تقييم تجربة قيادة اكسنت ار بي 2014

**mahmoudahmed** · 21-10-2013 02:17 AM

بسم الله الرحمن الرحيم

انا مقيم في دبي..وناوي اشتري عربية جديدة.. ميزانيتي من45 ل 50 الف..بالمبلغ ده في ادامي نيسان صني وكيا ريو وهيونداي اكسنت ولانسر بومة وشيفروليه سونيك..كان اقرب اختيار ليا هو اكسنت ار بي..بيسموها هنا Accent Blue .. بعد مدة معاناه من استخراج الرخصة لقيت بالصدفة جنب الشغل بتاعي مكتب تاجير سيارات كلهم تقريبا اكسنت..بكلمهم وانا مش ف دماغي قاللي موجود عربية لسه عاملة 400 كيلو موديل (العربيه بكيسها) 2014 .. قلت كويس اجرت العربية 5 ايام عشان احكم عليها وقطعت بيها حوالي 700 كيلو وحبيت اقولكو انطباعي عنها واتمنى اللي ليهم خبرة يشاركوني بخبرتهم في التقييم:
اولا: العربية بالنسبة للمساحة الداخلية كويسة ومعقولة (انا مقعدتش ورا خالص)
ثانيا: شكل التابلو والعدادات حلو بالنسبالي
ثالثا: التكيف كويس اوي لكنه مش ثلاجة بالمقارنه مع التويوتا
رابعا: كنت قريت مشكلة المساعدين اللي ورا واللي بيخليها تتنطط وبصراحة محستش بالتنطيط ده خالص...مش عارف يمكن عشان الشوارع اللي في الامارات كويسة
خامسا: صوت الموتو هادئ و العزل ممتاز جدا بالمقارنة مع لانسر بوما 2007 اللي سوقتها كتير في مصر لانها كانت مع اخويا
سادسا: النقلات في الفتيس الاوتوماتيك اربع سرعات كويس لكن جير الانسر افضل
سابعا: دايما كنت بسمع ان الموتور ده صارووخ والتسارع ممتاز..لكن مش عارف ليه محستش بده يمكن لان العربية لسه جديدة بتليين يعني الله اعلم..لكن تسارع الانسر بومة والله شايفه افضل
ثامنا: وده النقطة القاضية والفاصلة ودايقني اوي ان العربية خفيفة اوي اوي وده حاسه من اول مابركب وهي واقفه وانا باقفل الباب وع السرعات الهادية اوي كمان...حاسس انها عربية خفيفة اوي مش ماسكة نفسها (مش بتكلم ع الثبات وانما بتكلم ع الركوبة) يعني حتى صوت الباب وهو بيتقفل مش ولا بد..عكس كل العربيات اللي سوقتها زي لانسر 2007 و ميجان 2005 وبيجو 307 2003 ونيسان تيدا 2008 (كلهم تاجير ماعدا اللانسر والميجان)

الخلاصة بعد ماكنت حاطط العربية ده في دماغي لكذا سبب: السعر واعادة البيع هنا وفي مصر و اقل سعر الجمرك...لاقيت اني مش مطمن للعربية ده (مع اني كنت مبسوط وانا بسوقها) ود خلاني اتردد في قرار شرائها وفي نفس الوقت العربيات التانية الصني شكلها غبي اوي اوي وبرده خفيفة اوي لاني كنت بسوقها في مدرسة تعليم القيادة في دبي..والسونيك تقريبا مالهاش سوق ف مصر لو حبيت انزل بيها بعد كده ..والريو معتقدش هتفرق كتير عن الاكسنت بما انهم الاتنين نفس الشركة...ويبقى الاختيار الرابح في وجهة نظري لقرار الشراء لاسباب المذكورة هي لانسر بومة بس مش عارف اخر موديل لها في دبي كان 2013 مش عارف نزل منها 2014 ولا لا..وف نفس الوقت البوما برغم انها كسيارة في وجهة نظري زي ما بنقول ركوبتها افضل من الار بي الا اني برده حاسس انها قديمة وعفا عليها الزمن وده برده مدايقني..

ياريت اللي جرب الاربي يقول رايه فيها مقارنة بعربيات تانية وهل حد حس بخفية العربية كركوبة للدرجة اللي انا حاسسها وهل ده عيب يقفلني عنها ولا ممكن التغاضي عنه؟

**toty_305** · 21-10-2013 02:29 PM

-قفلت منها متجبهاش بس يا ترى عندك 1400cc زي السعودية ولا في 1600cc

**2CODE** · 21-10-2013 03:09 PM

الريو حاجة والاكسنت حاجة تاني خالص مين قالك الاتنين اخوات ؟؟؟؟؟؟؟؟؟؟

الشاسية مختلف يبقى ازاي العربية زيها !!!!!!!!!!!!
كيا غير هيوانداي نهائياً لعلمك دي بتعمل عربيات ودي بتعمل عربيات كل واحد بيحافظ على هيئته المختلفة عن التاني

انا معايا BMW X1 Sport 2014 يعني متقوليش تويوتا ولا لانسر ولا اي كلام من اللي سوقته ده ومعايا الريو وبصراحة لغاية ما قبل ما ابيعها وهي من احسن العربيات اللي سوقتها طبعاً قبل الـBMW

انصحك بتجربتها على الطبيعة !!!!!!!!

**toty_305** · 21-10-2013 05:26 PM

-يا أستاذ 2CODE راجع معلوماتك
The third generation Kia Rio debuted on March 1, 2011, at the Geneva Motor Show, again based on the Hyundai Accent and featuring a 1.4 L or 1.6 L Hyundai GDI Gamma engine
(reference: Kia Rio wiki)
طبعا هنقول معندناش GDI تمام بس ده الفرق الوحيد الشاسيه والتعليق واحد ولو في فرق يبقى الريو أقل لانها 1400CC و الاكسنت 1600C

**toty_305** · 21-10-2013 05:32 PM

-يا ريت تراجع أرقام السيارتين WheelBase 2.570mm في العربيتين

-فرق ال Width , Height ده فرق Shape مش أكتر

**S O P H O S** · 21-10-2013 06:03 PM

تقيم محدد
فبعض النقط بس الي مستغرب منها

**2CODE** · 21-10-2013 07:58 PM

المشاركة الأصلية كتبت بواسطة toty_305

-يا أستاذ 2CODE راجع معلوماتك
The third generation Kia Rio debuted on March 1, 2011, at the Geneva Motor Show, again based on the Hyundai Accent and featuring a 1.4 L or 1.6 L Hyundai GDI Gamma engine
(reference: Kia Rio wiki)
طبعا هنقول معندناش GDI تمام بس ده الفرق الوحيد الشاسيه والتعليق واحد ولو في فرق يبقى الريو أقل لانها 1400CC و الاكسنت 1600C

مين قال ان التعليق واحد والشاسية !!!!!!!!!! ماتشوف وقت الاعلان عن نظام التعليق الجديد المعتمد في النيو سيراتو والنيو ريو ؟؟؟؟؟؟؟
التعليق اللي في الريو ده جديد وراكب في الريو والسيراتو الشكل الجديد بس

شوف موضوع الاعلان عن العربية في المعارض برا

كيا وهيوانداي بيتبادلوا حاجة واحده بس (المحركاااااااااااااااات) غير كده كل شئ مختلف وعلشان كده كل عربية بتتبني على التانية يعني تلاقي السيراتو يقول لك النترا لانهم بيتبادلوا حاجات بينهم وبين بعض لكن مش نفس الشاسية ومش نفس الخامات دي مصانع ودي مصانع تاني !!!!!!!

خامات مختلفة - مواصفات مختلفة - فرامل مختلفة كل حاجة مختلفة لان كل شركة عندها مهندسينها المنفصلين عن التانية

والاكسنت معروفة بمشكلة التعليق الخلفي اللي الكل بيلاحظها - طيب ليه مش بنلاحظها في الريو طالما زي ما انت بتقول الاتنين واحد !!!!!!!!!!!

راجع بس انت الاعلان عن الريو الشكل الجديد وهم بيعرضوا نظام التعليق الخلفي والتصميم الجديد للـTorsion Beam

**toty_305** · 21-10-2013 08:27 PM

-أنت صح

**Samir Elshahawy** · 21-10-2013 09:15 PM

أنا متفق مع أخونا اللي قالك تجرب الريو , مش هاتخسر حاجة و أنا شخصيا بأفضلها عن الاكسنت أر بي

بالتجربة العملية و النهاردة تحديدا كنت راجع من السويس ز طبعا مش هأقول لك طريق السويس / القاهرة عامل أزاي
- مطبات هوا
- تموجات حادة في الطريق
- رياح شديدة
- منحنيات مالهاش لازمة
- بالاضافة الي الحفر و النقر

و طبعا كنت ماشي 140 كم/س و كان فيه أكسنت أر بي بيحاول يشد معايا لكن طبعا كنت منفض له كان بيعدي مني في الطريق المفتوح لكن أول ماكنا بندخل علي ملف أو حته بايظة من الطريق كنت بأعدي منه مما يعني أن أحساسه بثبات العربية في الضياع

الريو أعتقد هاتكون أفضل في موضوع الثبات بالاضافة لشكلها الجميل و كمالياتها ووسائل الامان

و ربنا يوفقك في الاختيار النهائي

**SAMEH_FOUAD** · 21-10-2013 10:59 PM

الريو والله كنت راكبها ماشى 60 حساس انى ماشى 140 كم , صاحبى نفسة مضايق منها جداااااا , بسبب الموضوع دة , وكمان حاجة صاحب الموضوع نسى يعرضها وهية الفرامل ( ضعيفة وغير مناسبة تماما لسرعة السيارة )