المشاركة الأصلية كتبت بواسطة amrelsaqqa
الكرسيدا حلوة على عينى وعلى راسى بس الفكرة فين الكرسيدا دى اصلا ومين بيفهم فيها ، وفين قطع غيارها ، وبرضه القديم له مشاكله مهما كان فئة عالية ، وكمان 2000 سي سي او اكتر ، يعنى خراب بيوت في البنزين
الهوندا برضه عربية اكل الدهر عليها وشرب ، وصدقنى عملتها قبلك ودورت عليها ، بس للاسف مش هتلاقى هوندا نضيفة للبيع في مصر ، العربية دى شبابية ولازم تكون مهلوكة وخلصانة ، ولو متصانة ونضيفة مش بتتباع اصلا
التفكير العملى يقوللك لانسر كرستالة ولو انها مش هتكون الإي وان برضه والنضيف منها اسعاره خيالية و طبعا الفيرنا واللانوس والنوبيرا مانيوال ده في العربيات العملية والكوري .. وكل واحدة من دول معروف عيوبها ومميزاتها ..
لو غاوى الركوبة يبقى ممكن تشوف فيكترا موديل 99-2001 ولو انها عربية ليها مشاكلها بردو خصوصا في الحرارة والتكييف
وعندك عربيات صغيرة ومحترمة زي الاسكودا فابيا ولكن غير منتشرة وصيانتها وقطع غيارها عليها علامات استفهام كتير ( بالنسبة لى على الاقل )...
كورولا تسعينات ولكن اسعارها اصبح مبالغ فيها جدا وبالنسبة لى هى سيارات محترمة ولكن بعد المبالغة في اسعارها وقدم موديلها اصبحت لا تستحق ...
برضه قدامك اختيارات تانية زي الصينى لو هتتقبله نفسيا ، اسبرانزا 516 سيارة جيدة ولكنى شخصيا مش بستريح للصينى او ما احبش اشتري سيارة صينى بس كتير بيشكروا في العربية دى بالذات ...
واخيرا اقولك للاسف للاسف للاسف الرينج ده بقى محدود جدا دلوقتى وما يجيبش عربيات نضيفة ولسة خيرها فيها زي زمان بعد الغلاء الرهيب للسيارات وصعب تلاقى سيارة تستاهل وتحس انك دفعت فيها 50 الف جنيه هتاخد قدامهم ركوبة حلوة .. لو حضرتك معاك المبلغ كاش وتقدر تدفع قسط هات زيرو واعتبر الاقساط هى المصاريف والمفاجآت اللى هتظهرلك في العربية المستعمل
وربنا يوفقك للى فيه الخير ...