الموضوع: ايه احسن نوع لمبات موفره

المشاركة الأصلية كتبت بواسطة tutankhamoun

أيه يا باشا شوابي دي ؟؟ أنا عمري ما سمعت عنها

الماركات المصري (الصناعة مصري) اللي مجربها و بتعيش

نيازا

يلليها ... فولتو

الماركات اللي بترخيص
أليوس elios

بالنسبة للمبات الموفرة

أنا بأشتري بتاعة كارفور و دي مصنعها في الأسماعيلية و بيصدروها لفروع كارفور في الشرق الأوسط و ا لمصنع أسمه رالوكس أوروبا

اللمبة بتاعة كارفور ثمنها 11 جنيه أو 13 جنيه حسب الوات و بتعيش

أهم حاجة زي ما الأخوة أقترحوا

أن اللمبة ما تكونش في مكان زي الحمام أو المطبخ علشان تفضل تعيش فترة طويلة .

ملحوظة على جنب :

مش ملاحظ أن كم الأستيراد من كل حاجة أصبح غير طبيعي من أواخر أيام مبارك و الشركات المصرية بتندثر ؟؟؟

أنا نزلت أشتري كاوتش للعجلة (متعود أشتري كاوتش نسر )
مفيش و لا واحد في 6 أكتوبر بيبيع مصري خالص و كلهم صيني

حسبي الله و نعم الوكيل فيمن أوصل حال البلد لهذا الحال .

===============

نصيحة لكل واحد بيشتري لمبات من أي نوع

أوعى تشتري الصيني .......... الصيني مضيعة للفلوس و بيبوظ حاجات تانية معاه و بيضرب أو يفرقع
و حسبي الله و نعم الوكيل في المستوردين .... و في بتوع الجودة في الجمارك و اللي بيسمحوا أن فلوسنا الصعبة تضيع في حاجات سيئة زي دي و في الآخر مش بنستفيد منها بحاجة .

شوابي دي تلاقيها في كل محل كهربا تخشه بس بقولك حاجه نصب في نصب ملهاش لازمه وعلى فكره نورها ضعيف وفرق الاضاءه ملحوظ بينها وبين الفيليبس.

المشاركة الأصلية كتبت بواسطة aw2100

سر سرعة بوظان لمبة الحمام والمطبخ الموفرة بالمقرنة بالمبة العادية او النيون الطويلة ؟
اللمبة الموفرة تعمل بدائرة الكترونية ودى زيها زيي اى جهاز الكترونى بتتأثر بالرطوبة العالية وبخار الماء وطبعا اكتر مكان فية رطوبة عالية وبخار الماء هو الحمام والمطبخ وده بيتلف الدوائر الموجودة فى اللمبة وبيعمل املاح وقصر كهربى فيها فالدائرة تتحرق علشان كده
تحذير / من الخطأ تركيب اللمبة الموفرة فى مكان به رطوبة عالية زى الحمام والمطبخ وحمامات السباحة والسونا !!
افضل لمبة موفرة حاليا هى التى تعمل بتكنولوجيا الled ودى عمرها الأفتراضى طويل جدا حوالى 50000 ساعة واستهلكها اقل من اللمبة الموفره العادية واضائة ثابتة ودى صورتها تحياتى !!

فيه لمبات فيلبس الواحده داخله في 80 جنيه غالبا led بس مش متأكد المفروض عمر أطول وسطوع أكتر بس متجرأتش أجربها بصراحه عشان السعر.

المشاركة الأصلية كتبت بواسطة ibrahim fathy

اللمبة الموفرة مش موفرة بالمعني اللي انتوا فاهمينه خااااااااااااااالص

يعني انت في البيت شركة الكهربا بتحاسبك علي الوات watt فقط لاغير

فانت بدل ما تجيب ما تجيب لمبة نيون عادية fluorescent tube tl-d بتروح تجيب لمبة موفرة نفس الوات تقريبا مع العلم ان الفيض الضوئي lumen اللي طالع من المبة الموفرة اقل بكتير من اللمبة العادية ..بالاضافة لفرق السعر

طب مادام اللمبة الموفرة مش موفرة اصلا يبقى ليه الحكومة مصدعانا بيها؟

لأ هي موفرة فعلا لكن مش للمستهلكين في المنازل لأني قولت انك بتتحاسب على الوات فقط لاغير..
لكن في اي مشروع مصنع مستشفي مول الخ..الحكومة بتحاسبهم علي ال va ,و ليس الوات

المبة العادية معامل القدرة 0.5 ..و بالتالي لو لمبة عادية 18 وات مثلا يبقى الاسثهلاك 18/0.5 = 36 va
المبة الموفرة معامل القدرة بيوصل ل 0.97..لو لمبة موفرة 18 وات برضو ..الاستهلاك هيبقي 18/0.97 = 18.5 يعني النص تقريبا ..طبعا توفير جامد جدا

اللمبه الموفره موفره مقارنه باللمبه الحراريه الصفرا اللي دبل ما تجيب 100 و 150 وات بتجيب موفره 20 ولا 25 وات وتدي ضوء أفضل. حتى الفلورسنت مكونات كتير وحجم كبير كل ده تختصره في لمبه موفره قلاووظ أحسن من ناحيه التكلفه والشكل الجمالي.