استفسار عن فاتورة المياه لشقه في اكتوبر
السلام عليكم ورحمة الله
الموضوع ان عندنا شقه في اكتوبر مقفوله من 2010
قبل كده كانت متأجره والناس كانوا بيدفعوا الفواتير عادي جدا
وطبعا احنا بعد ماقفلناها بنروح كل فين وفين
من فتره رحنا لقينا فواتير مياه كتيره كل واحده فيهم بمبلغ 212 جنيه تقريبا
سألنا على ادارة المياه ورحنا واستفسرنا والموضوع كالأتي
قالوا اننا علينا مبلغ اقل من 5000 جنيه بحاجه بسيطه
ازاي واحنا في 2010 قلنا عايزين ندفع كل اللي على الشقه واتدفع
كان الرد كالتالي
تحصيل المياه كان مع الجهاز تقريبا لحد 2008
طبعا المحصلين في خبر كان
والفواتير اللي بتيجي 30 او 40 جنيه هي تقديرات جزافيه
في 2008 تقريبا عملوا الهيئه دي ولا مش عارف اسمها ايه عشان المياه
ونزلوا هما يشوفوا العدادات
طبعا العداد بتاعنا مشبّر ومش باين منه حاجه
وشفنا في الدفاتر ان من 2008 (لما مسكوا هما الموضوع) فعلا مكتوب (لم يستطيع القراءه) او حاجه كده
وعملنا معاينه وفكينا الزجاج بتاع العداد واخر رقم متسجل صح فعلا ويساوي المبلغ المكتوب كمديونيه
طبعا هما مقسمين المبلغ على كذا فاتوره + متوسط (وعشان يشيلوا المتوسط بس طلبوا شهاده من الكهرباء ان الشقه مقفوله من 2010)
السؤال هنا اللي عايز افهمه واللي مكانش عندهم رد ليه
انا ذنبي ايه في الموضوع ده ؟
وذنبي ايه ان الجهه القديمه مكانتش بتاخد القرايات ؟؟؟
وهل يجوز ان الهيئات تتغير وتاخد مديونيات الناس معاها ؟؟؟
يعني انا لو كان بيوصلني قرايات صح
كنت دفعت او اللي ساكن كان دفع
انما يحولوها من جهه لجهه والجهه التانيه تقول اصل القدام مكانوش بيقروا ؟!!!!
حد ليه تجربه مشابهه ؟؟ لأني سمعت ان موضوع المياه بتاع اكتوبر ده منتشر
وناس اعرفهم دفعوهم حوالي 3000 جنيه برضه
وبصراحه الارقام دي استهلاك مباني كامله مش شقق !!!!!!
انا ساكن في شقه في منطقه تانيه العماره مادفعتش مياه من 4 سنين وعلى شقتنا 340 جنيه !!!!
(البيت 10 شقق بس) !!
حد عنده حل عشان انا مرارتي خلاص