تقييم الكارينز الجديدة كليا 2014

**masryxt** · 18-10-2013 02:26 AM

المشاركة الأصلية كتبت بواسطة monamize4

انا ملاحظ ان تقييم حضرتك overrated شوية ,,
كله بالنسبالك ممتاز و مفهاش اى عيوب

انا متفهم طبعا ان حضرتك جايب العربية جديد و مبسوط منها
لكن فى ناس بتتابع و بتبنى اراء بناءا ع التقييمات دى

حضرتك سوقتها كام كيلو ؟
و ايه العربيات اللى انت سوقتها قبل كدة و بتقارن اداء الكارينز بيهم ؟

و ربنا يباركلك فيها و يبسطك بيها اكتر و يحفظهالك

اشكرك علي الاهتمام بالمشاركة

حضرتك بتقوللي ان تقييمي Over rated شوية يجوز جالك الاحساس دة لاني بتكلم علي عربية زيرو فاية تتوقعة في تقييم عربية زيرو ومواقع كتيير بتتكلمعنها بشكل ايجابي جدا وعربية انا مختارها بعد مقارانات عديدة و قراءةمراجعات المواقع المشهورة عنها اقرا حضرتك توب جير وشوف كاتبيين عنها اية, هل هما كمان اوفر راتد؟؟؟

خلينا نتكلم بمنطق اكتر

اكيد وبما اني شاريها بعد قراءة تقييمات للعربية كتير وكانت في الاغلب ايجابية فلازم اي واحد طبيعي يكون متاثر بيها ويظهر الكلام دة في تعليقة

الحاجة التانية بالنسبة للعربيات اللي سقتها قبل كدة
انا سقت وامتلكت الاتي وبالترتييب التالي
127 سنة 2000
بولونيز سنة 2001
مرسيدس 280 اس موديل 1986 سنة 2002-2003 و كانت ليها حكاية
تويوتا كريسيدا موديل 1986 سنة 2003-2004
كيا سبيكترا موديل 2004 زيرو 2004-2006
بيجو 307 موديل 2007 زيرو شكل بتاع 2006 دي قعدت معايا 6 شهور
فويجر 1998 قعدت معايا 6 شهور تانيين
سوبارو امبريزا 2006 زيرو قعدت سنة
فورد توروس 1996 من 2007 الي 2010
كيا سيراتو 2010 زيرو من منتصف 2010 حتي سبتمبر 2013
كيا كارينز الحالية وماشي حتي الان 8500 كيلو

انا باحتفظ بالورق بتاع اي عربية جبتها في فترة الجنونة بتاعتي لو حبيت تتاكد من صدق كلامي

علي فكرة كمان كان فية دايهاتسو ميرا موديل 1999 قعدت حوالي سنتين
ملحوظة تانية كان فية اوقات بيكون معايا اكتر من عربية
كانت فترة هبل بصراحة

اما عن تقييمي وموضوع تاثر الناس بتقييمي انا كاتب فوق لو حضرتك اخدت بالك اني بحاول اكونموضوعي قدر الامكان لان فية ناس ممكن تتاثر بكلامي وانا باعرض وجهة نظري من خلال معرفتي اللي ممكن تكون صح او خطاء
وصدقني انت ماسوقتهاش ولا ركبتها وربما لو ركبتها هايكون تقييما اكثر تحيزا
اخر حاجة انا سني 45 سنة و شغال في مجال البترول في منصب معقول دة فقط لاستكمال الصورة

اتمني لو انك كنت صبرت شوية لانك هاتقري بعد شويةتقرير فية جانب سلبي بالنسبة لرحلة العودة من الغردقة من ناحية استهلاك البنزين اللي زاد جدا في رحلة العودة وتحليلي لة اني كنت راجع في مواجهة الهوا اللي كان شديد حبتين ودة بينعكس علي ال ار بي ام والسرعة المقابلة له

بالنسبة لباقي النقاط
الراحة - الثبات - التكييف - الاتزان في المنحنيات و قوة الفرامل في الحالات المفجاءة كل دة اكثر من ممتاز بالنسة لي

اخيرا وليس اخرا انا مبسوط انك تنبهني لملاحظتك وانا شاكر علي هذا التنبية

بس خللي بالك ان اي عربية زيرو لاتظهر المشاكل الحقيقية بهها غير بعد كيلومترات معينة تختلف باختلاف الطرق واسلوب القيادة
تقبل تحياتي واشكرك وفي انتظار اي ملاحظة من الاخوة الاعضاء
دة لينك للموضوع الاول
http://www.nilemotors.net/Nile/382408-2014.html

**masryxt** · 18-10-2013 02:34 AM

المشاركة الأصلية كتبت بواسطة ads

على فكره اللون البترولى فعلا من اجمل الونها هوه والشامبيين

بس الفرش الداخلى بيج ولا اسود و حضرتك اشتريت من اى فرع

الفرش الداخلي لونة اسود والتابلوة كمان اسود انا هاصور العربية من جوة ومن برة وهاحط الصور لانه مش اسود صريح بس اريح من السفر واغسل العربية علشان الصور تكون بشكل كويس
انا كنت اشتريت من ياسين بس بصراحة كان عن طريق معرفة لانها ماكنتش موجودة خالص

بالنسبة للون انا كنت متردد مابين الموكا والبترولي وماكنتش عارف ارسي علي مين فيهم لحد ماجاءت ساعة التنفيذ واللون كان البترولي
ومرة تانية انت بتحس بشخصية لكل لون فالموضوع بيكون محير بدرجة رهيبة

**masryxt** · 18-10-2013 02:47 AM

المشاركة الأصلية كتبت بواسطة mastr_n

مبروك عليك العربية وعقبال تقرير ال 100 الف على خير ان شاء الله

سؤال فى خامات التابلوة هل جلد ولا بلاسيتيك؟

وربنا بديك خيرها ويكفيك شرها

بالنسبة لخامات التابلوة من الامام مش جلد مش بلاستيك عارف بيكون ملمس جلد وفية ليونة لما بتضغط علية اما بالنسبة للجزء الخلفي ومن اسفل فهي خامات بلاستيك
لابواب نفي الخامة اللي اتكلمت عليها مع بطانة جلد
عجلة القيادة والكنصول الاوسط وذراع الفتيس جلد الفرش قماش استوفا ووتر برووف

الكراسي عادية مش كهربا كان حد سألني عنها
درج التابلوة في تبريد مش الكنسول الاوسط بردة حد كان سالني علية

بالمناسبة النهاردة وانا راجع كنا في العربية 6 اشخاص بالغين و3 اطفال 12 سنة و10 سنين و 8 سنين ودول اولادي انا طولي 197 فتخيل وكان معايا الوالد واخواتي الاتنين نفس المعدل

وبدون مبالغة كانو مرتاحين مع ملاحظة ان اصغر ابنائي كان قاعد علي الكونسول الاوسط
وكان الكرسيين اللي في اخر صف قاعد عليهم شخصين بالغين وطفل والكراسي الوسطي 3 واتنين قدام

اخاف اقول ماحدش اشتكي تقولوا ببالغ

**masryxt** · 18-10-2013 02:48 AM

المشاركة الأصلية كتبت بواسطة د.محمود صلاح

الف مبروك واختيار موفق ..

هل الكراسي الامامية كهربائية ؟ .. وهل الصندوق الاوسط للاغراض به فتحة للتبريد ؟

الكراسي عادية مش كهربا
درج التابلوة في تبريد مش الكنسول الاوسط

اشكرك للمشاركة

**ads** · 18-10-2013 04:02 AM

حمد لله على السلامه ورحله سعيده ان شاء الله

منتطرين من حضرتك تقيمك فى رحلة العوده
كل سنه وحضرتك طيب

**ads** · 18-10-2013 07:08 PM

بم ان حضرتك امتلكت ماركات محترمه من العربيات زى المرسيديس والبيجو307 والكريسيدا 86 والسوبارو اللى معروف عنهم الاداء المحترم هل اداء الكارينزالجديده افضل من الماركات دى ولا فيه ماركه حضرتك حسيت انها كانت افضل ولغاية دلوقت بتفتكر ها ولا حاسس ان الكارينز فعلاً تكنولوجيا مختلفه وأفضل

**masryxt** · 19-10-2013 01:42 AM

المشاركة الأصلية كتبت بواسطة ads

بم ان حضرتك امتلكت ماركات محترمه من العربيات زى المرسيديس والبيجو307 والكريسيدا 86 والسوبارو اللى معروف عنهم الاداء المحترم هل اداء الكارينزالجديده افضل من الماركات دى ولا فيه ماركه حضرتك حسيت انها كانت افضل ولغاية دلوقت بتفتكر ها ولا حاسس ان الكارينز فعلاً تكنولوجيا مختلفه وأفضل

انا مقدر جدا لمتابعتك واهتمامك وارجو اني اقدر اديلك صورة واقعية وامينة علي قدر ما استطيع
هاستاذن منك ان يكون الرد بكرة لان اليوم كان فية زيارات عائلية والوقت خدني واتلطعت بعد الحظر 4 ساعات ولسة داخل حالا معلش سامحني بس مجهد جدا

**ads** · 19-10-2013 05:31 AM

المشاركة الأصلية كتبت بواسطة masryxt

انا مقدر جدا لمتابعتك واهتمامك وارجو اني اقدر اديلك صورة واقعية وامينة علي قدر ما استطيع
هاستاذن منك ان يكون الرد بكرة لان اليوم كان فية زيارات عائلية والوقت خدني واتلطعت بعد الحظر 4 ساعات ولسة داخل حالا معلش سامحني بس مجهد جدا

احنا اللى مقدرين تعبك ومجهودك علشان توصلنا تقيمك للعربيه وانا اسف انى بتقل عليك

**Ramy.Gamal** · 19-10-2013 06:06 AM

معلش ربنا يعينك و فعلا احنا متقلين عليك بس حضرتك متعاون جدا و حضرتك عارف انا بجمع اى معلومات عن الكارينز الجديدة تحديداً و اكرر شكرى لحضرتك

**masryxt** · 19-10-2013 10:25 AM

المشاركة الأصلية كتبت بواسطة ads

احنا اللى مقدرين تعبك ومجهودك علشان توصلنا تقيمك للعربيه وانا اسف انى بتقل عليك

المشاركة الأصلية كتبت بواسطة ramy.gamal

معلش ربنا يعينك و فعلا احنا متقلين عليك بس حضرتك متعاون جدا و حضرتك عارف انا بجمع اى معلومات عن الكارينز الجديدة تحديداً و اكرر شكرى لحضرتك

انا تحت امركم جميعا دة واجب عليا
انا استفدت من نايل موتورز ومن اعضاء نايل موتورز و من حقكم عليا اني انقلكم التجربة بكافة تفاصيلها.

ربنا يقدرني ارد بعض من الافضال اللي كانت عن طريق قرائاتي في المنتدي واستفادتي من تجارب الاعضاء او عن طريق الاتصال المباشر في مواضيع محددة ومنها ماهو خارج مجال السيارات .

اشكر نايل موتورز بجميع اعضاؤة انتم اصحاب الجميل

الموضوع: تقييم الكارينز الجديدة كليا 2014

LinkBack

أدوات الموضوع

عرض

-

-

-

-

-

-

-

المواضيع المتشابهه

رسمياً : هيونداى تعلن عن i10 2014 الجديدة كليا

رسميا بي ام دبليو تكشف عن x5 2014 الجديدة كليا

صور تويوتا كرولا 2014 الجديدة كليا

لوجان 2014 الجديدة كليا

Kia cerato 2014 الصور الرسمية - سيراتو 2014 الجديدة كليا !

الكلمات الدلالية لهذا الموضوع

المفضلات

المفضلات

ضوابط المشاركة