استفسار عن مقابله

**ganash** · 24-10-2013 08:02 PM

قدمت فى اعلان للسفر على النت ولقيت المكتب بيتصل بيا النهارده ان فى مقابله يوم الاحد المفروض اروح ببدله ولا عادى ؟ المفروض الراتب يكون كام لو سألنى اقوله كام الشغل فى جده اعتقد بيبقى فى نسبه على المبيعات صح ؟ انا عندى خبره سنه بعد الكليه فى المبيعات وسنتين وانا فى الدراسه والمفروض اخلى بالى من ايه فى المقابله ونوع الاسئله ؟ وايه حكايه سائق خاص دى لما اروح هتتغير ولا هيبقى فيها مشكله ؟ ده نص الاعلان

محاسبين خبرة بأعمال المبيعات والتسويق لا تقل عن سنتين.
مميزات العمل:-
( اقامة - مواصلات - سكن )
المقابلة يوم الاحد 27/10/2013 الساعه الواحده ظهرا.
التأشيرة سائق خاص ( لابد من وجود رخصة قيادة لدى المرشحين )

**أحمد كمال** · 24-10-2013 08:04 PM

ما تروحش على تاشيرة بغير وظيفتك الفعلية عشان هتشوف ايام سودة

**أحمد كمال** · 24-10-2013 08:28 PM

انا عارف ان الكلام النظري سهل و الظروف صعبة في مصر و الشغل صعب

بس لو كلنا بدانا بنفسنا و رفضنا نروح نشتغل بتاشيرة شغل غير الشغل (خالص احترامي للسائقين و الله لا اقصد الانتقاص منهم) هنحفظ حقوقنا

لو رحت كده و لقيت الشغل فعليا سواق هتشتغل غصب عنك

لو رحت و اشتغلت مش سواق و اتمسكت هتترحل و ساعتها نقعد نقول السعودية بتضطهد المصريين (و هما من حقهم تماما تطبيق قوانينهم اللي انت من اول يوم داخل مخالف لها بعملك بمهنة مختلفة)

من الاخر ...... امشي عدل و روح بورق و عقد و تاشيرة مظبوطة عشان وقت المشاكل تعرف تاخد حقك من التخين

**#MAAM#** · 24-10-2013 11:46 PM

كلام الناس هنا صح وكمان هما هيبتدوا حملة تفتيش تانية بعد كام يوم للمخالفين لأنظمة الاقامة ......... بلاش تبهدل وتذل نفسك ....... لازم تيجي بتأشيرة على وظيفتك وكل حاجة تكون مظبوطة علشان محدش يفتح بقه معاك

**ganash** · 25-10-2013 04:15 PM

طيب يعنى لو قولتلهم يغيرو التأشيره لمحاسب او اخصائى تسويق كويس ؟

**أحمد كمال** · 25-10-2013 06:42 PM

المشاركة الأصلية كتبت بواسطة matrix_it

ممكن حد يفهمنى موضوع الكفالة فى السعودية ماشى ازاى ؟

باختصار ...... صاحب العمل بيكفل الموظف عشان يطلع له التاشيرة

يعني حضرتك طبيب رايح تشتغل في مستشفى يبقى المستشفى هو كفيلك

مهندس رايح شركة هندسية تبقى الشركة كفيلك

الخ الخ الخ

الكفيل بيبقى شخص بعينه مش شخصية اعتبارية لما تبقى وظيفة عند شخص

زي خدم المنازل و السائقين الخاصين و غيره

المشاركة الأصلية كتبت بواسطة ganash

طيب يعنى لو قولتلهم يغيرو التأشيره لمحاسب او اخصائى تسويق كويس ؟

بص مادام الاعلان مكتوب كده يبقى هو اصلا ما عندوش تاشيرات كده

يا اما هيستقدمك على شخص مش شركة و دي ساعتها هتكون عبودية و ايام سودة و تبقى حياتك مرهونة برضا البني ادم ده عنك

يا اما هيجيلك على شركة نسبة السعودة فيها في الموظفين مش متحققة فما يقدرش يجيبك موظف فهيجيبك سواق