الموضوع: مجانيه التعليم الجامعى هل هى الاسلوب الافضل ؟؟؟

ايه رايكم فى مجانيه التعليم ؟؟؟
*تفتكروا اذا تم الغاء دعم التعليم الجامعى واتجهنا "زى اغلب الدول المحترمه " ليكون التعليم الاجبارى والمجانى هو التعليم الاساسي "الثانوى " فقط والتعليم الجامعى يقتصر على منح للمتفوقين فى التعليم الاساسي وتكون المنحه سنويه يعنى لو الطالب دخل الجامعه بمنحه وسقط تتشال المنحه ويتحول لتعليم بمقابل واللى حابب يدخل جامعه يدخل بمصروفات غير مدعمه
*وفى نفس الوقت نوجه المبالغ اللى حيتم توفيرها من الغاء دعم التعليم الجامعى الى بناء مدارس متطوره وتطوير المدارس الحاليه بحيث ان لو المدارس الحاليه على مستوى الجمهوريه حوالى 60000 مدرسه ممكن فى خلال 5 سنوات نضاعف عددهم مع تطوير الحاليين وبالتالى يتحسن المستوى التعليمى .

وبصراحه انا شايف ان ده حيفيد فى اكثر من اتجاه منهم مثلا :
-لما يتضاعف عدد المدارس تقل كثافه الفصول فيتسهل الرقابه على العمليه التعليميه والمدرسين ميكونش لهم حجه زحام الفصول .
-اللى حنوفره من الدعم حيستخدم فى تطوير المناهج برضه فيبقى الطالب بعد ميتخرج من التعليم الاساسي عنده من الثقافه والوعى اللى يخليه انسان محترم .
-خريج التعليم الاساسي حيمتحن الامتحان النهائي مش فى منهج انما فى المواد ككل يعنى لو حيمتحن انجليزى يمتحن فى اللغه ككل مش فى منهج معين وهكذا فى كل المواد فيتخرج صاحب العقليه المحترمه .
-حنوفر لسوق العمل الاعمال اللى هو محتاجها ومحدش حيتعوج على اى شغل لانه خريج جامعه ومينفعش يشتغل اى شغلانه ونكسر الجزئيه دى عند بعض الشباب .
-طبعا كلنا عارفين ان اصحاب المهن هما المطلوبين فى الشركات الهامه زى البترول وغيرها والشركات دى بتشتكى من سوء اخلاق العامل ولكن لما يكون صاحب المهن دى متعلم برضه تعليم اساسي وممكن او فى الغالب من اسره محترمه حيبدع اكتر وبالتالى سوق العمل يتعدل .
-طبعا حنخلى الشباب يبدأ الحياه العمليه مبكرا فيبقى قدامه المستقبل مفتوح بعد سن 16 سنه يقدر يبدأ ويغلط ويتعلم من الحياه .
-حنقلل التلوث الاخلاقى اللى حاصل فى الجامعات لان اللى حيدخل الجامعه حيدخل علشان يتعلم فقط لانه لو سقط مش حيكمل وحيبقى زيه زى باقى الناس .
-الدعم اللى حياخده صاحب المنحه او اللى بيتعلم بفلوسه حيسمح لهم بخروج بعثات بره مصر ويستفادوا اكتر ويفيدوا البلد اكتر .
-طبعا حيتلغى التنسيق وكل كليه حتعمل اختبار للاشخاص اللى عايزين يلتحقوا بيها وبالتالى اللى بيحب مجال حيدخله ولما يتخرج حيشتغل بيه ويبدع فيه لانه مؤهل وحابب مجاله .
-وهكذا فى نفس السياق ده .

ممكن يكون تصور منقوص او فى عيوب بس انا شايف فوايده اكتر من عيوبه خاصه انه ده الاسلوب اللى شغال بره فى الدول المحترمه .
احب اسمع رأيكم وتحياتى

المشاركة الأصلية كتبت بواسطة besso

انا موافق على الكلام ده بس خريج الثانوى العام ده يقدر يشتغل ايه؟؟؟؟؟؟
ممكن يشتغل اعمال خاصه "يفتح مشروع تجارى " او يشتغل فى التجاره نفسها كبائع او يشتغل اعمال اداريه فى الشركات او ياخد دورات متخصص فى مجالات محدده ومطلوبه ويشتغل بيها بعد كده
ماهو لو الدوله عايزه تبقى متقدمه زى باقى الدول المحترمه يبقى لازم التعليم الفنى هو اللى يبقى اساسى مش هو ده اللى هايعمل تقدم وصناعه او مش لازم يكون فيه حاجه اساسيه وحاجه على جنب بس يكون فيه تعليم متطور فى الاتنين
هو ده اللى ذكره ا/horas3000 وانا اتفقت معاه في انه لازم التعليم المهنى ياخد نطاق اوسع وتتطور مناهجه علشان تكون متماشيه مع متطلبات السوق فالفكره نفسها حتبقى افيد كتير
نقطه مهمه بقى التعليم الاساسى اصلا مبقاش مجانى الكلام ده على الورق الطالب بيدفع فلوس مقابل انه يتعلم بس عن طريق الدرس

المشاركة الأصلية كتبت بواسطة ahmed_adham

وايه فايده المدارس أصلا وكل الناس بتاخد دروس سواء مدارس حكومه أو خاص؟ أنا بقول يقفلو المدارس ويوفرو مصاريف تشغيلها وتفتح وقت الامتحانات بس.

هى المشكله ان الطالب بيتجه للدرس الخاص لان العدد فى فصول المدارس بين 50-65 طالب فبالتالى مستحيل عمليا الطالب يحصل المنهج ويفهم ويطبق المنهج ده مع الاستاذ داخل الفصل فبيتجه للدرس علشان يقدر يحصل اكتر والمدرس بيتجه للدرس لانه شايف ان مفيش رقابه عليه فيما يفعل داخل الفصل وكنوع من تحسين الدخل
انما لو اتفتحت مدارس اكتر باللى حيتوفر من الغاء الدعم الجامعى حيقلل اعداد الطلبه فى المدارس ومع تطوير المناهج وتأهيل المدرسين وتكثيف الرقابه عليهم حتقل الدروس بشكل تلقائي خاصه ان الاهل حيبقوا عارفين ان مستوى الابن حيوصل للثانوى "سواء عام او مهنى " ويشتغل فمش حيهتموا بالدرس الخاص طالما بيتعلم بشكل كويس
تحياتى.

المشاركة الأصلية كتبت بواسطة prof2013

هي الدولة لاقيه تاكل !!! ما هو لما تلاقي تاكل الاول يبقى تشوف مجانيه التعليم علشان يتطبق النظام اللي حضرتك بتقول عليه دا لازما الحاله الاقتصاديه تتحسن بشكل كبير علشان تكون فيه ميزانيه في الدوله تسمح باعطاء المنح ودا ممكن يتم عن طريق الاهتمام بالقطاعات المنتجه والتي تعمل على تحسين الاقتصاد انما التعليم والقطاعات دي تعتبر مستهلكه وليست منتجه اذن النتيجه ايه ؟؟؟ نهتم بالقطاعات المنتجه ... يزيد الانتاج ... تزيد الميزانيه والدخل ... وفي النهايه نقدر نصرف بيها على تلك القطاعات المستهلكه وندرس الخطط لتطويرها عن طريق الخبراء

المشكله انى حاسس ان التعليم هو اللى ممكن يحسن المشاكل اللى موجوده فى المجتمع والمنح اكيد حتتكلف اقل من الدعم اللى بيتوجه للجامعات واكيد حيقلل الهدر فى الفلوس دى لانه حيتوجه لعدد قليل من الطلبه بس
والفكره ان البلد علشان تتقدم لازم الحكومه تشتغل على القطاعات الانتاجيه والقطاعات المؤثره فى سلوكيات المجتمع زى التعليم والصحه والمرافق وهكذا .
تحياتى .