المشاركة الأصلية كتبت بواسطة mdaly1975
السلام عليكم ورحمة الله ويركاته ، فى البداية أشكركم جميعا ، أنا الحمدلله رخصت يوم التلات والحمدلله
كانت سهله ، وبستخدمها من يوم التلات لحد دلوقتى حوالى 3 أيام وقطعت 250 كيلو على طرق داخليه
فى القاهره وطرق خارجيه سريعه .
انطباعى دلوقتى بعد الاستخدام مقارنه بعربيتى الفيرنا كالتالى :
1- القعده داخل العربيه مريحه جدا وعاليه كأنك قاعد على الكنبه فى البيت على عكس الفيرنا تحس انك قاعد على اﻷرض
2- العفشه أحسن من الفيرنا بكتير مبتحسش بالاهتزازات جامد مع اننى مشيت على نفس الطرق اللى بقطعها بشكل يومى ويمكن ده ﻷن العربيه أبعادها أكبر وأتقل .
3- النقله اﻷولى والتانيه بتحس انها مخنوقه ومش قويه ذى موتور الفيرنا dohc twin cam 1600 cc وبصراحة النقطة دى مضايقانى شويه وبحاول أتعود عليها ومش عارف دى مشكلة المواتير
الكامه الواحده ولا ايه ؟ ولا ده تصميم الموتور . بس هو بصراحه من النقله التالته بيرمح جامد ويمكن بيتفوق على موتور الفيرنا 1600 cc ده غير أن صوته واطى وهادى جدا عن موتور الفيرنا .
4- واضح جدا أن موتورها اقتصادى جدا فى استهلاك البنزين مقارنه بالفيرنا ﻷن مؤشر البنزين تقريبا متهزش من مكانه بعد المسافه اللى قطعتها دى ، لكن من السابق ﻷوانه الحكم على ذلك الا بعد التليين .
ملحوظه : انا بنقل المقارنات دى بكل مصداقيه وبدون أى تجميل علشان أفيد الزملاء اللى بيفكروا يشتروا
مع العلم اننى لست متخصص فى مجال السيارات أو الميكانيكا وخلافه أنا مجرد مستخدم عادى للسيارات لمدة 19 عام واستخدمت عدة سيارات خلال تلك الفتره .
وبالنسبه لورق الضمان والصيانه أنا سلمت صورة الرخصه للمعرض بعد الترخيص علشان يفعلوا الضمان
ويسلمونى الورق بس لسه لحد دلوقتى الورق مجاش وبصراحه أنا اضطريت أكلم أبو الفتوح وأحجز من دلوقتى لصيانة الالف يوم السبت اللى بعد الجاى علشان أضمن الحجز قبل لما أتخطى الالف كيلو على أمل ان الورق يوصل قبلها .
انطباعى الحالى عن العربيه أنها قيمة جيده جدا بالنسبه للتمن المدفوع فيها والتجهيزات اللى فيها بغض النظر عن موضوع الموتور اللى مش عاجبنى ﻷنك لو قارنت الكماليات دى مع عربيه كورى مماثله موتورها محترم حتلاقى انك محتاج 40 أو خمسين الف فوق تمنها علشان كده أنا شايف انها صفقه رابحه وبالنسبه لموضوع الموتور هى مسألة تعود ونمط سواقه لكل واحد فينا .
أنا جربت موضوع الضغطة الطويله على زرار الشنطة اللى فى الريموت وفعلا فتحت الحمدلله :tumb:
وراجعت كل الانوار النهارده بليل والحمدلله كله شغال ، يعنى لحد دلوقتى مفيش مشاكل الا لمبة ال
check engine وربنا يسهل .
أه على فكره وانا بحجز معاد الصيانه بالتليفون الموظفه أول لما قلتلها صيانة الف كيلو انفى سألتنى عندك مشاكل قلتلها ﻷ قالتلى علطول وايه رأيك فى العربيه دى قلتها لحد دلوقتى كويسه . سؤال غريب من موظفه مختصه بحجز الصيانه ، ياترى وراة ايه ؟ هل فى مشاكل وناس كتير اشتكت ؟ على العموم ده سؤال سابق ﻷوانه وحيبان لما أروح الصيانه وأسمع أراء الناس .
أشوفكم على خير انشاءالله وتصبحوا على خير وسأبلغكم بكل جديد .
:tumb: :tumb: