الموضوع: لما كلنا ملايكه امال فين الشياطين؟؟؟؟

عشان سلوكيات او فكرة معينة تنتشر بين اى مجموعة من البشر فى اى مكان لازم لها حاجة اسمها mainstream او تيار رئيسى و هو اللى بالبلدى بنسميه سيستم...... الفكرة ان احنا كشعب فى الاغلب مش بنحاول نبدأ بأنفسنا عشان نعمل اول خطوة لتكوين التيار الرئيسى للسلوكيات المنضبطة ده...... بيساعد كمان على ان ده ميحصلش ان مفيش رقابة او استهجان للمجتمع لاى سلوكيات خاطئة انما كله ماشى..... و كله بيبرر لنفسه المخالفات...... فكرة التيار الرئيسى دى هى اللى بتفسر ليه لما المصرى بيسافر بره و بيلاقى نظام بيندمج فيه و مش بيفكر يبلطج زى ما هو متعود فى مصر...... لان النظام بيجبره على احترامه و لو فكر يبلطج هياخد فوق دماغه وقتى...... فكرة التيار الرئيسى دى برضه مثل بسيط عليها هو التزام الناس و هم فى محطات مترو الانفاق...... الاغلبية حريصة على الحفاظ على نظافته و الالتزام بالقواعد اللى معمولة لاستخدامه

طيب نخلق ازاى التيار الرئيسى ده؟ فى قانون بيحكم سلوكيات اى تجمع بشرى اسمه الكتلة الحرجة...... القانون ده بيقرر انه انت محتاج حوالى 30% فقط من مجموع اى تجمع بشرى عشان تعمل تغيير فيه....... تخيلوا 30% بس من 50 و لا 70...... فلو كل انسان حاول يبدأ بنفسه لغاية ما 30% بس من الناس تبقى ملتزمة هنلاقى ال 30% دول هيحركوا الكتلة الباقية فى الاتجاه بتاعهم

و بمناسبة الملايكة و الشياطين..... تخيلوا كل يوم الصبح قبل ما بطلع المحور بيبقى جوايا- يوميا- صراع نفسى على ايه؟ هل التزم بالسرعة بتاعة الطريق اللى هيا 90 و لا اجرى بسرعة اكبر خاصة ان اغلبية من حولى بيقلبوها حلبة سباق...... جزء الملاك بيقول خليك ملتزم..... جزء الشيطان بيقول ما تجرى يا عم ما كلهم بيجروا و انت اللى عشان ماشى بسرعة ثابتة لما تيجى تسلك روحك اللى حواليك بيخنقوك...... فى اغلب الاحيان بحاول اخلى تملى جزء الملاك هو اللى ينتصر...... بمساعدة نفسى اولا انى انزل بدرى خالص من الاساس لتجنب الزحام و الصربعة...... لكن برضه الشيطان بينتصر فى قليل من الاحوال لما اكون متأخر و الشيطان بيبررها ان الكل بيعمل كده + ان الكاميرات بايظة يعنى مفيش خوف من المخالفة او العقوبة.......

مرة طقت فى دماغى فكرة قياس الالتزام دى هنا فى المنتدى فعملت استطلاع عبارة عن سؤال واحد بسيط...... لو الطريق فاضى (اغراء الجرى) و مفيش رادار (امان من العقوبة) هتجرى و لا هتلتزم بالسرعة القانونية بتاعة الطريق؟ و كانت النتيجة للاسف ان اكتر من 80% من اللى شاركوا فى الموضوع قالوا انهم هيجروا اكتر من سرعة الطريق...... بس كل واحد قعد يعمل لنفسه قواعد على مزاجه...... يعنى اللى يقولك انا هجرى بس اخرى فى الجرى 120 و اللى يقولك 140 و هكذا...... و بعد كده نرجع نشتكى من الفوضى على الطرق و الحوادث..... نعيب زماننا و العيب فينا

خلاصة القول ان الانسان عشان يعيش فى وسط محترم له سلوكيات منضبطة لازم يبدأ بنفسه و يدعو غيره للتغيير الايجابى و لا ييأس من التزامه هو فقط و مخالفات الاخرين...... يعنى نبطل شكوى و تبرير الخطأ لانفسنا و نبدأ نلتزم من انفسنا بغض النظر عن خوف من عقوبة - فى حالة المرور تبقى مخالفة- لغاية ما الكتلة الحرجة المطلوبة للتغيير تتكون بنظرية كرة الثلج..... بدل ما كتلة ثلج السلوكيات الخاطئة هى اللى تكسب و تتفاقم و تقرفنا كلنا فى عيشتنا زى ما هو حاصل دلوقت..... يضاف لكده كمان ان القانون يرجع يسود تانى - بدون فساد او استغلال او قهر- و تتلم فوضى كتير من اللى فى الشارع...... و ان شاء الله كل ده هيحصل و القادم افضل

الناس عندنا هنا مليئة بالامراض النفسية المتوطنة ومع انتشار الجهل والامية وانعدام المبارئ ينتج في الاخر شباب العيد اللي بنشوفهم في الاعياد بيتحرشوا بالبنات ويتخانقوا ويسرقوا المهم معظم الناس عندها انفصام في الشخصية او الشيزوفرينيا بمعني الشخص لما يكون قاعد مع اصحابة تلاقيه عامل نفس وحش وفتك وسبع البرمبة ولما تلاقيه وقع في ايده شخص ضعيف يطلع فيه كل عقده النفسية ولما تلاقيه يقع في ايد واحد مابيرحمش تلاقيه اتحول لمواطن مسالم محب الخير ولما تلاقيه يخش جامع تلاقيه اتحول لعم الشيخ ولما يقعد مع اسرته تلاقيه اتحول للشخص المثالي ولما يشوف حد بيعمل حاجة غلط تلاقيه اتحول للشخص النصوح وهكذا فالناس عندنا هنا ليس لها شخصية ولا يعرفون انفسهم ولا يحاسبون انفسهم فهم كثعابين تتلون حسب المواقف فهم معدومي الارادة قليلي الفكر ليس لهم مبادئ يمشون عليها تنظم لهم حياتهم علي فكرة الناس برة عندهم مبادئ كل شخص ليه المبدئ بتاعه ثابت عليه وبيطورة ويصححه فلما تتعامل مع حد وتفهم فكره تعرف تتوقع تصرفاته في كل المجالات بمعني معندهمش النفاق والرياء والتلون اللي عندنا وابسط حاجة تلاقي مثلا في ناس عاملة موضوع انه عمل حادثة وميكروباس خبطه وسواق الميكروباس كان ظالم ومفتري وعشان انا مواطن صالح قولت حسبي الله ونعم الوكيل وتلاقيه مقهور بس لما تركز شويه صحيح انت في حدثتك مع الميكروباس كنت مظلوم وانت كنت ماشي صح بس من اسبوع او شهر كنت مسكت موظف عندك ظلمته او مسكت جارك اتبلطجت عليه او اذيت شخص اضعف منك وبالتالي ربنا يسلط عليك من ينتقم منك وفي الاخر ومن اعمالكم سلط عليكم