الموضوع: وأخيرا استلمت الانفى النهارده

الى ألأخوه الأعزاء بعد التحيه ،
ذهبت الى المعرض صباح اليوم مبكرا الساعه 10 أنا وواحد صاحبى لقينا المعرض لسه بيجيب العربيات من المخزن بعد العيد وبيفتح والمندوب قاللى نص ساعه والعربيه تيجى من المخزن ، المهم قلنا نتسلى شويه ونتفرج على شوية العربيات المعروضة لحد لما العربيه توصل .
بصراحه أكتر عربيه بهرتنى أنا وصاحبى الكورولا الجديده هاى لاين - العربيه دى تحفه من جوة
المهم عربيتى وصلت بترابها وفحصتها كويس الحمدلله كله تمام الاستبن والكوريك ومفتاح العجل وشنطة المثلث والطقطوقه والولاعه والاريال والكتلوجات في التابلوه .
بس طبعا حسيت بالصدمه بينها وبين الكورولا الهاى لاين ..... الحمدلله على كل حال ربنا يرزقنا جميعا باذن الله ونجيب كلنا اللى نفسنا فيه .
لفت نظرى أن العداد عامل 454 كيلو بصراحه أنا اتضايقت شويه ولما رجعت للمندوب قاللى معلش أصل الاسبرانزا الانفى بيجى مسافر من اسكندريه مع سواقين .
بصراحه مكانش أدامى غير أصدقه لأن مفيش انفى دلوقتى هاى لاين في السوق خالص وبالسعر التحفه ده . المهم رحت دفعت وكملت الاجراءات طيب فين الورق بتاع العربيه يافلان .
لأ معلش استنى يوم ولا اتنين كده لأن الورق جاى مسافر من محافظة تانيه مع واحد سواق .
قلت حاضر بس للأسف حضطر أركنها كام يوم لغاية لما الورق يوصل .
أول لما قعدت في العربيه علشان أتحرك بيها لفت نظرى لمبة البنزين منورة والمؤشر على ألأحمر
ولمبة الـ check engine منورة من أولها كده ، قلت لنفسى طيب أنا هربت من عفريت الامجراند يقوم يطلعلى هنا ههههههههههه .
بداية التحرك بالسياره الموتور ناعم وسلس جدا ويكاد يشابة موتور الفيرنا 1500 الى حد كبير
واتأكدت لما جريت علية شويه ووصلت لسرعة 80 حسيت انه أضعف فعلا من بتاع الفيرنا 1600 لكن عموما الموتور مقبول ومتناسب مع البودى بتاع العربيه والنقطة دى بالذات كانت مخوفانى لكن الحمدلله الانطباع ألأول كويس .
تانى اختبار كنت أحب اعملة مع العربيات التجميع المحلى وكنت دايما بطلع فيها عيوب ، اننى أقفل كل الشبابيك وطبعا ألأبواب والراديو وأسمع أى ضجيج صادر من ألأبواب ، الشبابيك ،
الزجاج .... الحمدلله مفيش أى صوت طالع وده يأكد على جودة التقفيل المستورد بجداره لأن بصراحه كان ليا تجربتين قبل كده مع عربيتين تجميع محلى ضايقونى جدا وقعدت أروح التوكيل أظبط فيهم وطبعا بعد تعذيب تم التغلب على بعض ألأصوات .
العفشه ممتازه يمكن مشابهه للانترا لحد لما دوست على عيون القط وبعض انبعاجات الأسفلت حسيت انها ناشفه شويه ، ومش عارف ده عيب ولا ميزه بصراحه ويمكن يختفى لما أمشى بيها شويه ، لكن عموما واضح أن العفشه جيده جدا ، وغير موضوع النشفان ده مليش تعليق عليها .
ويمكن تكون ناشفه علشان نوع الكاوتش وهو بصراحه ماركه غريبه اسمها linglom أو حاجه ذى كده مش متذكر بصراحه .
المهم الطريق كان زحمه في مدينة نصر عند طريق النصر وبالقرب من ميدان رابعه وجامعة الازهر كان في مسيرات ومناوشات والطريق زحمه وواقف والعربيات بتلف وترجع عكس الاتجاة وأنا حاطت ايدى على قلبى وخايف البنزين يقطع وأعطل وسط الزحمه .
قعدت أجرب كل الزراير والسى دى والـ USB والزجاج الكهرباء لقيت فيه حاجه جميله أوى بينزل للأخر بلمسه واحده خفيفه بالنسبه للأربعه على عكس الفيرنا كان زجاج السائق بس وكان لازم تضغطه جامد لجوه . الحمدلله كله شغال ومفيش مشاكل .
قعدت حوالى ساعه في الزحمه قلت طيب حجرب التكييف وجربته الحمدلله كويس وطفيته علشان محملش على الموتور في الأول .
الطريق كان وحش جدا وأخيرا وصلت للتجمع وعند أول محطة بنزين فاولت التانك أخدت ب 96 جنيه بنزين .
كله تمام الا لمبة الـ Check engine مش عايزه تطفى ودى بس اللى ضايقتنى ، غطيت العربيه وطلعت البيت أتصفح الكتالوج .
أولا الكتالوج بالانجليزى بس و مكتوب عليه Chery وبالمناسبه العتب بتاع العربيه كمان مكتوب عليه chery. مفيش كلمة اسبرانزا دى خالص الا على شنطة العربيه ورا .
أدور في الكتالوج الانجليزى الاقى أن لمبة الـ check engine دى سببها كالتالى :
It indicates that the engine control system may be unstable or the exhaust gas does not comply with specified standards
أعتقد والله أعلم أن البنزين بتاعنا في مصر غير مطابق للمواصفات وعلشان كده اللمبه بتنور وأعتقد دى أكيد ليها حل في التوكيل .
أنا وصلت البيت والعداد قارى 479 كم وده انطباعى عنها وأنا عامل بيها حوالى 25 كم للوهله ألأولى.
في صور كنت عايز أنزلها للعداد واللمض والكتالوج بس مش عارف أنزلها مش عارف في ايه ؟؟
وإن شاء الله بعد لما أرخص كمان يومين سأوفيكم بالجديد لما أبدأ أستخدمها بشكل فعلى .
حاجه تانيه كمان نسيت أقولها أنا حسيت أن قعدتها أريح واحلى من ال 516 بكتير وتحس انها عربيه أصغر من الـ 516 ، مش عارف ليه مع انها تقريبا نفس الأبعاد يمكن التابلو بيدى الاحساس ده .... مش عارف ؟؟؟؟؟
لكن الحمدلله أنا راضى عنها تماما وحاسس انها كانت قرار صائب
وسأوفيكم بالمزيد قريبا باذن الله ،، والسلام عليكم