الموضوع: مواتير اللانوس المختلفة

عدى علينا فى مداخلاتنا السابفة ان اللانوس فيها نوعين مواتير مختلفة و ناس كتير سالت على الفرق بينهم و اى موتور موجود فى اى موديل فا فكرت اعمل الموضوع دة لتوضيح الفروق و الاجابة على الاسئلة

اللانوس ظهرت فى مصر من عام 98 و كانت موجودة باسم لانوس 1 و كانت اما هاف اوبشن مانيوال او فول اوبشن اوتوماتك... العربيات دى نزلت بموتور فيه حساس اكسجين و علبة بيئة و EGR دى صورة الموتور دة



الموتور دة مصنف تحت فئة TLEV للانبعاثات الضارة للبيئة و بيبقى فيه امكانية تحديد درجة الاوكتين اللى العربية حتمشى علية من خلال فيشة الاوكتين

لما ظهرت اللانوس 2 فى اواخر 2000 نزلت هاف و فول اوبشن مانيوال ( و فيه شوية اوتوماتك فى الخباثة) بس فى الموديلات دى ظهر موتور مختلف شوية على العربيات الهاف اوبشن و دى صورتة



و هو مختلف لانة مفيهوش حساس اكسجين ولا EGR ولا علبة بيئة و فيه potentiometer لضبط الموتور و مكانة خلف البطاحة الشمال



و الموتور دة حسب ما قريت مصمم لاستخدام البنزين المعالج بالرصاص و بالتالى مفيهوش حساس اكسجين ولا علبة بيئة

و حسب برضة اللى قريتة اعتقد ان المواتير دى بتعتمد على fuel maps من الكمبيوتر طول الوقت لان مفيش حساس اكسجين يقدر الكمبيوتر يضبط نسبة الهواء و الوقود منها و بالتالى بيعتبر اكنة شغال فى open loop طول الوقت

و فى عدة تجارب و جريات كانت دايما العربيات اللى بموتور من غير حساس اكسجين اسرع من العربيات اللى بحساس اكسجين مما يرجح امكانية ان maps اللى فى كمبيوتر العربيات دى افضل من المشى ب closed loop بس طبعا دة بيلوث البيئة اكتر

ايه الحكمة ان اللانوس الفول اوبشن تنزل بالموتور اللى فيه حساس اكسجين و الهاف تنزل بموتور مفيهوش حساس غير معروف... يمكن تكون المواتير دى ارخص من المواتير اللى بحساس اكسجين ( و دة تصور منطقى) و كان فرصة لتقليل تكلفة الهاف عن الفول اوبشن... محدش عارف

MMamdouh

fuel map

يعنى كمية البنزين الواجب تغذيتها للمحرك تحت ظروف معينة.... يعنى عند لفات كذا و فتحة بوابة كذا و كمية فراغ اد كذا يبقى كمية البنزين المطلوبة كذا... و كل ما حاجة من دول تتغير كمية البنزين تتغير

closed loop

تحت ظرف التشغيل دة الكمبيوتر بيقرا كمية الاكسجين فى العادم و على اساس القراية دى بيعدل كمية البنزين اللى بتخش الموتور و بالتالى بيحاول يحافظ على نسبة 14.7 لواحد اللى هى النسبة المثلى للهواء و البنزين فى الموتور

open loop

تحت ظرف التشغيل دة الكمبيوتر بيهمل قراية حساس الاكسجين و بيعتمد على القيم اللى متسجلة فى ال fuel maps بتاعتة

بما ان العربيات الهاف مفيهاش حساس اكسجين يبقى اكيد دى شغالة فى open loop mode طول الوقت

MMamdouh