المشاركة الأصلية كتبت بواسطة abdelmoneem
أول مرة أرخص، واحد استلمني من أول ما ركنت العربية، نفس الاسطوانة عايز تخلص?، ورحت مديله الرخصة واستنيته،
- طبعًا انا بأديله الرخصة عشان مرور أوسيم القديم أسوأ (خليها أسوأ) مرور على مستوى الجمهورية، المخالفات بالذات بتضيع فيها يوم كامل لازم تصحى بدري الساعة 7 وتروح تقف في "يوم الحشر"، عشان تلحق العشر دقايق اللي بيفتح فيهم الشباك ويلم الرخص ويقفل، ولو جيت سعاتك 9 ونص مثلا هتلاقيهم قفلوا الشباك، واانتا وحظك لا يلموا تاني يا تيجي بكرة! وممكن تيجي بكرة يقولك "النهاردة النص نقل والميكروباص، الملاكي مش النهاردة، اقرأ الجدول في اليافطة "، وحتى لو دخلت الرخصة هتقف في وسط أمم، ومفيش مكرفون فالناس بتقف محشورة في بعضها عشان يسمعوا لو نده على اسم حد فيهم، وطبعًا عمليات السرقة واردة والخناقات وما إلى ذلك، عشان كده أي حد ممكن يقع فريسة سهلة للنصاب، مش استسهال والله، بس عشان يتجاوز الغابة الشرسة اللي اسمها مخالفات مرور أوسيم-
المهم، بعد ما اديته الرخصة رجع لي بعد شوية وقال لي وكيل النيابة معايا على التليفون الرخصة عليها 600 جنيه، وطبعًا رفضت أديله مليم واحد لأني كنت راكن العربية أساسا من ساعة ما اشتريتها، فكنت متأكد مليون في المية إنه نصاب، خدت منه الرخصة (طبعًا كده راح عليا ميعاد فتح الشباك ولم الرخص)، ورحت لواحد تاني، قال لي نفس الاسطوانة، قولت له بقولك ايه معلهاش حاجة، سيبك من الكلام ده، قعد يفاصل معايا من 500 جنيه لغاية ما وصل 50 جنيه ههههههههه قولت له الرخصة معليهاش حاجة، أنا هديك بس بدل تعبك عشان انتا اللي هتقف لو فتحوا الشباك هتدخل الرخصة وتستلمها لما يندهوا الأسامي، (طبعًا هو معاه رخص كتير وورقة أسامي، ما بين ناس ناصب عليها وناس زيي مدياله تعبه) واديته 25 جنيه باين، واشتريت راحتي بدل البهدلة والمرمطة في المخالفات.