الموضوع: نظرية المؤامرة في زحام القاهرة

كل ما معاد دخول المدارس و الجامعات بيقرب باحس برعب حقيقي من الزحمة اللي مستنياني في شوارع القاهرة.. السنة اللي فاتت كانت لية تجارب مريرة مع الزحام و ساعتها كتبت النوت دي على الفيس بوك و ساعتها ماكانش لسه معايا العربية.. مش عارفة السنة دي هاعمل ايه.. عموما اسيبكوا دلوقتي مع النوت اللي كتبتها شهر نوفمير السنة اللي فاتت و ربنا يستر على اللي جاي

((بعد ما أخدت في الطريق من الشغل للبيت النهاردة ساعتين و نص، في حين ان الطريق ده ما ياخدلوش تلت ساعة او نص ساعة بالكتير.. فعلا بدأت أعتقد في نظرية المؤامرة بالنسبة لموضوع زحام القاهرة ده.. يعني مش طبيعي ابدا ان مواطن عايز يروح بيته عشان يريح شوية و يبدأ ينتج.. يبدع.. يفكر.. يخترع.. يعمل اي حاجة.. مش طبيعي انه يقدر يعمل اي حاجة من دي و هو واخد 3 ساعات في الطريق.. عشان كده مش بيظهر عندنا مفكرين و لا مخترعين.. عشان كده من ساعة عباس العقاد و مصطفى صادق الرافعي ما ظهرش مفكرين.. عشان كده زويل ما خرجش عالم له وزنه من مصر.. مصر بالمنظر ده صعب تخرج ناس من دي عشان الانسان بيروح بيته مستهلك لا يصلح لعمل شئ غير النووووووووم.

في حد بالتأكيد من مصلحته ان الناس تتلهي في هاتروح بيتها ازاي و هتلاقي لقمتها ازاي.. في حد من مصلحته ان المواطن يرجع بيته منتهى أمله انه ينام له شوية قبل ما يصحى الصبح يتكفي على وشه يروح الشغل و هكذا.. في حد مش من مصلحته ان الناس تروح بيتها بسرعة رايقة مركزة عندها جدول لأعمال بعد الظهر.. ناس مش من مصلحتها ان الناس تفكر بهدوء و روقان بال.. و لا يبدعوا في اي عمل و لا يفكروا في حل لمشكلاتهم.. يعني يبقى كتر خير المواطن اللي زيي لو فتح الكمبيوتر لو روح البيت بعد 3 ساعات في الطريق من الشغل للبيت.. و حتى لو فتح الكمبيوتر مش هايعمل سيرش على مادة علمية او أدبية او حتى دينية.. آخره يفتح الماسينجر و يهيس له شوية مع حد من اللي عنده في اللستة.. زي ما انا باهيس دلوقتي كده بالظبط.. و تصبحوا على خييييييير عشان انا منهكة جدا و لا أصلح حتى لتكملة النوت دي))

المشاركة الأصلية كتبت بواسطة ramyfawzy

انا متفق تماما مع الاخت نهى في العنوان (نظرية المؤامرة)
بس انتم مش متخيلين المشكلة العظيمة والمفاجأة المدوية اللي محضراها الحكومة لينا بعد العيد ودخول المدارس وخلافه
قرار بتصليح كوبري اكتوبر العظييييييييييم تصليحا شاملا متكاملا
يعني من الاخر زي ما انا اقترحت من فترة هنا في المنتدى ان كل واحد فينا يدور على هليكوبتر او منطاد او حتى نحضر روح طائر الرخ الخرافي بتاع زمان (واهو يبقى ميكروباص طائر) عشان نروح اشغالنا او نقضي مشاويرنا
ويعني من الاخر ممكن ناخد عنوان احد البرامج التليفيزيونية الشهيرة ونطبقه :
خلليك بالبيت
و ............................ز
كفاية كده لحسن الفطار كبس على نفسي ومش قادر اكمل
ويجعله عامر

رامي ( ابو احمد و يوسف)

إنت متأكد من موضوع تصليح كوبرى أكتوبر دا !!!!

دى تبقى كارثة حقيقة لو فعلا حيقفلوا الكوبرى