وياريت تعملي تست درايف للعربية وتجربيها وتجربي الفرامل كمان ، لأن فى ناس معجبهاش نظام الفرامل فيها لأنها درجات وبتحتاج تعود لو كان معاك عربية كوري او ياباني لأنها مش بتمسك من اللمسات الخفيفة بتهدي بس ودة زي نظام معظم العربيات الأوروبي.
عرض للطباعة
وياريت تعملي تست درايف للعربية وتجربيها وتجربي الفرامل كمان ، لأن فى ناس معجبهاش نظام الفرامل فيها لأنها درجات وبتحتاج تعود لو كان معاك عربية كوري او ياباني لأنها مش بتمسك من اللمسات الخفيفة بتهدي بس ودة زي نظام معظم العربيات الأوروبي.
انا معايا العربية سنتين تقريبا ...العربية كويسه بالنسبه للامكانيات مقابل السعر ...
التوكيل سىء جدا جدا ...
بس كل حاجه متوفره بره التوكيل ..وفكك من الكلام بتاع روح التوكيل عشان تحافظ على العربية ...بالعكس ابعد عن التوكيل عشان متكرهش العربية وده كلام عن تجربة مش سماعى يعنى ...
وفى بردو ميكيانكيه كانو شغلين فيها وزى الفل ....استهلاك البنزين عالى شويه ..بس متنساش المكنة 1600 وسحبها عالى ..
اساسيات العربية تمام لكن سوء الخامات ببعض الاجزاء ..زى اكره بتكسر مثلا... خامات بطانة الابواب مش اد كده ...لكن الطابلوه كويس ...وممكن تتنازل عن بعض العيوب البسيطة مقابل الشكل والاداء عموما ..
الثبات كويس فى السرعات والملفات ....وفى المناورات والغرز هو ده ملعبها ..
افضل الموديلات فى رأى انا هما 2008 ..و 2009 ...وده ممكن يختلف معايا ناس فى الموضوع ده ...بس انا افضل 2008 اكتر
انا معايا منوال ..ومجربتش الاتوماتك ..بس من ناس جربو الاتنين بيقولو المانوال احسن ..فى تجميع السحب و اداء الفرامل ..!!.....
اخيراً وده الاهم ...العربية دى ليها ناسها ...يعنى لازم تكون عايزها وحاببها عشان تجبها .....
عندك حق فعلا بالتعود خاصة انى مسوقتش عربيات قبل كدة وان شاء الله اتعود عليها في كل حاجة
شكرا ليك على الافادة وانا مش يهمني فعلا غير اداء العربية ده اهم سبب ليا ومواصفاتها هى اللى شدتني ليها وشكلها كمان طبعا
أنا معايا بقالها 3 سنين و نصف, غيرت في الضمان:
- ترموستات الكوعة, أول اسبوع من شراء العربية عشان كان معلق و كان العربية بتسخن بسببه.
- طلمبة باور, بعد سنة كده عشان الدركسيون كان بيزيق.
- بلية شداد, بعد سنة و ديه بتبوظ لو جه عليها مياه و بتصفر.
- مانيفولد, بعد سنتين و نصف و ده بيبوظ من السحب الكتير أو السرعات العالية و بيطلع صوت تكتكة, و ده بقي بينزل منه واحد معدل في الموديلات الجديده ابتداء من 2012 اعتقد بخامة أفضل مش بتبوظ من الحرق.
للعلم, باستثناء رقم 1, ال 3 حاجات التانية لا يشكلوا خطر علي العربية و ناس كتير بتتعايش معاهم, بس أنا من النوع الي بيركز في اي تغيير يحصل في العربية و لازم أعالجه.
برغم اني غيرت الحاجات دي في الضمان, الا اني لسه شايف انها من احسن الحاجات الي اشترتها في حياتي, و ماندمتش لحظة اني جبتها.
أنا روحت بيها مطروح مرتين ... والأقصر رايح جاي في يوم واحد ... والعين السخنة كذا مرة ... والسويس ... وراس سدر ... والأسكندرية ثلاث مرات
كل سفرياتي رايح جاي ورا بعض في يوم واحد عدا مطروح لأنها الوحيدة كانت مصيف فكان في فرق بين المرواح والمجي أسبوع ... أما لباقي غالبا شغل فبيكون رايح جاي على طول
وكل سفرياتي بدون توقف نهائي ... مش بحب أقف في أي استراحات على الطريق
كل سفرياتي على سرعة ثابتة بواسطة مثيت السرعة كل ما أمكن 120 كيلومتر / س بحد أقصى وحسب ظروف وسرعة الطريق
استهلاك البنزين في السفر بيوصل على السرعة دي من 270 كيلومتر / 20 لتر بنزين .. لغاية 320 كيلومتر / 20 لتر بنزين حسب اتجاه الريح وسرعتها وطبيعة الطريق .. أحسن استهلاك كان من القاهرة لأسيوط ومن القاهرة للعين السخنة .. وأوحش استهلاك كان من أسيوط للقاهرة
وده معدل فوق الرائع الحمد لله باعتبار إن عربيتي الألتو وهي 800 سي سي أقصى معدل عملته في حياتها كان 350 كيلومتر / 20 لتر
لكن الموضوع بيختلف جوة البلد المعدل بيزيد جامد والمتوسط بتاعه 210 كيلو متر / 20 لتر
كل اللى فات ده حسبة سنة واحدة لأنها موديل 2012
ما شاء الله في المجمل العربية كويسة ... عدا عيوب التقفيل البسيطة وبعض الأصوات الخفيفة اللى ممكن تضايق الواحد في المطبات والنقر والأسفلت الخشن وصوت مروحة التكييف العالي شوية لدرجة ساعات بتضايق
مش هاحكي على الثبات غير بأني كنت أول مرة أمشي على طريق قنا كنت واخد ملفات نجع حمادي بالليل الساعة 2 بعد نص الليل والطريق فاضي تماما على سرعة 100 -110 تقريبا أو أزيد كمان وكانت ممتعة جدا وهي بتاخد الملف والصبح وأنا راجع حسيت قد إيه أنا كنت متهور بعد ما شفت الملفات على حقيقتها في نور النهار وقد إيه إنها خطرة فعلا ومنحنياتها حادة ومن ناحية الجبل والناحية التانية النيل ... والحمد لله ربنا هو الحافظ
الكنبة ورا عندي ... بيرسونا .... بتشيل 3 مرتاحين كويس بفضل الله ... والفرق بينها وبين الجين مش كبير أبدا .. هما 5 سم السقف نازلهم لتحت في الجين عشان قفلة الشنطة لكن عرض الكنبة هو هو
أعتقد كدة دي خلاصة السنة اللى فاتت وربنا يوفقك للأصلح ويحفظنا جميعا
انا مش عارفة اشكركم ازاى بجد
ربنا يكرمكم يارب ان شاء الله
فعلا العربية دي مش واخدة حقها خالص برغم انى كنت مقتنعة بيها وكنت بحطها ضمن مقارنات مع التيجو و الرينو سانديرو
التيجو صيني وفيها اه مميزات كتير بس اتقال ان الجين تو افضل
والسانديرو تحفة السنين بس مفهاش وسائل امان ولا ايموبليزر ولا كماليات تانية موجودة كلها في الجين تو اذن الجين تو افضل منها مقابل ثمنها
شكرا ليك