رايي في البيكانتو بعد 11000
اولا هي كيا بيكانتو خليجي موديل 2012 وكنت شاريها من سمير ريان في شهر واحد من سنه 2013 وذلك بعد قراء وسماع تقييمات كثيره عن السياره والبركه هنا ايضا بمنتدانا ده
المواصفات هي مانيوال اثنين زجاج كهرباء ايرباج جنوط اسبور فوج لايت والكاسيت بتاع العربيه من الطابلوه نفسه والتكييف تتاتش وامكانيه تحريك كرسي السائق لاعلي او لاسفل ويوجد طبعا كمبيوتر الرحلات وايضا حساب درجه حراره الجو اللون فانيليا وانا من رايي هو من اجمل الالوان عليها هو والازرق تحفه وفضلتها وقتها عن الخليجي نظرا للتجهيزات السابقه اللي مش موجوده في الوكيل للاسف وكان وقتها سعرها اقل من الوكيل كمان .
اولا السياره سعه الوقود 35 لتر بالزور كمان خمسه لتر يبقي المجموع 40 لتر دول بقي يمشوك لو التفويله بس 35 لتر تعمل 490 كيلو في الزحمه وبصراحه لسه ماسفرتش بيها عشان اقولكم علي الطريق السفر تعمل قد ايه بس اكيد هتزيد .
العربيه عزلها حوالي 70 ٪ يعني مش وحش بالنسبه لفئتها وهي مش بتحتك بالمطبات حتي مع الحموله والحمدلله
يتميز صالونها بالشياكه وبمجرد ما دخلت جوه العربيه تحس انها كبرت المساحه للركاب تحفه سواء للي وراه او قدام التكييف اداءه لطيف وكل ما بتمشي بيشد اكثر والوقفه في الزحمه بيقل ادءه شويه . وبالنسبه للتسارع فالموتور قوي لانه متناسب مع حجم العربيه فبيدي اداء تحفه ومع التكييف لازم ياخد من عزم الموتور شويه لكن الطبيعي والحمدلله
كان اساس اختياري للعربيه انها تكون عمليه بحجمهاو بنزينها بعد الزحمه والغلاء اللي بقينا فيه ولا انكر ان عبده كيا ابدع في تصميم العربيه ده لا انكر ان العربيه ده فيها سحر غريب لدرجه انها بتوحشني لما بكون بعيد عنها ❤️