ايه الحل مع الموظفين المرتشين؟

**Ahmed_Adham** · 14-10-2013 02:04 PM

الواحد يعمل ايه مع الموظفين المرتشين؟ أنا تعبت من تكرار الموضوع ده مفيش أي حاجه أعملها في أي مكان مهما كانت بسيطه الا أما الاقي تعقيدات نظام "لبن العصفور" وطبعا لعدم منطقيه الطلبات بيبقى مفهوم انه طلب لرشوه عشان الامور كلها تعدي.

السنه اللي فاتت كنت عايز انقل عداد كهربا الشقه باسمي وأنا أول واحد يسكن في العماره وينقل العداد باسمه رحت الكهربا ومعايا العقد الاصلي عليه صحه توقيع من المحكمه ومعايا التوكيل الاصلي والوصل الاحمر الاصلي بتاع اللوحه من المالك. طلبو مني اتنين من سكان العماره ييجيو ببطايقهم وفاتوره كهربا من كل واحد فيهم عشان يشهدو اني ساكن في العماره والعداد باسمي! طب والورق اللي معايا اللي مصدق بحكم محكمه ده مش كفايه؟ والتوكيل اللي معايا من صاحب الشقه اللي اسمه في الوصل الاحمر؟ طب لما يطلبو اتنين من سكان العماره ييجيو معايا بوصولات كهربا باسمهم أول اتنين دول هينقلو العداد باسمهم ازاي أصلا؟

المهم أيامها واحد دلني على موظف بياخد فلوس ويخلص والموضوع خلص من غير ما أروح الكهربا أصلا!

من ساعه ما سكنت من سنه وشهرين وأنا دايخ على تركيب بوكس تليفون على العماره عشان كل عماره ليها بوكس لوحدها وبيبقى مدفوع تمنه مع ترخيص المباني قبل ما العماره تتبني ومحدش بيرضى يدي خط لحد ومقدم طلب من السنه اللي فاتت وكل ما أروح يقولو لسه مفيش لحد ما في مره أخر رمضان اللي فات قالولي فيه بوكسات واتفق مع حد من الفنيين ييجي معاك يقولك هتحفرو فين والحفر هيبقى على حسابك! اتفقت مع الفني وجه تاني يوم وكان معايا الخريطه (والله كنت حاسس اننا بندور على كنز مش كابل) وحفرنا في المكان اللي قال عليه الفني وملقيناش حاجه وحفرنا لمسافه أطول وعمق اكتر وملقيناش حاجه. طبعا عرفت ان كده البيه عايز فلوس الموضوع لسه معلق لحد دلوقتي.

دلوقتي عايز أعمل عداد ميه منفصل رحت بالاوراق ومشيت في الاجراءات ودفعت مصاريف الصرف وطلعلي واحد يقولي العداد الرئيسي عليه مصاريف انشاءات. طب فيه 2 غيري عملو عدادات منفصله في البيت حد دفع حاجه؟ يقولي لاء الرصيد المدفوع صفر وانتو مدفعتوش حاجه في الانشاءات. طب هما مدفعوش أنا هدفع ليه؟ مليش دعوه هوه كده لو عايز عداد لوحدك تدفع نصيب شقتك من مصاريف الانشاءات. قلتله مش هدفع طالما هما مدفعوش والمهم ان أنا اللي بدفع استهلاك الميه باستمرار ودافعه لأخر فاتوره بما اني أنا الوحيد اللي على عداد العماره العمومي مالي أنا ومال موضوع الانشاءات ده.

طبعا مش محتاج أقول ان المرور بيبقى فيه نفس الكلام وفيه ناس بتدفع وشغلها يخلص في دقايق واللي مبيدفعش بيقضي اليوم كامل هناك عشان يجدد رخصه مفيهاش فحص كمان يعني المفروض تخلص في نص ساعه ولا ساعه بالكتير بس على الاقل بتاخد 5 ساعات وممكن تخلص على يومين!

الواحد دلوقتي يفضل مستسلم للفساد لحد امتى؟ كل ما بندفع بنشجعهم يفسدو أكتر ولو الواحد مدفعش يا اما شغله ميخلصش خالص يا اما ياخد وقت كتير ومشاوير كل شويه رايح جاي وشد وجذب وزعيق مع الموظفين. سكه النيابه الاداريه حبالها طويله. هيه بتجيب نتيجه في الاخر عن تجربه مع ناس معرفه في اكتر من موقف بس حلني على ما الموضوع بيخلص بعد بهدله ومشاوير.

أفيدونا برأيكو ودلوني بتعملو ايه في المواقف دي.

**RAPID** · 14-10-2013 02:43 PM

ربك خلق العالم اجناس
شعوب تحب العلم وتقدس العلماء
شعوب تعشق العمل
شعوب ترفع من قيمة العدل والنظام والنظافة
احنا بقى شعوب تعشق الفساد والكسل والجدل والتخلف
ومفيش امل اننا نتقدم نص لخطوة لقدام اسمع منى انا شفت كتير
مفيش فايدة للاسف هنعيش .......... ونموت ........... !!

**mem** · 14-10-2013 03:07 PM

ربنا يرحمنا برحمته

**ahmedteam** · 14-10-2013 03:08 PM

للاسف مفيش حل كلها منظومه فاسده من اولها لاخرها

يا ريت كل واحد بيدأ بنفسه و يشتغل بضمير يمكن ساعتها ربنا يحلها من عنده

على فكره العيب فينا .......... الشعب هوا اللى عايز يتغير

**lidosasa** · 14-10-2013 03:55 PM

ليس لها حل إلا أن يرحمنا الله برحمته
وخد بالك اللى جى اسواء
جيل كامل من البلطجية فى سن ال 15 وطالع بلا وعى وبلا أخلاق أو دين
زمان كان الموظف المرتشى بيطلع فى الأفلام ونهايته بتبقى وحشة لكن دلوقتى قدوة الأطفال عبده موتة وبيغنوا أغانى للحشيش والبانجو
طب قولى حضرتك لو حبيت تفسح الأسرة الكريمة فى العيد وتدخل سينما حتدخل فيلم ايه ؟؟؟ طب حتروح انهى حديقة عامة ؟؟؟ طب بلاش خالص وحتقعد فى البيت حتلاقى قناة مش بتجيب أفلام وأغانى وحتى إعلانات مسفة وتتكلم فى أمور تخدش الحياء

**Ahmed_Adham** · 14-10-2013 04:09 PM

يا جماعه أنا عامل الموضوع عشان نفكر في الموضوع بايجابيه. لو كلنا قلنا مفيش حل يبقى محدش هيقاوم الفساد ومش من حقنا نشتكي بعد كده. فيه ناس عنيده ومش بتستسلم ودول اللي نفسي أسمع تجاربهم ونستفيد منها. حد قاوم مره؟ حد قوام تاني بعد لاحباط في أول مره؟ ده اللي ندور عليه ونسمع منه.

هل نعرف ناخد قرار مع بعض مندفعش رشوه مهما كان التعب والمشقه؟ ولا هنفضل نستسهل وندفع؟

**saddam** · 14-10-2013 04:40 PM

صديقي المواطن
أنا مش عارف إحنه تاعبين نفسنا ليه مصر لن ينصلح حالها في جيلي وجيلك ممكن على أحفادنا أو أولادنا.لما يحسو أد إيه مصر بقت متخلفة عن الغالم ولما ييجي اليوم اللي الصومال تبقه فيه أحسن من مصر ساعتها حنبتدي نحس ومصر مش حتنفعها الديمقراطية في العشر سنين القادمة ومحتاجين حاكم دكتاتور ولكنه متنور ليهدم مصر ويبنيها على طراز البلدان المتقدمة ويتوسع باﻹعدامات للتخلص من كل شوائب المجتمع
أما المرور فيعلم الله أنا لما عندي حاجة أخلصها في المرور وورقي كله سليم ورسمي ونظامي وكامل أول حاجة أعملها أجري إتصالاتي عشان أشوف مين بيسلك المسائل هناك وياخد فلوس.ويجنبك إنك تتهان واليوم اللي فيه مصلحة في مصر بتخلص من غير فلوس بزعل جدا وبقول أكيد القيامة قربت أو فيه حاجة غلط فتعايش.تعش غير كده حتتعب نفسك عالفاضي قبل كده كلنا كنا زيك عايزين نصلح بلدنا ونقضي عالفساد ولكن وصلنا مرحلة التشبع باليأس وليس اليأس فقط

وبالتوفيق
ودمتم للنضال

**eslamrace** · 14-10-2013 08:44 PM

الحل فى تغيير النظام الادارى
بمعنى جعل الموضوع مش فى ايد موظف واحد يكون فى بدائل والموظف يكون عليه نظام مراقبه الكترونيه بكاميرات فيقلق انه يتصور فى وضع سئ فيبقى عنده مراقبه ذاتيه داخل المؤسسه ويكون فى فكل مؤسسه حكوميه اداره للشكاوى ويكون ليهم سلطه مقاضاه الموظف فى حال ورود اى شكوى او اثبات اخلاله بالنظام من خلال الكاميرات وفى نفس الوقت مقاضاه المواطن اذا ثبت تعديه على الموظف وتصويره برضه كدليل اثبات ده ممكن يكون حل مبدئي .
تحياتى .