استفسار بخصوص المصفحة وعوامة البنزين سكودا فليشيا 1996

السلام عليكم ورحمة الله وبركاتة

من فترة بفكر اركب المصفحة ومكسل أو خايف من كام حاجة وهي

لو حصل تسريب مياة مش هشوفو
لو حصل تسريب زيت من الموتور مش هشوفو
لو حصل تسريب زيت من الفتيس مش هشوفو

بس قررت اشيك على كل حاجة فى العربية واعمل اي حاجة فيها علشان عاوز عربيتي ميكونش ناقصها مسمار .
لاني اتعرضت لموقف وأنا ماشي على الكورنيش كان فيه مياة كتير وفيها مادة بيضا معرفش اية هيا ودخلت فى الماية دي وانا ماشي 60-70 تقريبا

بعد ماروحت قولت اطمن واشوف اية اللى حصل فى العربية .......... لقيت الحوض مليان طراطيش وعلى الموتور وعلي الفتيس وكمان على عمة الكاربيراير فقررت أركب المصفحة لانها كدة مهمة جدا خصوصاً فى الشتاء لو الدنيا مطر العربية ممكن تعطل لو جية ماية على المشط او الاسبراتير او الموبينة .

السؤال
+ انواع المصفحات
+ ياتري كلة بيركب على بعضة يعني فليشيا 96 زي ماقبلها ومابعدها
+ اللي بيبيع المصفحة ممكن يركبها علشان لو فيه اختلاف مابين المصفحة واماكن التثبيت
+ ازاي بعد كدة اطمن ان مفيش تسريب سوائل ( زيت ...... مياة )
+ هل عملية هتحمي العربية من المياة والاتربة علشان فعلا الموتور كل اسبوع لازم انفخة بالبلاور بيبقي علية تراب كتير
+ كلنا بنشتكي ان العربية واطية ياتري المصفحة هتخليها واطية اكتر
+ منين أجيب المصفحة
+ سعرها كام




وكمان استفسار ملوش علاقة بالموضوع دة



هيا عوامة البنزين اخرها فين فى التانك

بعد تفكير أنا شايف ان تنك العربية عريض مش عميق
يعني العوامة أكيد جايبة اخر التنك علشان العربية تقدر تمشي باخر شوية بنزين فى التنك

طيب لية بنقول متمشيش لحد العربية متخلص بنزين ولمبة البنزين تنور ماهو كدة كدة العوامة بتجيب من اخر التنك حتي لو مليان على الاخر ........... ارجو التوضيح

ودي صورة للفليشيا أكدت الفكرة

http://www9.0zz0.com/2013/10/26/11/111779572.jpg

منتظر التعليقات للتوضيح

المصفحة اللى راكبة عندى غير دى خالص
واهميتها بتبان فالشتاء فلو هتجيبها يبقى احسن وافضل ومقلتليش عملت ايه فى الوكالة نزلت ولا لا

المصفحة اللي عندي مش زي اللي في الصورة، هي راكبه من قدام وواصلة للثلث الأول للموتور فقط، يعني مش مغطية الحوض كله من تحت، بالاضافة ان فيها ثقب تحت فلتر الزيت مباشرة علشان لو فيه زيت سقط ينزل على الارض. واعتقد ان فيها ثقوب تانيه بس مادورتش قوي.

وهي فعلا بتحمي العربية من تحت بس مش لدرجة انها تحميها من التراب. التراب هيدخل من حيث لاتدري.

ومش بتوطي العربية بزياده لان الاكصدام بيكون اوطى منها.

تشتريها ازاي ومنين، بصراحة ماجربتش علشان انا شاري العربية كده.

موضوع العوامة، ممكن افتي واقولك يمكن علشان تركيز الشوائب هيكون عالي لما يقل البنزين، لان الشوائب بتتحرك مع رجة العربية مش لازم تتركز تحت قوي يعني.


تقبل مروري.

اقتباس:

---

المشاركة الأصلية كتبت بواسطة المنسي

المصفحة اللى راكبة عندى غير دى خالص
واهميتها بتبان فالشتاء فلو هتجيبها يبقى احسن وافضل ومقلتليش عملت ايه فى الوكالة نزلت ولا لا

---

والله يا استاذ منسي انا حاليا بعمل دراسة جدوي لكل اللى عاوز اشترية وعاوز أنزب مرة واحدة واشتري كل حاجة دفعة واحدة لقلة الوقت الفاضي وان شاء الله لما استقر على كل المشتريات هكلمك ونحاول نظبط مع بعض

بالمناسبة انا كلمت ابو اسلام كام مرة وتليفونه مقفول دايما

انا عندي المصفحه دي موجوده
وعلي فكره انا كنت رحت لميكانيكي كان بيغير قاعده الموتور اللي عند الفتيس وفك المصفحه ديه
ولما قلتلو ركبها قالي ارميها احسن علشان بتلم تراب وزيت وملهاش اي لازمه
وطبعا انا مسمعتش كلامه وركبتها

انا كان معايا رقم واحد في عزبه شلبي اسمه ابراهيم كنت شاري من عندو كوناكت من 3 شهور
هشوف الكارت بتاعه واتصل بيه اسأله وارد عليك

المصفحة اللى عندى غير دى خالص يعنى ممكن نعتبرها نصف مصفحة وبتركب بقيفزان بلاستيك من تحت ودى بتحمى الدينمو والمارش من مياة الأمطار....

اما بالنسبة للمصفحة اللى فى الصورة دى خنقة خالص يعنى كل لما حتحب تغير الزيت لابد من فكل البلوة دى كلها وانا اعتقد انها بالشكل دى ملهاش لازمة عندنا لأنك مستحيل تعرف اخبار الموتور من اسفل الا لما تفكها فلو عاوز ركب مصفحة الفيفوريت هى نص وبتقى الدينمو والمارش من الماء وهؤلاء اهم حاجة نحافظ عليها من المية....


بالنسبة للبنزين انتا ممكن تمشى بالعربية لأخر قطرة فى التانك بس دا يؤدة الى دخول بعض الرواسب الى امسالك البنزين من اول المواسير حتى بكات الحقن فعلشان كدا بنقول بلاش تخلى التانك يفضى على الآخر لتفادة الرواسب المؤكد انها موجودة فى تانك البنزين....

المصفحة اللي حضرتك بتتكلم عليها في ناس بيقولوعليها كساحة وانا اشترتها استعمال خارج وهي 3 قطع وصنفرتها وجبت اسبري اسود وبختها وبقت فبريكا وركبتها وكنت شريها ب 70جنيه

المصفحه الي في الصورة دي بتاعت افلام الاكشن , بتركب للعربيات لمى يكونوا عاوزين يعملوا مشهد اكشن وهيقلبوا العربيه او هايخلوها تطير مثلن من فوق كبري اجاركم الله فبيركبوها عشان تسهل المسائل :11:

لكن دي مش للعربيات خالص ومحدش يعملها لانها خطر وبالتوفيق ان شاء الله .

المصفحة عباة عن صاجه رقيقة فى الثلث الاول وليست كما فى الصورة وهى تحمى من بعض الخبطات البسيطة وحكة المطبات البسيطة والحصى والزلط اللى ممكن يضرب اسفل الموتور لكنها ليست بالقوة اللى تمنع خبطة قوية وليست مهمه للدرجة
يعنى لو لفيتها امامك خير وبركة ولو ش هتلاقيها بسهولة طنشها
روح الحرفين ملاين بلاوى بس اسعارهم عالية لازم تفاصل وتسال كتير