مسافر القاهرة ومحتاج نصايحكم

**MoH.SaLaDiN** · 26-10-2013 11:50 PM

المشاركة الأصلية كتبت بواسطة أبو صلاح

مبدايا انا اعترض انك تتفسح في القاهرة لكن للناس فيما يعشقون مذاهب
لكن انا عايز اطلب منك طلب
فين اماكن المطاعم اللي انت قلت عليها دي
انا ياما رحت اسكندرية بس بروح اماكن تانية مختلفة
ياريت وصف دقيق

هههههه طب معترض ليه بس ايه السبب
بالنسبة لاماكن المطاعم فى اسكندرية سهلة كلها حكتبهالك

**MoH.SaLaDiN** · 26-10-2013 11:57 PM

المشاركة الأصلية كتبت بواسطة mem

فى حديقه الازهر رائعه لو عايز مكان نظيف هادى مناظر جميله وده فى طريق صلاح سالم الدراسه
لو عايز اماكن تاريخيه متاحف فى عندك المتحف الاسلامى فى باب الخلق فى وش المحكمه
وفى عندك القلعه عند طلعه صلاح سالم من الاوتوستراد
وفى عندك المتحف المصرى بميدان التحرير
فى عندك الاهرامات فى الجيزه
فى عندك البرج لو عايز قاعده حلوه وكمان تشوف منظر القاهره من فوق
فى عندك مجمع سينمات فاملى بالمعادى على طريق الكورنيش
لو عايز ملاهى فى عندك دريم بارك فى 6 اكتوبر
مولات فى عندك سيتى ستارز فى مدينه نصر هيعجبك اوى
فى عندك مول العرب فى 6 اكتوبر رائع
اماكن دينيه عندك الازهر والحسين والغوريه وخان الخليلى
وياريت اماكن الناس اللى حضرتك قلت عليهم دول فى اسكندريه
يبقى الواحد يجربهم على شان يبقى اسمى رحت اسكندريه هههههه

انت كده فهمتنى الله ينور عليك انا فعلا عايز اروح حديقة الازهر وكنت بفكر اطلع معاها القرية الفرعونية فى نفس اليوم وممكن بليل اتعشى فى ستديو مصر بتاع نايل سيتى بس مش عارف حقدر اطلع الحاجات دى فى يوم واحد وهل هى قريبة من بعضها ولا لا
طبعا انا روحت المتحف المصرى قبل كده هو والاهرامات وقلعة صلاح الدين ومسجد محمد على وطبعا طلعت البرج وطلعت سيتى ستارز بس يستاهل يتراح تانى انا برده عايز اطلع مول العرب بيقولوا حلو اووى
بس كنت عايز اعرف الاماكن الترفيهية فى مصر الجديدة عشان لو لقيت الدنيا زحمة اقضيها فى اى حتة جنب الفندق وخلاص

**MoH.SaLaDiN** · 27-10-2013 12:15 AM

المشاركة الأصلية كتبت بواسطة MoH.SaLaDiN

السلام عليكم ورحمه الله

[justify] [/justify][justify]
اماكن المطاعم فى الاسكندرية
فطير دهب
فى منطقة سبورتنج على الترام اما م بوابة نادى سبورتنج يسهل الوصول اليه من على البحر (الكورنيش) تاخد من اول طريق مصر اسكندرية الصحراوى وتدخل على طريق قناه السويس لغاية ماتوصل لكورنيش البحر تاخد طريق البحر وتفضل ماشى فيه لغاية ماتوصل لمنطقة سبورتنج وتسأل على طريق يمين ينزلك على محطة ترام سبورتنج
عصير مكة
يوجد منه فروع كتيرة اسهلهم الشاطبى على البحر بعد مطعم راقودة مباشرة فى الشارع اللى يطلعك على كلية سان مارك
اكل من صواريخ او اولاد عبده
صواريخ ده فى بحرى بجانب قصر راس التين برده طريق البحر بس فى الاتجاه اللى يوصلك لبحرى اما وفيه جنبه الشيخ وفيق بيعمل ارز بلبن وايس كريم وكسكسى وام على ملهومش حل اما اولاد عبده وملك السمان فى العطارين وده عارفة بالشبه يعنى مش حعرف اوصف مكنهم بالضبط بالنسبة للعطارين بتوصلها بسهولة من محطة مصر بس دوول بيتراحوا بليل يعنى بعد 9 كده
قرية خطاب دى على طريق مطار برج العرب
يعنى لو حتمشى من طريق محور التعمير وفى اخر الطريق خالص بتمشى يمين اجبارى عشان تتطلع على طريق الساحل الشمالى عند قرية سيدى كرير بدل ماتكمل عشان تروح طريق الساحل خد يوترن وامشى فى الاتجاه المعاكس حتفضل ماشى فى الطريق لغاية ماتلاقى دوران حتلاقى خطاب على ايدك الشمال ممكن برده تاخد وصلة الكافورى اللى اولها من الصحراوى وبتعدى على الكينج مريوط تكمل فيها طوالى وبعد كده تمشى يمين حتلاقى خطاب على يمينك
طبعا قرية بلبع معروفة مكانها اول ما تدخل اسكندرية من الصحراوى حتلاقى على يمينك الداون تاون ادخل فيها حتلاقى قرية بلبع للمشويات والاسماك بس انصحكم بالاسماك اكتر لان مشويات خطاب وحسنى احسن فى الطعم والسعر واى استفسار تانى انا تحت امركم
وفى طبعا حاجات تانية بس الواحد مش مجمع انا اكتر حاجة بحبها فى اسكندرية قصر المنتزه وقصر راس التين وقصر المجوهرات طبعا قصر راس التين مش مفتوح للزوار عشان البحرية قاعدة فيه
[/justify]

**dede_dodo88** · 27-10-2013 12:45 AM

طالما مصمم تيجي القاهره فدي شوية أماكن ممكن تتبسط فيها,,
ممكن تروح سينما Imax في 6 أكتوبر..
مول العرب ممكن يكون ممل شوية لو أنت روحت سيتي ستارز قبل كده, فخليك في سيتي ستارز أحسن و فيه حاجات تتعمل أكتر..
Tivoli Dome في مصر الجديدة, فيها كافيهات و مطاعم و القاعدة فيها حلوة أوي..
Oasis في مساكن شيراتون و هتبقى قريبة أوي من الفندق, زي tivoli كده مليانة كافيهات و مطاعم بس أكبر شوية.. و لو روحت شيراتون يبقى تعدي بالمرة على wafflicious تضرب waffles لو ليك فيها,, و في جنبه مطعم Wild Burger حلو أوي برضه..
ممكن تجرب تروح تاكل في مرة عند البرنس في أمبابة لو ليك في الأكل الشعبي..
Down Town التجمع الخامس, القاعدة هناك بليل جامدة جداً و الجو بيبقى حلو أوي..
لو ليك في الأثار, مصر القديمة أعتقد هتبقى لطيفة..
سنتر IBC خلف البانوراما في صلاح سالم, فيه بولينج و بنج بونج و الذي منه بس بيبقى زحمة شوية..
لو ليك في الفنون, ممكن تشوف دار الأوبرا لو بتعرض حاجة كويسة في الفترة دي..
مفيش حاجة في دماغي تانية,, بس هي القاهره عموماً مملة و معظم الوقت بنقضيه في زحمة الطرق..
أجازة سعيدة و تنور القاهره :)

**JAM** · 27-10-2013 02:32 AM

طبعآ إنتا تشرفنا وتنورنا فى أى وقت
بس لو إنتا مصمم إنك تيجى القاهرة بزحمتها بتلوثها بخنقتها بقرفها ... يبقى
الله يرحمك

**Mamoud salah H** · 27-10-2013 05:43 AM

بصراحة مستغرب اوي ان حد ممكن يسيب اسكندرية في الشتااء وينزل القاهرة يتفسح دة اسكندرية في الشتاا متعة فظيعة

الهم لو مصمم بقي يبقي ربنا معاك فعلا
بالنسبة للفسح نبتدي بالمولات
1-مول العرب ف 6 اكتوبر ود اا بعتبه احسن من سيتي ستارز بكتيير عشان الجزء المفتوح بتاع النافورة والجناين وسعات بيبقي في حفلات بصراحة ممتع جدا وهتنبسط منه
2-سيتي ستارز في مدينة نصر وحضرتك بتقول انك روحته ف انا رائي تجرب الجديد وهو مول العرب

بالنسبة للمطاعم والكافيهات الراقية انا ماليش فيها اوي بس هقولك علي الي انا عارفه
1- اخطف رجلك لحد الرحاب كدة عند منطقة المطاعم والكافيهت جميلة جدا ونضيفة والناس هناك نضيفة ومحترميين
2-كومباني كافيه في الكوربة -مصر الجديدة
3-كوستا او سيلانترو في مدينة نصر او مصر الجديدة

بالنسبة للمطاعم الشعبية والقهاوي الي تعتبر شعبية وسياحية في نفس الوقت
1-قهوة البورصة في وسط البلد بس فيها بعض الاشكال الي ممكن متعجبكش سواء بنات او شباب
2-الحسييين ودي بقت بصراحة كلها متسولييين ولمت بمعني اصح
3-لو نفسك وزتك علي اكلة كباب وكفتة اطلع علي السيدة زينب عند رفاعي ودة اشهر واحد هناك مع انه في حارة منيلة بس هتلاقي عندة ممثلين ولعيبة وناس مشهورة كتيير
4-لو ليك في السمين والحاجات دي خليك في السيدة عندك ام هاشم وحبايب السيدة وكذا مطعم بيقدم الاكلات دي

بالنبسة للترفيه والملاهي وكدة
1-دريم بارك
2-مدينة الانتاج الاعلامي
3-حديقة الازهر ودي جميلة جدا وهادية ونضيفة

لو ليك بقي في المتاحف والاثار والجو دة
1-قلعة صلاح الدين في صلاح سالم
2-مصر القديمة والكنايس وكدة
3-المتحف الصري
ا
بس لو عايز تجرب الجديد بقي وحاجة ممكن متكونش عملتها قبل كدة
روح نزلة السماان عند الاصطبلات واتفق مع الناس الي هناك علي سفاري في الصحراا وعند الاهرام وكلو طبعا بالخيييل مش عربيياتتت بصراحة ممتعة جدا جدا
يعني رحلة سفاري بس بالخيوول

**MoH.SaLaDiN** · 27-10-2013 06:41 AM

المشاركة الأصلية كتبت بواسطة dede_dodo88

طالما مصمم تيجي القاهره فدي شوية أماكن ممكن تتبسط فيها,,
ممكن تروح سينما Imax في 6 أكتوبر..
مول العرب ممكن يكون ممل شوية لو أنت روحت سيتي ستارز قبل كده, فخليك في سيتي ستارز أحسن و فيه حاجات تتعمل أكتر..
Tivoli Dome في مصر الجديدة, فيها كافيهات و مطاعم و القاعدة فيها حلوة أوي..
Oasis في مساكن شيراتون و هتبقى قريبة أوي من الفندق, زي tivoli كده مليانة كافيهات و مطاعم بس أكبر شوية.. و لو روحت شيراتون يبقى تعدي بالمرة على wafflicious تضرب waffles لو ليك فيها,, و في جنبه مطعم Wild Burger حلو أوي برضه..
ممكن تجرب تروح تاكل في مرة عند البرنس في أمبابة لو ليك في الأكل الشعبي..
Down Town التجمع الخامس, القاعدة هناك بليل جامدة جداً و الجو بيبقى حلو أوي..
لو ليك في الأثار, مصر القديمة أعتقد هتبقى لطيفة..
سنتر IBC خلف البانوراما في صلاح سالم, فيه بولينج و بنج بونج و الذي منه بس بيبقى زحمة شوية..
لو ليك في الفنون, ممكن تشوف دار الأوبرا لو بتعرض حاجة كويسة في الفترة دي..
مفيش حاجة في دماغي تانية,, بس هي القاهره عموماً مملة و معظم الوقت بنقضيه في زحمة الطرق..
أجازة سعيدة و تنور القاهره :)

الله ينور ايه الحاجات الجامدة دى شوقتنى والله انا كنت ناوى ان شاء الله اروح مول العرب اول ماوصل عشان حيكون اقرب مكان ليه ويارب الاقى فيلم حلو ادخله فى imax بالنسبة ل tivoli dome انا كنت شوفتها على الخريطة بس مكنتش عارف معلومات عنها بس شكلها تستحق الزيارة بالنسبة لل down town ده اروحله ازاى ؟
الباقى معتقدش انى حالحق اعمل الحاجلت دى اصلا بس انا عندى سؤال هو ليه كل الناس بتقولى بلاش القاهرة هو فيه ايه بالضبط يا رجالة

**MoH.SaLaDiN** · 27-10-2013 06:51 AM

المشاركة الأصلية كتبت بواسطة Mamoud salah H

بصراحة مستغرب اوي ان حد ممكن يسيب اسكندرية في الشتااء وينزل القاهرة يتفسح دة اسكندرية في الشتاا متعة فظيعة
الهم لو مصمم بقي يبقي ربنا معاك فعلا
للاسف الزحمة بقت سيئة جدا فى الاسكندرية وعشان هى مدينة مش كبيرة فالبنسبة ليا زهقت منها لانها مفهاش حاجات كتيرة تتعمل وعايز اغير واشوف حاجات جديدة

بالنسبة للفسح نبتدي بالمولات
1-مول العرب ف 6 اكتوبر ود اا بعتبه احسن من سيتي ستارز بكتيير عشان الجزء المفتوح بتاع النافورة والجناين وسعات بيبقي في حفلات بصراحة ممتع جدا وهتنبسط منه
2-سيتي ستارز في مدينة نصر وحضرتك بتقول انك روحته ف انا رائي تجرب الجديد وهو مول العرب

انا فعلا ان شاء الله ناوى اروح مول العرب اول ما اوصل وممكن كمان سيتى ستارز لو الوقت سمح

بالنسبة للمطاعم والكافيهات الراقية انا ماليش فيها اوي بس هقولك علي الي انا عارفه
1- اخطف رجلك لحد الرحاب كدة عند منطقة المطاعم والكافيهت جميلة جدا ونضيفة والناس هناك نضيفة ومحترميين
2-كومباني كافيه في الكوربة -مصر الجديدة
3-كوستا او سيلانترو في مدينة نصر او مصر الجديدة

الرحاب مش عارف ممكن تكون بعيدة شوية بالنسبة للكوربة دى ارحها ازاى

بالنسبة للمطاعم الشعبية والقهاوي الي تعتبر شعبية وسياحية في نفس الوقت
1-قهوة البورصة في وسط البلد بس فيها بعض الاشكال الي ممكن متعجبكش سواء بنات او شباب
2-الحسييين ودي بقت بصراحة كلها متسولييين ولمت بمعني اصح
3-لو نفسك وزتك علي اكلة كباب وكفتة اطلع علي السيدة زينب عند رفاعي ودة اشهر واحد هناك مع انه في حارة منيلة بس هتلاقي عندة ممثلين ولعيبة وناس مشهورة كتيير
4-لو ليك في السمين والحاجات دي خليك في السيدة عندك ام هاشم وحبايب السيدة وكذا مطعم بيقدم الاكلات دي

مشكلة المطاعم الشعبية اماكنها فتقريبا كده مش حروحها بس شكرا على المعلومة

بالنبسة للترفيه والملاهي وكدة
1-دريم بارك
2-مدينة الانتاج الاعلامي
3-حديقة الازهر ودي جميلة جدا وهادية ونضيفة

حديقة الازهر ان شاء الله ناوى اروح بالنسبة لمدينة الانتاج الاعلامى ايه اللى ممكن يتعمل فيها

لو ليك بقي في المتاحف والاثار والجو دة
1-قلعة صلاح الدين في صلاح سالم
2-مصر القديمة والكنايس وكدة
3-المتحف الصري

دول زهقت منهم من ايام رحلات المدرسة الله يماسيها بالخير هههههه

بس لو عايز تجرب الجديد بقي وحاجة ممكن متكونش عملتها قبل كدة
روح نزلة السماان عند الاصطبلات واتفق مع الناس الي هناك علي سفاري في الصحراا وعند الاهرام وكلو طبعا بالخيييل مش عربيياتتت بصراحة ممتعة جدا جدا
يعني رحلة سفاري بس بالخيوول

شكلها جامدة بس بصراحة اقلق اطلعها من مراتى ممكن لو طلعت مع صحابى اكيد حاروحها

شكرا جدا على المعلومات الجامدة دى واى حاجة من اسكندرية انا فى الخدمة

**MoH.SaLaDiN** · 27-10-2013 06:58 AM

المشاركة الأصلية كتبت بواسطة JAM

طبعآ إنتا تشرفنا وتنورنا فى أى وقت
بس لو إنتا مصمم إنك تيجى القاهرة بزحمتها بتلوثها بخنقتها بقرفها ... يبقى
الله يرحمك

ههههههههههه
ربنا يرحمنا برحمته كلنا بس هو فيه ايه بجد هى ليه كل الناس عمالة تحذرنى من القاهرة وكأنى حاروح انتحر

لا بجد انا عايز اطمن هى البلد مالها كل ده عشان الزحمة طب ما اسكندرية زحمة برده جدا وبعدين المفروض ان القاهرة فيها كبارى وانفاق وطرق جديدة اللهم لا حسد يعنى ههههه

طب اروح فين يا رجالة كان نفسى اطلع شرم بس معايا بنوتة كده سنة ونص وعارف انى مش حعرف اعمل هناك اى حاجة من اللى نفسى لا غطس ولا سفارى ولا اكوا بارك فا لغيت الحوار والواحد جالى ملل من القعدة فى البيت ومن الخروجات المعتادة ومن ام الحظر ده حاجة طين بصراحة

**fourseasons** · 27-10-2013 07:32 AM

بص يا باشا مبدأيا كدة انقلك خبرة اسكندرانى عاش فى القاهرة سنتين و لسة راجع.

اول حاجة افضل حاجة انك تروح ذى ما الأخوة الأفاضل قالو يوم السبت او الجمعة الصبح.غير كدة لو لازم قوى يبقى تكون على المحور بعد بوابة القاهرة كدة من الساعة 11:30 الصبح ل 12:30 بسسسسسس غير كده حتكره حياتك بجد حتراخد كوبرى اكتوبر على طول من ميدان التحرير جمب المتحف المصرى كده فى طلعة اكتوبر بعد كدة تنزل نزلة حدائق القبة و تفضل ماشى جمب صور المترو على يمينك لحد ما توصل لكوبرى الحلمية الزيتون و تعدى الناحية التانية و تمشى فى شارع ابو بكر الصديق لحد كوبرى التجنيد و تخوش شمال شارع جسر السويس حتمشى شوية فية 5 دقائق حتبقى عند الفندق.طبعا فى طرق تانة كتير بس ديه احسن وصفة و افضاهم.وانا كنت ساكن فى الحلمية وده كان طريقى.فيه الدائرى برضوا و تنزل نزلة طريق اسماعلية الصحراوى يمين وتفضل ماشى فى شارع جسر السويس لحد متلاقى الفندق الناحية التانية على شمالك. تاخد اليو تيرن و تخوش...

مبدائيا كده افضل فسح ليك ال حتبقى ناحية مدينة نصر و مصر الجديدة غير كده حتبقى رحلة سفر لو من غير المترو.

عندك سيتى ستارز (مدينة نصر)
تيفولى دووم مصر الجديدة
صن سيتى مول طريق النصر من اوله عن مساكن شيراتون
عندق كارقور فى اول العبور وفيه جيرولاند جمبه وده فى مدخل مدينة العبور من طريق مصر الأسمعالية الصحراوى وده قريب من الفندق من 15 ل 30 دقيقة
فى حاجات بالهبل فى مدينة نصر تاكل عندهم و جامدين
عندك كشرى التحرير فى اول عباس العقاد ناحية سيتى ستارز الناحية التانية ده احسن بتاع كشرى فى مصر انسى بتاع كشرى التحرير ال عندنا على البحر فى ميامى.

طبعا ممكن تروح القلعة و الأزهر بارك كل ده من على طريق النصر و ممكن تخوش العتبة من عند جامعة الأزهر من عند مرور الدراسة بس منصحكش عشان الزحمة ال فى شارع الأزهر.

ممكن تزل وسط البلد بس بالمترو احسن حاجة تركن العربية فى اقرب محطة مترو و هى حلمية الزيتون تشوف اى جراج و تركن فيه و تاخد المترو اتجاه حلوان و تنزل محطة جمال عبد الناصر عند دار القضاء العالى وبيقولوا عليها محظة الأسعاف و هى تانى محطة تحت الأرض بعد الشهداء و انجوى بقى يا باشا نفس احساس محطة الرمل كده بس احسن شوية.

وممكن تكمل فى المترو لحد محطة السيدة زينب و تنزل يا تركب مشروع يا تتمشى و خلى بالك اوعى تقول مشروع ديه هناك هاهاهاهاهاهااهاه عشان يا اما حتتهرش انك اسكندرانى يا اما مش حيفهموك

وعيش بقى فى السيدة عندك بتوع السمين و المسامط بس مش كلهم كويسين.بصراحة مكلتش عندهم الأخوة الأفاضل ممكن يفيدوك احسن منى.

بالنسبة لأمبابة حيبقى مشوار غلس عشان تروح للبرنس بتاع الكبده و ممكن ما يعجبكش عشان الكبده فى القاهرة بتتعمل بالبصل مش اسكندرانى زى الفلاح و فهمى عندنا كده هاهاهااهاهاه بس عنده طواجن و حاجات كتير.

و ممكن تروح العتبة شبه احساس المنشية كدة بس على كبير قوى وديه ممكن تروحها زى ما قولتلك فى الأول من داخلة جامعة الأزهر و شارع الأزهر.يا اما بالمترو تنزل الشهداء و نفس الرصيف تركب المترو التانى بنفس التذكرة ما تتطلعش من المكنة تركب اتجاه الجيزة خلى بالك مش اتجاه شبرا .وتنزل اول محطة و هى العتبة و تفضل ماشى بقى لحد ما تطلع من المحطة كبيرة شوية تحت الأرض و تعيش يا باشا بقى الموسكى و الرويعى و العتبة و شارع الأزهر ولو نقصك اى حاجة مش لاقيها فى اسكندرية حتلاقيها فى العتبة "الصين الشعبية يا باشا"

اكسسوارات اوكر و ستائر و مفصلات عندك الرويعى
قطع غيار محمول بطاريات سماعات يعنى لو عندك تليفون قديم بايظ و عاوز تصلحوا فى شارع العطار من شارع الأزهر مش حتقدر تغمض عنيك هاهاهاهاها.

وعندك شارع عبد العزيز زى شارع شكور عندنا كده واكتر.

ومن الملاحظ كده من كلامى ان معظم التحركات تبقى بالمترو وصدقنى زحمة المترو شوية ولا الزنقة فى العربية فى القاهرة اجارك الله مش حتطيق نفسك

وبالنسبة لمول العرب فهو روعة فى الفسح بس ده فى 6 اكتوبر فا افضل حاجة تروحوا و انت مروح من القاهرة عشان حتبقى رحلة العزاب و الضنا و انت راجع للقاهرة منه هاهاهاهاهااه. تاخد طريق المحور وما تنزلش نزلة اسكندرية الصحراوى لأ كمل وعدى هيبر وان و كمل و عدى جامعة النيل وهو قدام مستشفى دار الفؤاد . ده بقى صرح لوحده كدة زى سيتى ستارز بس افقى مش رائسى مسطح واسع جدا ولو على الأكل فا فى عندك الفود كورت فيها كل حاجة وواسعة فحت و سقف مغطى واسع عامل زى عنبر السفن كده فى المينا هاهاهاهاهاها مش زى الأوضتين وصالة بتاعت كارفور اسكندرية بتاعنا هاهاهااه.

وانت راجع بقى فى طريق جامب مول العرب كده ده حينزل على الطريق الصحراى بدل ما ترجع تانى كل ده ده حينزل على الطريق الصحراوى بعد بوابة القاهرة ب 20 كيلو تخيل حيوفر معاك 20 كيلوا....

وتروح و ترجع بالسلامة ان شاء الله.