الموضوع: طريقة عزل صدر وارضية السيارة (دايو لانوس) . بالتفاصيل والصور

قبل ما ابدأ فى شرح طريقة عزل صدر وارضية العربية
لازم انوة الى ان الموضوع دة هو نهاية مواضيع تفكيك صالون السيارة بالكامل
وكان المفروض انى احطهم ورا بعض بالترتيب
بس جة موضوع فلتر التكييف وتنضيف التلاجة فى النص ( بالنسبة للناس اللى متابعة)
فهما دول اللى وقفوا تسلسل المواضيع

والهدف الرئيسى من التفكيك كان عزل صدر وارضية العربية بالارما فلكس الايطالى 9 مم عزل صوت وحرارى
وعشان انفذ الموضوع الموضوع دة
او عشان تنفذة انت
هتلتزم بترتيب الفك فى المواضيع اللى انا عملتها دى

1 -قطمة الدركسيون http://www.nilemotors.net/Nile/342016-a.html


2 -لوحة العدادت
http://www.nilemotors.net/Nile/343300-a.html


3 - التابلوة http://www.nilemotors.net/Nile/347720-a.html

4 -وحدة التكييفhttp://www.nilemotors.net/Nile/363935-a.html


ودى الخامات اللى انا استخدمتها









بعد ما هتخلص كل الفك اللى سبق هتكون العربية بقت بالمنظر دة


كدة مش هيفضل عندك غير الدواسات (بنزين - فرامل - دبرياج )
اسهل دواسة فى الفك هيا البنزين يليها الدبرياج ( اصعب قليلا) يليها الفرامل (صعبة جدا )

وفكرة الفك عشان تبقى متابع معايا وفاهم هيا انى هفك الدواسة من جوة
لكن هسيب باقى المنظومة بتاعتها من برة
يعنى ببساطة هسحب الدواسة من المنظومة اللى هيا شغال فيها
مش هفك الدواسة كلها بالمنظومة

نخش على اول واحدة
دواسة البنزين ودى اسهلهم

الاول هتلف البكرة دى يمين وبعدين تحرر الواير منها


وبعدين هتخش جوة العربية
تشد الواير بتاع البنزين رقم 1
وبعدين تفك الصامولتين 12 اللى هما رقم 2 و 3
هتلاقى الدواسة نزلت فى ايدك



نخش على دواسة الدبرياج
الاول هنفك قربة المية ونرفعها من مكانها (صامولتين 10)



وبعدين هنفك المسمارين ال 12 دول



وهندخل جوة العربية
مفيش حاجة ماسكة دواسة الدبرياج غير مسمار املس فى نهايتة تيلة صغيرة
وصامولة 12 راكبة من فوق اللى هيا دى



هتفكها طبعا
وهتسحب التيلة بذرادية او بنسة بوز صغير
وبعدين هتسحب المسمار الاملس
هتلاقى الدواسة طلعت فى ايدك
والدراع اللى جاى من الماستر العلوى زى ما هوة فى مكانة زى كدة







كدة مش فاضل غير ارخم دواسة على الاطلاق وهيا دواسة الفرامل
الاول هتفك الصامولتين رقم 2 و3 من صدر العربية
لان اللى انت شايفهم دول هما راس المسمار
بس خلى بالك قبل ما تبدأ الفك الدواسة دى رخمة قوى
او بمعنى اصح مكان الصامولتين صعبين قوى
هتضطر توسع لنفسك بانك تفك كام حاجة صغيرة من صدر العربية فى المكان دة عشان تعرف تشتغل
ومش هيتفكوا غير ببيبة 12 او لقمة



بعد ما هتفكهم مش هيفضل غير المسمار رقم 1 هتفكة
ونفس اللى انت عملتة فى دواسة الدبرياج من سحب التيلة والمسمار الاملس
هوة نفس اللى هتعملة فى دواسة الفرامل
وهيبقى دة الشكل الرئيسى فى النهاية


طبعا فى الاول اشتغلت تنضيف وغسيل بالنزين لحد ما بقى صدر العربية نضيف جدا وزى الفل



وبعدين جبت فرخ ارما فلكس بيجى مقاسة 1 فى 2 متر
وبدات ارسمة على صدر العربية وافرغ مكان كل مسمار وكل خرم عشان لما ارجع اثبت كل حاجة مكانها تبقى سهلة



وعشان الفرخ دة هيبقى فى صدر العربية يعنى الحرارة كلها
فانا لزقتة ب سيلكون حرارى



طبعا كان فية فراغات فى الاجناب عند الكنترول بتاع العربية
وعند مدخل الضفيرة من الشمال
فبدأت اشتغل بالمقص انى اقص حتة من الارما فلكس على اد المكان بالظبط والزقها
كانت فكرتى كأنى بعمل عزل للهوا
مش عزل للحرارة او الصوت
فكنت بكتم كل حتة وكل ثغرة ممكن يدخل منها الهوا
ودة اللى ادانى النتيجة الممتازة بعد كدة بصراحة

بعد ما خلصت الصدر بتاع العربية كلة واتاكدت ان انا عزلت تمام
قفلت الدواسات تانى بنفس ترتيب الفك
و قفلت الهيكل الرئيسى بتاع التابلوة تانى


يتبــــــــــــــع

المشاركة الأصلية كتبت بواسطة gelgel2004

اسمحلى اهنيك على التقرير الممتاز و العرض المميز
جزاكم الله كل خير

متشكر جدا لحضرتك

المشاركة الأصلية كتبت بواسطة amr011111

شغل تمام
والف مبروك

الله يبارك فيك

المشاركة الأصلية كتبت بواسطة minalove_1

الله ينور عليك يا كبير القسم
كالعاده شرح ممتاز عشان اي حد مبتديء حيقدر يستفيد
ربنا يجازيك علي كل خير بتقدمه لكل واحد مننا .... حتي لو في مشكله فرعيه بتساعدنا برضو
وربنا يرحم والدتك ولك كل التقدير والاحترام .

متشكر جدا لردك يا مينا وربنا يجعلة فى ميزان حسناتنا

المشاركة الأصلية كتبت بواسطة amr elshamy

اللهم أغفر لها و ارحمها و اعفو عنها و أكرمها
- اللهم وسع مدخلها و ادخلها الجنة وغسلها بالثلج و الماء والبرد
- اللهم يمن كتابها و هون حسابها و لين ترابها و ثبتأقدامها و ألهمها حسن الجواب
- اللهم طيب ثراها و اكرم مثواها واجعل الجنة مستقرها ومأواها
- اللهم نور مرقدها و عطر مشهدها و طيب مضجعها
- اللهم آنس وحشتها و ارحمغربتها و قها عذاب القبر و عذاب النار
- اللهم نقها من خطاياها كما ينقى الثوبالأبيض من الدنس
- اللهم فسح لها في قبرها و اجعلها روضة من رياض الجنة و لا تجعلهاحفرة من حفر النار
- اللهم انقلها من ضيق اللحود و القبور إلى سعة الدور و القصورمع الذين أنعمت عليهم من الصديقين و الصالحين والشهداء
- اللهم اجعل لها من فوقهاو من تحتها و من أمامها و من خلفها و عن يمينها و عن يسارها نورا من نورك يا نورالسماوات و الأرض
- اللهم أبدلها دارا خيرا من دارها و أهلا خيرا من أهلها وزوجا خيرا من زوجها واسكنها فسيح جناتك في الدراجات العلي آمين
- اللهم إن كانقد أحسنت فزد في إحسانها و إن كان قد أساءت فتجاوز عن إساءتها
- يا أكرم من سئل و ياأوسع من جاد بالعطايا … خفف أحمالها و حط من أوزارها واجعلها في مقام من قام لكبالقرآن آناء الليل و أطراف النهار
- اللهم كن لها بعد الحبيب حبيبا و لدعاء مندعا لها سامعا و مجيبا و اجعل لها من فضلك و رحمتك و جنتك حظا و نصيبا
- اللهم منأحييته منا فأحييه على الإيمان و من توفيته منا فتوفه على الإسلام
- اللهم إنانسألك توبة قبل الموت و راحة عند الموت و مغفرة بعد الموت
- اللهم اجعل لنا عملايؤنسنا في قبرنا إذا أوحشنا المكان و لفظتنا الأوطان و فارقنا الأهل و الجيران
- اللهم هب لنا نفوسا مطمئنة تؤمن بلقائك و ترضى بقضائك تقنع بعطائك
- اللهم أغفرلحيينا و ميتنا و شاهدنا و غائبنا و صغيرينا و كبيرنا و جميع موتى المسلمين والمسلمات الذين شهدوا لك بالوحدانية و لنبيك بالرسالة و ماتوا على ذلك
- اللهماجعل خير أعمالنا خواتيمها و اجعل خير أيامنا يوم لقائك
- سبحان ربك رب العزةعما يصفون و سلام على المرسلين و الحمد لله رب العالمين
- الفاتحة "و صلي اللهعلى سيدنا محمد و على آله و صحبه و سلم"

مقدرش اقول غير الله يباركلك
وأأمن على الدعاء
واقول لك بالمثل

المشاركة الأصلية كتبت بواسطة mitsukero

ربنا يباركلك شغل محترم جدا كالعادة
ربنا يغفر لوالدتك و يرحمها بجد نعم الصدقة الجارية

بصراحة انت جبت الفايدة
وهيا عندى احسن من كولدير مية فى الشارع
لان دة علم ينتفع بة
وربنا يباركلك

المشاركة الأصلية كتبت بواسطة ahmedzizo131

بسم الله الرحمن الرحيم
تسلم استاذ / مصطفى

شكرا يا استاذ احمد

المشاركة الأصلية كتبت بواسطة ahmed_ramadan

بسم الله ما شاء الله .... أنا مازلت عند رأيى أنت أستاذ

دة بس من ذوقك ياباشا