حدفة يمين ورأي بتاع الزوايا

**MaaM** · 22-10-2013 09:37 PM

لما سافرت ، اخدت بالي ان عندي حدفة يمين بتبان اوي بعد 100
دا غير إن الطارة اتركبت معوجة عند محمود أوبل ، يعني لفة سنة شمال ولو عدلتها العربية تحود يمين

روحت لبتاع الزوايا النهاردة في الحرفيين (ظبط زوايا بالكمبيوتر) وقولتله على العوجة اللي عندي عشان يبقى على علم
المهم قالي عندك حدفة شمال !
شرحتله اكتر من مرة وهو مصر انها شمال مش يمين
طيب والحدفة اليمين ديه أعمل فيها ايه ؟ قالي بدل رجع العجلة اليمين ورا وهات اللي ورا مكانها
قولتله طيب ما اعمل إكس (يعني ارجعها مكان العجلة الشمال ورا) عشان كان توكيل بريدجستون قالي كدا كل 10 الاف كيلوا
فقالي سيبك من كلام التوكيلات (كعادة الصنايعية) ورجعها ورا وشوف

فايه رأيكم
وبفكر ارجع الاتنين كمان ، يعني الاتنين اللي قدام ارجعهم ورا بحرف الإكس
ولا اعمل زي ماهو قالي
أصلي مسافر شرم بالعربية بكرا ومافيش وقت أجرب

ملحوظة:
مش عارف اختبر العربية لأن مافيش شوارع امشي عليها بسرعة 80 حتى ، والاسفلت يكون معدول !

**aw2100** · 22-10-2013 10:05 PM

المقصود من تبديل العجل اليمين شمال امامى او ترجع العجلة اليمين وتبدلها خلفى انه لو فية عجلة متأكلة اكتر من التانية العربية بتحدف ناحية العجلة المتأكلة فلو بدلت العجل وراحت الحدفة اليمين او حدفت شمال يبقى المشكلة عندك من الكاوتش مش من الزوايا والأفضل ليك ترجع الفرديتين المامى خلفى وتركب الخلفى امامى وتجربهم قبل السفر علشان الحدفة دى بتبقى مملة فى الطوالى وتحسسك بعدم ثبات العربية وربك الستار !!

**saddam** · 22-10-2013 10:11 PM

صديقي المواطن
مبدئيا أول حاجة تعملها تسيب الراجل الكفتجي ده
ثانيا إقلب الكاوتش إكس لو الورا حالتهم تستحمل سفر ثم تروح لواحد مظبوط يحطلك شوكة تثبت الطارة ثم يبتدي يظبط وتتفق معاه إنك ترجعله ﻷنك لازم تعرف قولا واحدا مفيش طارة تتظبط من أول مرة إنما الحدفة والميلان دي أساسي تتظبط من أول مرة
وبالتوفيق وإلى اﻷمام ومن نصر إلى نصر
ودمتم للنضال

**amr elsisi** · 22-10-2013 11:06 PM

غير العجلتين الامامي مع بعض
والدريكسيون يتعدل من البارات السفلية
المهم قبل ما تغير انت بتقول ظبط زوايا هل شيكت الاول وشوفت ظبطت ولا

**aw2100** · 24-10-2013 10:47 PM

المشاركة الأصلية كتبت بواسطة maam

ملحقتش اعمل حاجة عشان كنت بجهز حاجتي للسفر
المهم العربية بقى فيها حدفة شمال :)
وهحاول اتاكد تاني اصل طريق شرم مش مسطرة

sent from my htc

من حدفة يمين لشمال لوحدها ده مش من الكاوتش ؟؟
100*100 عندك عيب فى العفشة راجع العفشة وربط كويس وشوف مركز زوايا محترم روح له ده سفر ؟؟

**MaaM** · 03-12-2013 04:14 PM

النهاردة سافرت الغردقة واختبرت العربية أكتر من مرة على طريق السخنة بما انه مسطرة
ومازلت العربية بتحدف يمين ! بالرغم من اني عملت إكس للعجل + تظبيط زوايا تاني مرة بس في مكاني تاني "Fit&Fix"