الموضوع: الشعب المصري شعب متدين بطبعه :(

طيب انا ليا رأى فى موضوع الاخلاق ده كنت قلته فى موضوع تانى ممكن انقله واكمل عليه جزئيه صغيره

المشاركة الأصلية كتبت بواسطة eslamrace

طيب الاول ممكن نقول ان باعث الاخلاق واللى منها اداب الحوار وتقبل الاخر ممكن يكون
*دينى وده ارقى باعث للى يفهمه صح
*او باعث الضمير وده باعث فطري موجود عند كل الناس بس بيضعف تأثيره بسبب عوامل سواء تعليميه او اجتماعه
*او باعث قانونى بمعنى ان فرض القانون بيخللى الجميع يكون عندهم اخلاق مجبرين عليها وده اسوأ باعث لان غياب القانون او ضعفه بيؤدى لظهور وحش لا يهتم بالدين او الضمير ولكن يسعى لارضاء نفسه دون مراعاه لاى اصول
*او باعث الخوف وده بيكون اما من الناس وده زيه زى اللى باعثه القانون بمجرد الاختلاء تضيع اخلاقه او بيكون خوف من الله وده بيكون اشبه بالباعث الدينى .

ومع اختلاف دوافع الاخلاق عند كل شخص فى اهم عامل فى كل البواعث دى وهو "التربيه والتعليم " فالعمليه التعليميه عند اى شعب هى المحرك الرئيسي لخروج الشخص فى هيئته النهائيهوده موضوع ممكن نتكلم فيه فى مشاركه بعد كده لانه موضوع كبير .
تحياتى.

اللى عايز اقوله بقى ان البواعث على الاخلاق دى كلها بدأ المجتمع يفقدها لان القدوه اصبحت مش موجوده لان الابن بيتعلم فى البيت او المدرسه حاجات نظريه وميلقيش ليها تطبيق فى الواقع فبترسخ عنده مبادئ البلطجه
كمثال ابن اتعلم فى البيت ان الصوت العالى مبيجيبش الحق بس وهو رايح النادى او الشغل مع والده وواحد غشيم يخبط المرايه يكسرها الولد بيلاقى الاب تحول الى بلطجى فيسمع من ابوه كلام والفاظ بالنسباله كلام فاضح وابوه كان بيقوله ان "يا حمار " شتيمه ولما الوالد يركب العربيه الولد يلاقيه بيقوله شفت لو مكنتش عملت كده كان طلعنى غلطان فالولد يتعلم ان الاسلوب ده هو اللى ينفع يتعامل بيه فلما صاحبه يكسرله القلم الرصاص يقوم الولد مقلد ابوه فالمدرس يقولك الاخلاق باظت ويضرب الولد فلما الواد يشتكى لابوه الاب يقول لا لا لا مهما حصل ابنى مينضربش فيروح المدرسه يهزء المدرس فالواد يتعلم ان طالما بابا موجود يدافع اعمل اللى انا عايزه .

وهكذا فالغلط عندنا كلنا محدش صالح كلنا بنساهم فى الفساد بشكل او باخر سواء بالفعل او بالسلبيه او الانكار
لانك لو سالت السبكى بتنتج افلام مفعولها اسوأ من تجاره المخدرات حيقولك انا عايز اكسب ولو الافلام الوثائقيه حتجيب فلوس حنتجها بس الناس مش عايزه بدليل الخلق اللى بتدخل افلامى وكلهم مصريين مفهمش سنغاليين ولا حاجه ولما تسأل المواطن انت اخدت اسرتك ورحت السينما ليه فى العيد مع انك ممكن توديهم الاوبرا مثلا يقولك انا رايح افك عن نفسي وعلشان نضحك شويه او حيقولك معرفش الاوبرا او المسارح بيروحوها منين ولما تسأل الاهالى ليه بتسيب ابنك يدخل الافلام دى يقولك مقدرش اسيطر على العيال الاجيال دى منيله .

المهم ان كلنا بنرمي الغلط على بعض ومحدش بياخد خطوه ونبرر لنفسنا او للى تبعنا الحرام لمجرد اننا منقولش فعلا احنا غلطانين ونتأسف ونربي العيال على كده علشان يعرفوا يعيشوا مع العلم انهم "الاجيال الجديده" حيعيشوا مع بعض اصلا .

الخلاصه اننا لازم نفعل ضميرنا شويه او نفهم جوهر الدين ونبطل قبليه وتعصب ونواجه نفسنا كمجتمع ونبطل موضوع احنا كده ومش حنتغير لان غيرنا كانوا اسوأ من كده واتغيروا وكل اللى عملوه راعوا ربنا فى شغلهم حتى لو كان بسيط واحترموا التعليم كماكينه لصناعه الاجيال واتغيروا بس كل واحد بدأ بنفسه مستنوش يجيلهم التغيير من بره .
الغلط فينا احنا مش فى المجتمع لان احنا المجتمع ده .
تحياتى.