الموضوع: مقارنة بين بروتون ساجا و داتشيا رينو لوجان

السلام عليكم و رحمة الله و بركاتة
انا هعمل النهاردة مقارنة بين العربيات الشعبية اللي بين 70-نو85 الف اللي هما الساجا واللوجان و الفيرنا و اللانوس
نبتدي على بركة الله
اول حاجة الساجا...
العربية ثابتة و كويسة جدا في الطريق السريع و في الزحمة و دة علشان البودي بتاعها صغير من برة و هي اثبت واحدة في الفئة دية الموتور 94 حصان حسب التوكيل السحب ممتاز جدا و على فكرة الموتور 1300 سي سي بس بيدي احسن من اي موتور 1500 او 1600 العربية واسعة و مريحة من جوة التقفيل كويس بالنسبة للسعر العربية صاجها متين و مواصفات خليجي و التكييف ممتاز و التأثير على السحب بسيط جدا
الشنطة واسعة و جميلة جدا العربية شكلها رائع و دة من وجهة نظري الشخصية سعر اعادة البيع كويس جدا كماليتها كتييييييييييييييييييييييي يييييييييير جدا العربية فيها قضبان حماة خلفية و جانبية
العيوب
العربية اتنين ازاز كهربا بس
استهلاك البنزين عالي بالنسبة ل1300 سي سي و لكن اقل من اللوجان
قطع الغيار مش هتلاقيها عند اي حد
نيجي للوجان
العربية و اسعة جدا جدا جدا جدا جدا من جوة هتنبهر لما هتقعد فيها العربية ثابتة جدا على الطريق الجنوط بتاعتها 15 و دية الوحيدة اللي بتزل جنوط 15 في الفئة دية العربية منتشرة جدا و اعادة بيعها كويسة و قطع الغيار متوفرة و على الشنب النيكل اللي ورا محلي شكلها اوي
العيوب
التكييف ضعيف و دية مشكلة الرينو كلة مش اللوجان بس
و بيأثر علة السحب
الموتور ضعيف بس منقدرش نقول علية بطة يعني
الفوج بتاعها صغير
العتب فية تشققات و على فكرة مش موجودة في الساجا المشكلة دية
الخلاصة
الثبات:متقارب بين الاتنين لكنة في صالح الساجا علشان اوطى من اللوجان
الانتشار:اللوجان طبعا
اعادة البيع:بالنسبة للسعر الاتنين كويسين لكن بالنسبة للسرعة اللوجان تفوز
التكييف:الساجا
تأثير التكييف على السحب:الساجا
تواجد قطع الغيار:اللوجان
التوكيل:اللوجان
الكماليات:الساجا
قوة الصاج:الساجا
التوفير في البنزين :الساجا
الشكل:مسئلة اذواق
الباور:الساجا
بس كدة
يعني لو عايز كماليات و توفير في البنزين و قوة الموتور تبقى الساجا
لو عايز الوسع و الانتشار و العائلية عموما اللوجان
شكرا لكم