مغامراتي مع جدتي في العيد
كل عام وانتم بخير بمناسبة هذة الايام المباركة ونسأل الله العلي القدير ان يجمعنا مع من نحب علي جبل عرفات وكعادة كل عام فعندما كنت صغير في ابتدائي حتي ثانوي فقد عودني ابي وامي علي عادة جميلة وهي ان في هذة المناسبات السعيدة نجلس مع بعض امام التلفزيون ونكتم صوت التلفزيون ويجيب والدي اجندة التليفونات ونتصل بالناس نعيد عليها وفي اخر كل مكالمة يديني التليفون عشان اعيد علي قرايبي فكانت عادة جميلة وماكنش في حاجة اسمها موبايلات ولا اختراع الكومبيوتر
ولما كبرت ودخلت الجامعة بقيت اتصل انا من نفسي واعيد علي الناس وبالنسبة لقرايبي ذوي العلاقات الخفيفة او التي توجد مشاكل مع اسرتي او خلافات وقطيعة مع اسرتي فاكتفي بزيارة لا تتعدي الساعة يوم الوقفة وباكون عاصر علي نفسي لمونة ورايح مستعد اني ادخل الكلام من اليمين واخرجة من الشمال بس الزيارة من اجل صلة الرحم
فاكرين ايام زمان بالنسبة لجدي وجدتي طبعا العائلة كلها والاحفاد لازم تجمع عندهم علي الغداء اول يوم العيد ونقضي اليوم كله عند الجد والجدة ويدونا العدية ولازم تكون الفلوس جديدة لانج ويجوبلنا بومب العيد والكورة البلاستيك اللي كانت بتتخرم والطراطير والبلالين اللي نقعد نفخ فيها لحد ما تجلنا بواسير ووشنا يحمر والواد البلاستيك اللي بيعوم في المياة اللي بيشتغل بزمبلك والازازة اللي فيها مياة وصابون وتونفخ تتطلع كورة مياة ونفرقعها بايدينا وكان في لعبة عقيمة عبارة عن بتاعة بلاستيك علي شكل دائرة كنت تشد الخيط فتطير البتاعة المدورة وكانت لازم تجيبلنا ايس كريم كانت دايما بتسميه جيلاتي دولسيكا او كيمو كونو وكنا نلعب كورة علي السلم عند جدتي ويالهوي علي الخسائر اللي بتحصل في العمارة وعند جدتي في الشقة فكانت والدتي تزعقلنا لما نبوظ حاجة تيجي جدتي تقولها مالكيش دعوة بيهم سيبوهم يبوظوا اللي هما عايزينه ( فعلا حب بدون مقابل - حب وشعورهم بالسعادة لمجرد رؤيتك سعيد - حب بدون انتظار مصلحة منك ) وفي اخر اليوم تبص علي الشقة تحس انها خارجة من حرب عارفين كل حاجة سليمة بس مستقلة بذاتها. ولما كبرت بقيت انا اللي لازم ازور قرايبي اللي كبروا في السن والفكرة كلها اني حتي لو مشطايق قريبي اللي بعيد عليه بضطر اروحله مش عشان سواد عيونه ولا عشان اخد منه عيديه ده عشان ربنا يغنيني ويوسع رزقي عملا بحديث رسول الله ( من اراد ان يوسع له في رزقه فليصل رحمه ) صدقت يا رسول الله وكان ابي وامي دائما يرددون لنا هذا الحديث حتي تعلمناه
رحم الله جدي وجدتي وخالي وجميع موتي المسلمين
ونسأل الله ان يحفظ ويبارك ويعز والدي ووالدتي وجميع اهالي المسلمين
وان يجمعني واهلي علي جبل عرفات وكذلك اهالي المسلمين
وكل عام وانتم بخير وغفر الله لي ولكم وسائر ابناء المسلمين