ركن الأوتوماتيك على منحدر من غير شد فرامل اليد

**Abdelmoneem** · 27-10-2013 12:21 AM

السلام عليكم،،

أنا بقالي سنة تقريبًا بسوق أتوماتيك وبعتبر نفسي لسه في مرحلة التعلم، المهم، أنا من عادتي إني بستسهل يعني بعمل الحاجة بأقل مجهود، عشان كده من ساعة ما عرفت إن الأوتوماتيك في وضع الركن p مبتتحركش وأنا بركنها على طول بدون شد فرامل اليد على عكس ما كنت متعود دايمًا في المانيوال، ما دام كده كده مش هتتحرك ليه أعشق فرامل اليد؟ الـ p كفاية!

وبعد فترة ابتديت أروح مشاوير أضطر أركن فيها على منحدر، زي مثلاً بعض الشوارع المنحدرة في مدينة نصر، فكنت بركن العربية على p من غير شد فرامل اليد، المشكلة بقه إني لما آجي أطلع بالعربية وأدور وآجي أدي الغيار d أحس بنتشة جامدة جدًا وأنا بنقل من الـ p، وطبعًا إحساس فظيع لأني عارف أن فيه حاجة غلط وفيه مشكلة وكان عندي شك كبير إني اشتريت العربية وفيها عيب في منظومة الفتيس، وفضلت فترة كبيرة على الحال ده، كل ما أركن على منحدر العربية تنتش جامد وأنا طالع، لغاية في مرة وأنا بركن واحد ابن حلال معرفوش كان واقف لاحظ اللي بعمله وقال لي "شد فرامل اليد عشان متحملش على التروس"، الله يباركله، بعد ما قال لي على المعلومة دي، من ساعتها كل ما آجي أركن، خصوصا على منحدر، بشد فرامل اليد "قبل ما اشيل رجلي من على فرامل الرجل" عشان مديش أي فرصة العربية تحمل على التروس بدل الفرامل، وبعد كده أجيب الـ p، والحمد لله النتشة اختفت تمامًا، وأدينا بنتعلم.

**amr011111** · 27-10-2013 12:26 AM

كلام سليم تماما

**Anxs111** · 27-10-2013 12:35 AM

أنا مش خبير هل في تحميل علي التروس ولا علي إيه بالظبط بس الأكيد إن فرامل إليد أحسن وأأمن وممكن كمان تحد الدركسيون ناحية الرصيف عشان لو مشيت تريح علي الرصيف ...

**BLOODY_STONE** · 27-10-2013 12:37 AM

حضرتك مكسل تشد فرامل ؟!

انت تتاخد ملك الروقان عالطول

**speed_magnum** · 27-10-2013 12:49 AM

فعلا .. فرامل اليد افضل تكون مشدودة قبل ما تجيب الفتيس على ال p

**Abdelmoneem** · 27-10-2013 01:23 AM

فيه موقف تاني حصل معايا نسيت أقوله، عشان الناس تتخيل خطورة إنك تركن أوتوماتيك على منحدر بدون فرامل يد، مرة شلت العربية بونش وديتها توكيل أبورواش، وأنا بطلع العربية على الونش شديت فرامل اليد، يعني كله تمام، المشكلة بقه لما وصلت التوكيل والونش بينزل العربية، السواق رفع الونش عشان العربية تنزل وقال لي بصورة تلقائية "شيل فرامل اليد" (طبعًا هو مش خبير أوي عشان يقول لي "لو أوتوماتيك مور الأول وبعدين شيل فرامل اليد") اللي حصل إني تلقائيًا استجبت ليه من غير تفكير وشلت فرامل اليد "قبل ما أمور على الـ n" وطبعًا العربية بدل ماكانت مريحة على فرامل اليد، ريحت على الفتيش جامد، تخيلوا الونش مرفوع والعربية مايلة بزاوية 45 درجة! ومحملة على الفتيس! وطبعًا كانت صعوبة شديدة إني "أنتزع" الفتيس بقوة من الـ p لـ n عشان العربية تنزل، وكان الفتيس "بيرزع" وأنا بنقل، والله قلبي كان موجوع ساعتها ع الفتيس، بس معلش محدش بيتعلم بسهولة.

**2CODE** · 27-10-2013 02:49 AM

صحيح والله محدش بيتعلم بسهوله لكن تابعنا هنا في المنتدى هتتعلم حاجات حلوه اوي ان شاء الله

**saddam** · 27-10-2013 06:33 AM

صديقي المواطن
اﻷوتوماتيك له أصول الشركات توصي بها ومحدش بيطبقها ولكني بصراحة ملتزم بيها منذ الطفولة
يعني لا يجوز تحريك الفتيس من الوقوف إلى اﻷمام أو إلى الخلف من غير ما تكون رجلك عالفرامل والفتيس ينقل ثم تشيل رجلك وتدوس بنزين وكذلك في الزحمة تحطه على n ثم لما ترجع تمشي تاني تدوس فرامل ثم تنقل ثم تمشي ليه لسببين أولا كده قواعد المكنة والفتيس بدل متشيل ثقل العربية حتشيل ثقل العادي ﻷنك مفرمل فحتمد في عمر القواعد ثانيا مش حيحصل تحميل ثقل السيارة على كلتشات الفتيس يعني دايما تلاقي اللي بيدوس فرامل قبل النقلات تلاقي فتيسه زيرو ومفيهوش تأخير ولا بوش إنما المهمل دايما تلاقي فتيسه فيه تأخير في الرجوع للخلف وضعف على الواحد وطبعا الشركات تعبت تنصح الناس ومفيش فايدة ففي شركات عملت ريلاي بين الفتيس وضوء الفرامل لو رجلك مش عالفرامل مش حيتحرك عصاية الفتيس وبالتوفيق وإلى اﻷمام ومن نصر إلى نصر
ودمتم للنضال

**حماده المصري** · 27-10-2013 02:48 PM

كويس انك عرفت الحمد لله

انا مره سوقت النترا ال P بتاعها كان مكسور تقريبا بسبب الحوار ده

تخيل العربيه مش راضيه تجيب ال P اساسا صاحب العربيه يحمد ربنا ان الالنترا من العربيات الي بترضى تطلع المفتاح من الكونتاكت بدون ما يكون على ال p في عربيات المفتاح مش هيطلع غير لما الفتيس يكون على P

-

الموضوع: ركن الأوتوماتيك على منحدر من غير شد فرامل اليد

LinkBack

أدوات الموضوع

عرض

ركن الأوتوماتيك على منحدر من غير شد فرامل اليد - انشر الموضوع فى :

-

-

-

المواضيع المتشابهه

فرامل اليد

فرامل اليد

فرامل الرجل ( فرامل اليد ) ضعفت قوى ... اعمل ايه

فرامل اليد

فرامل اليد

الكلمات الدلالية لهذا الموضوع

المفضلات

المفضلات

ضوابط المشاركة