الموضوع: تجميع لبعض حوادث السيراتو : حد عنده تفسير فى تعويم السياررة وفقد السيطرة

المشاركة الأصلية كتبت بواسطة ابو ليلى

الموضوع ده فكرنى بايام زمان بعد انتشار السيراتو بسرعة فى البلد كان الكل بيشتم فى العربية برضه وتسمع كلام غريب كانهم بيتكلمو
عن عربية انت مش راكبها ومع ذلك كانت مبيعاتها بتزيد والنتيجة واضحة بعد مرور 3 سنين من انتشارها ....كانت ايام
العربية لا يوجد فيها عيب قاتل ولا عيب خفى ولكن تحتاج لانتباهك الكامل وانت سايق ...
موضوع العومان ده حصل معايا شخصيا وكنت رايح تحت عربية نقل ولكن الحمد لله العربية لمت تانى وكان خطا فى انى دوست فرامل فجاة
لما لقيت النقل كابس عليا وجنبى نقل اصغر وانا فى النص وتردد لحظات شمال ولا يمين ....الحمد لله
وفى كل الحوادث لابد من وجود خطا بشرى اى كان نوع العربية .. ومع الطرق المصرية حدث بلا حرج
افهم عربيتك كويس ومتطلبش منها اكتر من طاقتها هترتاح ... وارجع اقول كمان وكمان السيراتو تحتاج لمعاملة خاصة .

معلش الناس بتقول اخطاء بشرية ، ماهو اي حادثة في الدنيا لازم اخطاء بشرية محدش قال العربية هتعمل الحادثة مع نفسها والا يبقى ما تتركبش اصلا ( ولو ان في عربيات كدة فعلا بس ما علينا ! )

الفكرة العربية بتتلكك على اقل حركة ولا بتمسك نفسها ؟
انا كان معايا بيجو 504 رغم انها عربية قديمة ، وطبعا ليها حدود ما ينفعش مثلا تدخل بيها ملف بسرعة عالية ، انما حصل كذا موقف كدة طوارئ يعنى مرة نزلت من كوبري بسرعة عالية واكتشفت ان في دخلة يمين المفروض ادخلها وهتفوتنى ، عملت حركة غبية بس الحمد لله ربنا ستر كسرت جامد ودخلت الدخلة قطم مرة واحدة والعربية ما اتهزتش من ورا نهائى وحسيت انى جاي على العربية جامد بس في الاخر دخلت معايا عادى جدا .. ( في موقف زي ده الواحد بيلوم نفسه بس بيحترم العربية اوى اوى ) في مرة تانية ، كنت لسة مصلح العربية كان عندى عيب الار بي ام بيلعب لوحده ( مشكلة سلوك بوجيهات ) فانا طالع وباصص على العداد ، ومش مركز وعمال ازود السرعة والار بي ام عشان اجرب ، وفجأة لقيتنى داخل على ملف ، هو مش ملف اصلا هو كأنه يوتيرن ، ملف غبى بجد ، بتشوف الجزيرة قدامك مش على شمالك في الملف ده لو انت داخله يمين ، الملف ده لو حد عارفه في الدخلة الشمال بتاعت شبين الكوم من طريق الساادات ، المهم الملف ده المفروض يتاخد على 25 بالكتير ، اتخن عربية تاخده على 40 ، المهم ببص لقيتنى داخل عليه والعربية على 60 ، حاولت افرمل بالمعقول على قد ما اقدر بس في الاخر مكنش قدامى غير انى اكسر الدركسيون جامد وادخل الملف وزي ما يحصل ... المهم ربنا ستر وعدت ولو انى حسيت ان العربية كأنها هتتقلب يعنى العربية ميلت بس في نفس الوقت ما لعبتش منى نهائى ، والكسرة الجامدة دى عملت زي تفريغ هوا لدرجة ان كاوتش الباب ناحية اليمين كله اتخلع لوحده !!!!!!!! ، بعدها وقفت على جنب لحد ما اهدي نفسى من الموقف ..


العربية اللى بعدها
تويوتا كورولا عربية غير ثابتة وكذا مرة اقسم بالله على سرعات 30-40-60 ويحصل مواقف عبيطة وكذا مرة حصل ان العربية ضهرها يلعب لوحده كدة ( نتيجة اخطاء بشرية ) بس على سرعات هبلة جدا ... هنا الفرق

انت ممكن تغلط الغلط ، بس في عربية تخليك تقول: يااااه ايه الغباء اللى انا عملته ده ، الحمد لله بس هى العربية ازاى مسكت نفسها كدة .. ؟
وفي عربية تانية ، تقول ايه ده !!! ، هو اانا عملت ايه اصلا عشان العربية تأفور في رد فعلها كدة !!!!!!؟؟؟؟


ده اللى بنتكلم فيه ، ويكفينى اخر جملة ان السيراتو تحتاج معاملة خاصة ، ده اللى احنا بنتكلم فيه ومش بنقلل او بنعيب في العربية ، وطبعا كثرة الحوادث دى طبعا ليها حق تثير علاامات استفهام عند صاحب الموضوع واكيد حضراتكم فاكرين الحادثة بتاعت الاخ غازى والعربية اتقلبت برضه من مجرد نقرة على الطريق وكانت العربية لسة نازلة جديد ، يعنى عامل الانتشار والنسبة والتناسب مكنش موجود وقتها ..


ملحوظة مهمة انا ما جربتش السيراتو قبل كدة تجربة فعلية ، سقتها جوة البلد بس ، بس بقول ان وجهة النظر قد تكون صحيحة مش اكتر ، وده مش حكمى الشخصى على العربية

متأسف للاطالة وربنا يحفظنا جميعا ويستر طريقنا .....

اهدوا شويه يا جماعة واستغفروا الله