gen 2 هتجننى شكلها تحفة بجد مش شبه العربيات التانية

**colaman** · 19-10-2013 01:30 AM

ياجماعة باختصار انا عاوز اركب العربية دى بس خايف من التجربة انا اخر عربية معايا رينو كليو 1400 عربية جميلة بس عاوز اغير ومعنديش استعداد اركب فيرنا ولا لانوس خلاص انا عجبنى شكل العربية الجين 2 والاوبشنز والسعر فياريت يا جماعة تنصحونى بايه خصوصا انى اخر ما هزهق هركب ميجان بس انا الجين شكلها احلى بالنسبة لية ياريت حد يرد على استفساراتى دى :
1- هل الموديلات كلها واحد من 2006 لحد الان وايه افضلهم بالنسبة للمانيوال .
2- اسعار قطع الغيار وهل فى سكة برة التوكيل ولا لازم التوكيل عشان انا فى الرينو بصراحة كنت اعرف ميكانيكى كان شغال فى التوكيل وشاطر جدا ومعاه اللاب توب واكنك فى مركز صيانة بس من غير فشخ .
3- اسعار العربية دى نيو كان كام عشان انا شايف الناس مستهبة اوى يعنى فى ناس بتطلب فى 2010 - 80 الف ليه يعنى وانا على ما اتذكر ان العربية دى كانت ب90 الف جديدة
4 - سمعت ان العربية اغلب عيوبها تقفيل وفى خامات رديئة فى تابلوه العربية واجزاء من تبطين الابواب وكده ده غير ان العزل فيها مش اد كده وصوت الماتور عالى اوى وان العربية فى المدن والسرعات البطيئة تخنق وحوت بنزين هل ده صحيح ( خصوصا ان الرينو اللى معايا كانت عكس كده تماما عزل كويس جدا صوت واطى خامات التابلوه والصالون جيدة جدا ) .
يا جماعة عاوز الردود وبكل امانه من غير تحيز ربنا يكرمكم وكل اللى عنده معلومة يا ريت يفيدنى

**eng.m7md.ali** · 19-10-2013 01:53 AM

اهدي بس اهدي ابوس ايدك :))

بص ياسيدي

الموديلات من 2006 لحد 2008 متشابهة في كل حاجة .. الاختلاف بيبتدي من 2009 لحد 2011 ومن 2011 لحد الان

من 2006-2008 كانت بتنزل سبورت باكج وعادي وفيها ساعة في التابلوه والعدادات كانت بتبدأ من 10-30-50 لحد 230 .. عكس دلوقتي بقت 20-40-60 لحد 240 .. كمان كان فيها مثبت سرعة مع الاوتوماتك وجراب نضارة فوق السواق
من 2009-2011 تم تعديل حاجات في الموتور عشان السحب يبقى احسن على الrpm الواطي خصوصاً مع التكييف .. وشالو الساعة من التابلوه :( .. وشالوو مثبت السرعة وجراب النضارة
اما من 2012 لحد دلوقتي الاختلاف بينها وبين 2009 في الفوانيس الخلفية بس .. دلوقتي بتنزل led

اسعار قطع الغيار انا اكتشفت انها ارخص بكتير من عربيات كتيرة زي الالنترا . لانسر بوما . كيا سيراتو .. وعربيات تانية كتير "طبعاً في بعض الاجزاء" .. القطع متوفرة في التوكيل وفي مستوردين سواء مستعمل استيراد او جديد

الاسعار طبيعي انها تعلى مع ارتفاع الاسعار دلوقتي .. يعني مثلا عربيتي واجا موديل 2009 كانت السنة اللي فاتت جايبة 65 الف .. دلوقتي جايبة 73 الف ومش عايز ابيع بردو .. سعر العربية دلوقتي 110 الف للاوتو و 104 الف للمانوال

التقفيل مش حلو اوي ولا الخامات . بس احسن من البريليانس مثلا والاسبرانزا والحاجات دي .. العزل مش حلو للاسف وصوت الموتور بيبقى عالي لو الهيدر مشروخ وللاسف اكتر من 80% من البروتون في مصر عندهم المشكلة دي بسبب ان خامته ضعيفة ومع السخونية والسرعات بيتشرخ بسهولة
استهلاك البنزين عالي فعلا عن عربيات كتير 1600 سي سي بس على الطرق السريعة هيبقى متشابه مع العربيات دي

**DESIGNER105** · 19-10-2013 01:54 AM

انا معايا العربية سنتين تقريبا ...العربية كويسه بالنسبه للامكانيات مقابل السعر ...
التوكيل سىء جدا جدا ...

بس كل حاجه متوفره بره التوكيل ..وفكك من الكلام بتاع روح التوكيل عشان تحافظ على العربية ...بالعكس ابعد عن التوكيل عشان متكرهش العربية وده كلام عن تجربة مش سماعى يعنى ...

وفى بردو ميكيانكيه كانو شغلين فيها وزى الفل ....استهلاك البنزين عالى شويه ..بس متنساش المكنة 1600 وسحبها عالى ..

اساسيات العربية تمام لكن سوء الخامات ببعض الاجزاء ..زى اكره بتكسر مثلا... خامات بطانة الابواب مش اد كده ...لكن الطابلوه كويس ...وممكن تتنازل عن بعض العيوب البسيطة مقابل الشكل والاداء عموما ..

الثبات كويس فى السرعات والملفات ....وفى المناورات والغرز هو ده ملعبها ..

افضل الموديلات فى رأى انا هما 2008 ..و 2009 ...وده ممكن يختلف معايا ناس فى الموضوع ده ...بس انا افضل 2008 اكتر

انا معايا منوال ..ومجربتش الاتوماتك ..بس من ناس جربو الاتنين بيقولو المانوال احسن ..فى تجميع السحب و اداء الفرامل ..!!.....

اخيراً وده الاهم ...العربية دى ليها ناسها ...يعنى لازم تكون عايزها وحاببها عشان تجبها .....

**colaman** · 19-10-2013 11:19 AM

يا جماعة يعنى اتكل على الله واشتريها ولا ترشحولى حاجة تانية احسن بس هى كشكل عجبانى جدا وكموضوع الثبات والمناروات وكده ده عين العقل بالنسبة ليا عشان انا من غير ما بحس بلاقينى جايب 120 و150 جوة القاهرة رجلى تقيلة شوية وعلى طول مستعجل حتى لو مش ورايا حاجة

**abou-yahia** · 19-10-2013 11:34 AM

بص من واحد محب للبروتون

لو سواقتك طابعها رياضي في الاغلب

توكل علي الله وهاتها

غير كده مش حتحبها اوي

لاكن مازالت قيمه مقابل سعر ممتازه

**colaman** · 20-10-2013 08:36 PM

طب يا جماعة اللى معاه نمرة ميكانيكى ابن حلال شغال فيها يقولى عليه وياريت يدينى تليفونه عشان ده بالنسبة لية حاجة مهمة قبل ما اجيب العربية بس يكون شاطر

**Al-Farooq** · 20-10-2013 08:54 PM

بالنسبة ليا انا بتعامل مع التوكيل حتي اللحظة فمعنديش فكرة عن ميكانيكية

على العموم العنوان دة لقيته

مركز proton house للصيانة
اوتوستراد المعادي مساكن صقر قريش 163 أ من المدخل البطئ للطريق .

**ahmedesmat1987** · 20-10-2013 09:07 PM

المشاركة الأصلية كتبت بواسطة colaman

يا جماعة يعنى اتكل على الله واشتريها ولا ترشحولى حاجة تانية احسن بس هى كشكل عجبانى جدا وكموضوع الثبات والمناروات وكده ده عين العقل بالنسبة ليا عشان انا من غير ما بحس بلاقينى جايب 120 و150 جوة القاهرة رجلى تقيلة شوية وعلى طول مستعجل حتى لو مش ورايا حاجة

زى ما تكون بتكلمنى عن نفسى بالظبط اموووووووووووووووووت واعرف ايه اللى ورايا ومخلينى مستعجل على طول .....هههههههههه