الموضوع: استفسار فى نظام تقسيط من اهل الخبره .. ارجوا المساعده

إيه يا رجاله ... مافيش حد يفيدنى ولا إيه !

المشاركة الأصلية كتبت بواسطة menaraafat85

فعلا النظام ده موجووووووووود فى أغلب المعارض إن ماكانش كلها وطبعا البنوك لأن المعرض بيقسطلك تبع بنك
بس نصيحة يفضل تسيبك من الاتنين وحاول تشوف تقسيط تبع وكيل العربية نفسه
أنا سألت فى الحوار ده وروحت ووشوفت كلهم تقريبا نفس الكلام مقدم&مصاريف ادارية&تأمين اجبارى
وبعدين قولت أسأل الوكيل (أنا كنت عايز هيونداى)مش هاخسر حاجة لو سألت يعنى من باب العلم بالشئ
لقيت غبور عامل عرض إن العربية 2014 بسعر 2013 يعنى لا تقولى أدفع أكتر عشان أستلم فورى ولا الكلام ده كله
+ مفيش مصاريف ادارية (ده برضه من ضمن العرض)مفيش بنك أو معرض مش هايخد منك مصاريف ادارية
+ التأمين اجبارى برضه بس ممكن تأمن تبعه أو تبع أى شركة تأمين تانية بس طبعا تبعه بيبقى ميزات زى خصم على مصنعيات الصيانة وقطع الغيار و...
بالنسبة للضمانات ::
طالما هاتدفع 50% تقريبا محدش بيطلب ضمانات غير صورة البطاقة ووصل خدمات (مياه-نور-تليفون...)

طيب هوا أى توكيل بيعمل كده .؟ ولا ده كان عرض من غبور وراح لحاله !؟
ولو فى بنوك بتعمل كده .؟ بنوك ايه ؟؟
(كل الضمانات موجوده ::: بس انا قصدى انى مش هدفع قسط كل شهر , وهدفع الكاش بعد 6 شهور )
تمام كده ولا إيه ..؟

ومشكوووووووووووووووور للافاده ...

المشاركة الأصلية كتبت بواسطة menaraafat85

سورى يا باشا ما خدتش بالى من قصدك
بالنسبة لغبور اللى عرفته ان التقسيط موجود على طول مش عرض
ولكن العرض كان الحاجات اللى قولتلك عليها (مفيش مصاريف ادارية- ترخيص السيارة أول سنة عليهم- أول صيانة مجانية....)
لكن موضوع نص دلوقتى ونص بعد كام شهر ده أنا ماسمعتش عنه وأسف إنى رديت غلط أنا كنت عايز أساعد
بس أعرف إن فى حاجة اسمها غرامة سداد مبكر (يعنى انك تقسط وتدفع كام شهر كدا ولو حبيت تدفع الباقى كاش بياخدوا تقريبا 3% زيادة على المبلغ المتبقى)
يعنى مثلا فى حالة حضرتك
لو العربية بـ 100000 وهاتدفع 50000
يبقى باقى 50000
لو قلنا على سنة مثلا والفائدة 10%
يبقى القسط =((50000×10%)+50000)÷12
=55000÷12=4584
لو قلنا هاتدفع 6 شهور=4584×6=27500
وحبيت تكيش(يعنى تدفع كاش)الباقى
يبقى المبلغ الباقى=55000-27500=27500
غرامة سداد مبكر(وديه أعتقد إن إحنا البلد الوحيد اللى عنده غرامة سداد مبكر)=27500×3%=825
يبقى المبلغ المطلوب سداده=27500+825=28325
وتبقى حضرتك كده دفعت اجمالى=50000+27500+28325=105825
أنا عن نفسى لو مكان حضرتك وده رأيى الشخصى
أنا أحط الخمسين اللى معايا فى دفتر توفير البريد (يدينى فائدة 9.5%) لحد الست شهور أو السنة دى ماتعدى وأكمل المبلغ (طالما أنا ضامن إن الفلوس جاية إن شاء الله) وأكيش
أه ممكن العربية تغلى بس مش كتير يعنى غير برضه إن الفائدة اللى هاخدها ممكن جدا تعادل فرق السعر اللى العربية هاتغلى بيه
أرجع وأقول لحضرتك ده رأيى الشخصى المتواضع (أنا ماعرفش ظروفك وهل معاك عربية ولا لأ وهل تقدر تستنى السنة ولا لأ وهل شايف إن الفوائد حرام وحلال ولا لأ)
أسف على الرد الخاطئ مرة تانية وعلى الإطالة أيضا

شكرا لرد حضرتك ... وشكرا على وقتك انا عارف انى تعبتك معايا :(

بس معلش اخر حاجه هتطلبها من حضرتك ... هوا ايه نظام تقسيط غبور ده ؟؟ انا اول مره اسمع عنه .. علشان انا محتار وممكن اجيب الاكسنت RB فا لو كده اجيبها من عنده ؟؟

شكرا اوى ووالله مش عارف اقولك ايه