تجربه سنه مع Osram night breaker

**Hesham.H** · 21-10-2013 12:16 AM

كل عام وأنتم بخير

لفت نظرى موضوع لزميل لينا بيسأل عن تركيب الكتاوت و ضعف النور وعشان أنا أخدت شوط حلو جدا فى الحاجات دى حبيت أعمل الموضوع ده لتعم الفائده إن شاء الله على الجميع

أولا تركيب الكتاوت حاجه كويسه طبعا ومش مضره طالما ركب بالشكل والخامات الصحيحه وركبه صنيعى كويس
ونصيحتى فى الموضوع ده هو إننا نجيب نوع كتاوت ( cut out ) كويس وياريت لو ألمانى وده مش غالى الحمد لله
وطبعا لازم نستخدم نوعيه سلك كويسه ومش أقل من ٦ ملى عشان يدينا الكفاءه اللى بندور عليها

اللى أهم من الكتاوت هو اللمبه ... ولأنى طبعا سلمت نفسى قبل كده لوهم اللمبات واللى مكتوب عليها ١٠٠ وات وغيره واللى ألمانى واللى مجرى وخلافه
وكل هذه أوهام يا ولدى ... من الآخر مفيش غير اللمبه الماركه المحترمه حتى ولو كانت وات قليل وده اللى هاتكلم عنه النهارده بأمر الله

من سنه وبعد تجربه أكثر من ٤ أطقم لمبات توكلت على الله وجبت osram night breaker

وطبعا حضراتكو عارفين ان الفكترا بى ٢ فيها أربع لمبات H7 اتنين واطى واتنين عالى

ودى شكل اللمبه osram night breaker ال H7

بصراحه اللمبه دى رغم انها ٥٥ وات إلا إنها فعلا ذات كفاءه عاليه ونورها قوى وبتفرش على الأرض كويس .. ومع تجربه اكتر من صنف تانى ١٠٠ وات اللمبه دى تكسب بجداره
ورغم انى مركب كتاوت عندى بس هو زى قلته لانه راكب بسلوك ٢ و ٣ ملى لأن ساعتها ما كنتش أعرف معلومه إنه لازم سلك محمل مش أقل من ٦ ملى وان شاء الله هاغير ضفيره الكتاوت لما أفضى

ودى صوره من عربيتى للنور الواطى

طبعا أنا بنصح أى حد هايغير الفوانيس بتاعه عربيته إنه يجيب الأصلى إستيراد ويكون نضيف ... لأن بصراحه مافيش أنضف من الفانوس الأصلى مهما كان نوع التقليد اللى زيه

وده النور العالى من عندى برضو

على فكره أنا عندى بكره مستوى النور على ٢ يعنى ممكن يعلى كمان درجتين .. بس أنا مخليه واطى عشان مايتعبش اللى بيقابلنى فى الطريق ... وبجد ٩٠٪ من اللى بيقابلنى بيقلبى نور على أساس إنى منور العالى ... وساعات من إعتقاده ان ده العالى بتاعى بيروح ضارب العالى فى وشى ... بس لما برعشله بس بالعالى بيرجع فى كلامه بسرعه ولله الحمد

حبيت أنقل التجربه دى لحضراتكو ممكن تفيد حد يكون محتاج للمعلومه دى ... ونصيحه أخيره بلاش نبالغ فى الأنوار ونخليها مبهره بشكل مبالغ فيه عشان ممكن تتسبب فى مشكله لشخص تانى نظره ضعيف أو جديد فى السواقه وممكن لا قدر الله تبقى مشكله له ولينا وربنا يكفينا جميعا الشر
تحياتى

**tananybasha** · 21-10-2013 12:31 AM

ما شاء الله
انا مركب من 5 سنين لمبات المانى اعتقد انها فيلبس
اصلى نسيت
لسه لمبة محروق الواطى بتاعها النهارده
بس كتر خير الدنيا

**Abdo Taha** · 21-10-2013 12:31 AM

تقرير رائع تسلم يا باشا ، بس كنت عاوز اسأل كام سؤال بعد اذنك ، هل كفاءة اللمض دي زي الزينون و لا الزينون افضل ، تاني حاجة حضرتك جبتهم بكام و هل ال osram فيه منه مضروب و لا اصلي و الواحد ما يخافش و هو بيشتريه سواء اللمض العادية او ال Night breaker او ال Xenon ؟

**احمد فهمى** · 21-10-2013 12:56 AM

لمبات هايله وموجودين عند محل المدينه جنب السجان فى شارع دمشق كنت مركبهم فى الفيكترا اسطوره وحاليا فى النيسان اسطوره الاتش 7 ب180 والاتش 1 ب125 واصلى مش مضروب والاتش 11 للشبوره فى النيسان ب200 واللمبات بجد ملهمش حل ولا زينون ولا غيرو