أنا حاسس بالغدر يارجالة...عاوز رأيكوا (تأمين سيارات)

يارجالة!
إشتريت عربية من شهر و متأمن عليها في مصر للتأمين حصل الأتي:

1-دفعت فلوسها كاملة...مع إن فيها شوية شغل يتصلح ع حساب التأمين بحوالي 7 ألاف جنيه و التأمين بإسم صاحب السيارة. ولكن مقابلته المحترمه و الوسط المحترم اللي هو عايش فيه دفعني إني أثق في كل كلمه منه...أصله دكتور جامعه و دي عربية إبنه..ناس كلاس شوية.

2- الراجل باع السيارة و هو بيقول إنه هايمشيلي في إجراءات التصليح بإسمه عشان أعرف أستفيد بالتأمين...محدش تاني يقدر يخلص الموضوع ده غيره عشان هو مالك البوليصة....طبعا لو نقلت العربية بإسمي الشركة مش هاتغطي التصليحات دي ليا و هاتصهين و هاتعاين العربية على كده و تغطي أي أضرار تحصل بعد كده إنما قبل كده يبقى لأ....فاهمين؟

3- الراجل عمل الدنيئة ! :khd:و طنش عمايل المحضر و مرة يرد ع التليفون و تسعة لأ...طبعا قفشت و هو طبعا حاططني تحت ضرسه...الموضوع بقى فيه كلام حاد لغاية أخيرا قرر إنه يخلصلي إجراءات معاينة العربية في التأمين.

4- خلصها ... و أنا هأصلح على حسابي و هو يرجع يعاينهالي في التأمين و يصرف الفلوس بإسمه و يديهالي تاني.

5- أنا بقيت شاكك انه هايديني الفلوس بتاعتي اللي هايستلمها...هل فيه طريقة قانونية تخليني أكمل أنا الإجراءات بعقد البيع اللأبتدائي اللي معايا و أصرف أنا الفلوس؟....انا معايا توكيل منه ببيع و شراء العربية و تخليص معامالات مرورية للعربية فقط . العربية لسه باسمه على فكرة و انا لسه مانقلتش ملكية.

6- أنا متأكد إنه هايماطل جدا على مايديني الفلوس و ممكن مايديهاليش... و المبلغ كبير و ممكن يعدي ال7 ألاف.

7- أسف جدا جدا ع الإطالة...أخوكم و الله مخنوق و عاوز مساعدة.

خلى الراجل يعملك توكيل تانى فى الشهر العقارى بانك تتعامل مع شركة التامين و تقبض الفلوس أو تصرف الشيكات الصادرة من الشركة نيابة عنة

و خد بالك ان شركة التامين هتلع شيك مش كاش.

والشيك بيطلع بعد كام شهر مش فى ساعتها

و ربنا يوفقك إنشاء الله

اسمع مني اللي هيحصل يا باشا و خللي بالك ميغركش الكلام و لا المناظر الراجل من الاخر عايز ياخد هوة تمن التصليحات من التأمين و يضرب عليه عشان مستخسر فلوس التامين تروح عليه نصيحة لوجه الله اخصم تمن التصليحات من تمن العربية دول ٧ الاف فحرام يعني خليه هوة يعيش حياتو مع التامين و اخصم حق التصليح

يا راجل يا طيب في حد يدفع تمن العربيه كلها وهي لسه فيها شغل !! طيب كنت اتفقت معاه انه يخلصهالك وبعدين تشتريها ,
عموما حصل خير , شركات التأمين بتتعامل بطريقتين ,
1 : بيعملوا معاينه قبل الاصلاح وبعدين انت بتصلح العربيه فالمكان اللي يعجبك وبعدين معاينه بعد الاصلاح وبعدين يطلعولك شيك بالقيمه ( وطبعا عمرها ما بتكون نفس القيمه اللي انت دفعتها لازم بتخسر كتيررررررر عشان هما حرميه ونصابين زي ما كلنا عارفين ) .
وخد بالك من حاجه مهمه, معظم شركات التأمين ما بيعتمدش اجمالي قيمة قطع الغيار الاصليه من التوكيل وبيحملك منها 5% استهلاك عن كل سنه بالاضافه الي 10% امتياز تصليح بالتوكيل ,,, وبيحسبك بس علي سعر القطع التقليد الي بتتباعك فاي حته غير التوكيل , يعني التيواني والصيني كدا يعني ,,حرميه جدااااااااااااااا للاسف ..
الشيك بقي اللي هايطلع دا بيكون باسم صاااااااااااااااااااااااا حب البوليصه اللي هو المستفيد او المؤمن له اللي اسمه مكتوب عالبوليصه وبالتالي الشيك بيطلع مكتوب عليه ( يصرف للمستفيد الاول فقط ) وبكدا بقي انت لو جبت ابو القانون مش هايعرف يصرفلك الشيك , فالحل انه هو يصلح العربيه من فلوسه وبعدين انت تحاسبه ويبقي مثلا في بينكوا ورقه كدا ,او انه يعملك توكيل بالتعاملات الماليه امام الجهات الحكوميه وصرف الشيكات والتعويضات وبكدا ممكن تصرف( ودا طبعا في حالة انكوا عاوزين تصلحوا انتوا العربيه وبعدين تصرفوا التعويض ) بس باردو قبل ما تعمل اي خطوه لازم تسئل شركة التأمين عشان كل شيخ وليه طريقه وماتنساش اننا في مصر بلد الافتكاسات في كل المجالات ..

2: انت بتعاين العربيه عندهم وتختار مركز صيانه من اللي مكتوبين علي ضهر البوليصه وتكون شركة التاأمين بتتعامل معاه وفي بينهم حساب مفتوح , بتروح ترميله العربيه وهو بيعمل كللللللللللللللللللللل اللازم وبعدين بيكتبه في مقايسه (قطع غيار + اصلاح ) وبيبعته لشركة التأمين وهي تصدر الشيك بأسم مركز الصيانه وانت ولااااااااااااااا ليك داعوه باي حاجه ,, انت بس فالاخر تروح تستلم عربيتك جاهزه وتمضي بالاستلام وانها تمام ومالكش دعوه باي حوار ,,اعتقد ان الحل دا كويس عشان (مش هايدفعك اي حاجه لا انت ولا هو عكس الطلريقه 1 ) وهاتستلم العربيه وبس , بس لازم بقي تختار مركز كويس وتثق فيه عشان انت هاتسيب العربيه هناك مش اقل من اسبوع ,,
يا رب اكون قدرت افيديك ,
هذا والله اعلم , وبالتوفيق وربنا معاك ,

شكرا يارجالة ع نصايحكوا...الحقيقة مش أنا اللي إشتريت ده الوالد قام بالواجب و أنا مسافر و هو توسم فيهم الخير و دفع الفلوس...بس نتيجة التأخير في الإجراءات من طرف البايع إحنا مابقيناش طايقين بعض لدرجة إني متأكد لو فاتحته في أي توكيل هايصهين و هايصرف الفلوس لحسابة مش دناوة منه بس عشان يعاقبني.

ع فكرة أنا بدأت في تصليح العربية بالفعل من 10 أيام و اشتريت قطع الغيار في ورشة من طرفي..و طبعا مافيش مجال للرجعة و انا كده كده صرفت و لبست (لمؤاخذة).

أنا كنت عاوز أعرف اذا كان العقد اللي معايا ده ينجزني و لا لأ و خلاص وواضح من كلامكو إني لازم أستحمل و أدادي في الراجل لغاية ما أخد فلوسي...أشكركم مرة تانيه و طبعا لو في إقتراحات أخري أنا أبقى ممنون.:11_5_14[1]:

ياترى عملت ايه وما الجديد عندك