هل ممكن اشتغل سمسار شقق واراضى وما هو المطلوب لتلك المهنة

**الفجر** · 12-10-2013 07:50 PM

يمكن تضرب معايا والاقى شغلانة تكفينى انا وعيالى هل ممكن اتحول الى سمسار اراضى وشقق ؟

وما هو المطلوب لتلك المهنة انا مش عايز الافات ولا ملاييم عايز بس الستر واى مبلغ من حلال

**eng wael** · 12-10-2013 08:41 PM

مع الاسف لازم تكون افاق وحلانجى علشان تعرف تشتغل وهيا دى مواصفات معظم من يعملون فى التجارة الا مارحم ربى ويعلم الامانه بحقها
ربنا يوفقك طبعا كل ماعليك هو مكان وبعدين تبدأ فى تجميع الداتا بتاعتك

**MOTOR HEAD** · 12-10-2013 08:54 PM

السمسار بيساعد الناس يعنى يجيب اللى عايز يشترى للعايز يبيع و بياخد نسبه

مش لازم يبقى حلانجى و لاحاجه

اعتقد مهنه السمسار محتاجه يبقى معاك عربيه تستحمل البهدله و اللف

و ربنال يكرمك

**amr011111** · 12-10-2013 08:56 PM

الاحسن تحاول تجمع مبلغ تدفعه مقدمة تاكسى ومن الشغل على التاكسى ان شاء الله تسدد القسط ويدخلك دخل مناسب ان شاء الله

**mk3** · 13-10-2013 03:48 AM

المشاركة الأصلية كتبت بواسطة الفجر

يمكن تضرب معايا والاقى شغلانة تكفينى انا وعيالى هل ممكن اتحول الى سمسار اراضى وشقق ؟

وما هو المطلوب لتلك المهنة انا مش عايز الافات ولا ملاييم عايز بس الستر واى مبلغ من حلال

اجنده. قلم. موبايل خاص بالشغل. واعتمد على لله

**الفجر** · 13-10-2013 07:46 AM

المشاركة الأصلية كتبت بواسطة mk3

اجنده. قلم. موبايل خاص بالشغل. واعتمد على لله

طريقة العمل اية ؟؟

**janagabr** · 13-10-2013 08:52 AM

المشاركة الأصلية كتبت بواسطة eng wael

مع الاسف لازم تكون افاق وحلانجى علشان تعرف تشتغل

ههههههههه عسل يا باشا

**ahmedteam** · 13-10-2013 11:20 AM

ابدأ و راعى ربنا ف شغلك و ربنا هيرزقك اكيييد

قال تعالى "وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا ۚ كُلٌّ فِي كِتَابٍ مُبِينٍ "

**mk3** · 13-10-2013 12:39 PM

المشاركة الأصلية كتبت بواسطة الفجر

طريقة العمل اية ؟؟

لازم هتلف شويه الاول وتاخد نمر المعلمين والتجار وتعرف عندهم ايه وبكام وتخش عليهم فاتح اجندتك وبدون ترتيب كلام تخش بقوه سلام عليكم كانها شغلتك من 20 سنه وتقوله باكل عيش معاك فى حاجه متابعتش وتسجل اسمه وتليفونه
وحاول تعرض اللى وصلته هنا فى النت او فيس بوك برقمك انت طبعا وحاول تخصص فى مناطق ومن معرفتك بالحج ابراهيم فى الهرم مثلا هتلاقيه راح بعدها بنى فى المنيل وهكذا

**أبو آسر** · 14-10-2013 02:30 AM

هتروح منطقة تكون لسة جديدة وفيها أبراج وشغل عقارات كتير وزحمة وعليها عرض وطلب كويس وتلف على أصحاب الأبراج وتسجل أرقام تليفوناتهم اللي على اليفط أو أرقام الناس اللي معلقة يافطة على شقتها عايزة تبيعها أو تأجرها وتعمل قاعدة بيانات حلوة وسريعة وبعدين تحاول تطبع كروت وورق وتوزعهم على المنطقة في المساجد بعد صلاة الجمعة وعلى القهاوي وتلصق على العماير والمحلات وكده (الدعاية مهمة جدا) وتحاول تكون حِرِك يعني تلمح الزبون عمال يتلفت يمين وشمال ويبص فوق على الشقق وتلقط إنه عايز شقة تقوم تنطله علطول بس بأسلوب منمق ومحترم مش نظام لازقة لأن الناس بتخاف من السماسرة ومش بتحبهم وأهم حاجة ميكونش ماشي معاه سمسار تاني علشان ميحصلش خناق وبعدين تعملك صفحة فيس بوك محترمة تحاول تنشرها وشوية إعلانات في المنتديات ومواقع البيع والشراء (التسويق الإلكتروني مهم جدا اليومين دول) ويا سلام لو ربنا كرمك كده تقوم مصمم موقع محترم وحاطط فيه الشغل بتاعك أو حتى تعمل مدونة بلوجر أو ووردبريس مجانية وتحاول تنشرها وده ممكن يجيبلك شغل من مختلف مناطق القاهرة كلها مش المنطقة اللي انت فيها بس
وأهم شيء تتوكل على الله وتخلص النية لله وتجعل أمورك ورزقك بيد الله وإنه هيرزقك من حيث لا تحتسب وإن رزقك هيجيلك هيجيلك محدش هياخده منك ولا هتاخد رزق حد
وربنا يوفقك