حد عنده افكار جديده لديكور محل ملابس؟؟؟

**eslamrace** · 27-10-2013 02:19 PM

اخواتنا الاعضاء الكرام
بما اننى ان شاء الله حبدأ فى عمل الديكورات للمحل بتاعى بدايه من اخر الشهر الجاى فمحتاج اقتراحاتكم للديكورات والشنط وخلافه للمحل ولو حد عنده فكره جديده فى اى حاجه يبقى تمام جدا

انا عندى تصور لكل حاجه بس بصراحه حابب اسمع واشوف اراء مختلفه يجوز الاقى افكار افضل "وطبعا انتم عارفين ان احنا فى زمن الديروقراطيه ولازم نطرح الموضوع للاستفتاء"

وخاصه موضوع الشنط لان التصور اللى عندى مكلف شويه فيجوز الاقى حاجه افضل وتوفر وبرضه الارضيات لانى لسه مستقرتش على باركيه ولا بورسلين وشكله ايه وايهم افضل
اه نسيت اقولكم ان النشاط حيكون ملابس رجالى واكسسوارات رجالى "محافظ وساعات ونظارات شمس و خلافه" ومساحه المحل حوالى 10 متر "هو صغير بس بصراحه انا تعمدت يكون صغير لان الفرش لمحل اخويا 27 متر اتكلف كتييير جدا وانا مش مستحمل الصراحه"

حابب اسمع اراءكم ودعواتكم ونصايحكم
تحياتى .