرق السليمه
ولو بنعمل كل السلوكيات صح نبقى اكيد ملايكه وفعلا منستحقش نعيش فى البلد اللى كلها شياطين دى ! بس الفكره ان كل البلاد فى العالم فيها شياطين يبقى نروح فين؟؟؟؟؟
ومعرض جدا انك تلاقى فى بلد محترمه واحد بيكسر الاشاره لانه عارف ان مفيش كاميرا او ظابط واقف بس تفتكر سلوكك حيتغير لما تشوف الشيطان ده ولا حتقول ان مسيره يوم يتمسك وتفضل متمسك باحترامك لذاتك ولقوانين البلد
عندنا فى مصر قوانين كتييييير جدا بس احنا اللى مش بنحترمها وكمثال كتير مننا بيفيم عربيته ولما ظابط يمسكه ويسحب رخصته يبدأ يشتكى ان البلد ظالمه وان الظباط مفييمين عربياتهم وان مفيش داعى لتحريمه علينا احنا كمان وننسي تماما ان الاصل ان القانون مانع الفاميه "سواء صح او غلط " القانون بيقول كده يقوم لما ييجى ظابط "جايز يكون محترم فعلا " يطبق عليك نص القانون تزعل بالرغم انك مخالف اصلا وانت عارف كده ولو طبقنا الموضوع ده بره فلقيت ظابط بيوقفك ويعملك مخالفه علشان النور الخلفى مش شغال مش حتقول ساعتها وايه يعنى وده ممكن الظابط تكون عربيته فيها نفس المشكله وهو مش واخد باله بالعكس حتدفع المخالفه وانت بتقول الله على النظام فليه بره نحترم القانون ونعترف بغلطنا وفى مصر نلاقى لنفسنا 15000 مبرر ان اللى بنعمله ده الصح ومع تزايد الغلط اصبح الصح مش مفهوم واغلبنا بننكره .
كلنا فينا اخطاء وزى مكل واحد فينا جواه ملاك جواه شيطان الفكره انت حتغلب مين على مين .
اللى عايز اقوله ان لما انت شايف نفسك محترم وحتمشي من البلد فيقل المحترمين 3 انت واولادك لو مخلف وحتربيهم صح فيقل المحترمين ويزيد غير المحترمين فباقى المحترمين يفكروا ان البلد مبقتش بتاعه المحترمين فلازم نمشي وكل المحترمين يهاجروا او ينطووا على نفسهم حتبقى مصر بلدك بلد غير المحترمين وبالتالى تستاهل اى حاجه لان عدم الاحترام بيؤدى بفكر المجتمع للتطرف فى اى شئ وتضيع بلدك وبعد 20 سنه تبقى انت برضه موصوم بانك من بلد شعبه "غير محترم" وساعتها مش حتقدر تغير الوصمه دى لانك مهما اتغيرت حتفضل مصري .
ثم "لكل واحد عايز يسافر علشان مش عارف يعيش وسط غير المحترمين " تفتكر اللى انت حتعمله ده حل اكيد لا طبعا لانك لو بتتكلم على مستوى تعليمى لاولادك فحتلاقى ان بره التعليم مكلف جدا ولو حابب تصرف الفلوس دى فى مدرسه اميركان او انترناشيونال فى مصر فاحب اقولك ولادك حيتعلموا برضه تعليم محترم اما عن التربيه فانت اللى حتربي عيالك سواء هنا او بره لان حاليا مفيش مدارس بتربي المدرسه لو محترمه "حتعلم وترسخ مبادئ ممكن تعجبك وممكن لا " فانت المسؤل مش المدرسه
البلد دى فيها كل حاجه ودى اهم ميزه فيها ومش علشان السئ طفح على السطح لاى سبب تبقى البلد وحشه لازم نقف جمب بعض كمحترمين ونواجه قله الاحترام لعلنا فى يوم من الايام نبقى بلد محترمه وشعبها محترم .
اللى عايز اقوله فى النهايه ياريت كل واحد بيدور على السفر او الهجره فكر كويس يمكن برضه بره متبقاش عايش سعيد لان السعادهموضوع نسبي احنا اللى بنعمله مش الظروف اللى بتفرضه علينا ولو شايف انك بخروجك بره حتعمل حاجه لنفسك ولبلدك سافر لو حتنفع نفسك بس وتبقى برضه ترس فى مكنه يبقى خليك هنا وحاول تصلح من البلد ولو مش قادر تقعد هنا خالص سافر شويه اشتغل بره بس خلى فى بالك انك حترجع فى يوم ما تغير من السئ اللى فى بلدك معانا واعرف انك بره مش رايح الجنه بتاعه الملايكه والله كل البلاد فيها بلطجه وتثبيت وسرقه .
يا رب محدش يزعل منى ويمكن برضه تكون وجهه نظرى غلط بس حبيت اعرف رايكم
المفضلات