علبة الدركسيون و خرطوم باور ب 6500 جنيه للأوبترا، تشخيص منصور و تصليح كابوريا
السلام عليكم
الحمد لله على ستره و الشكر كل الشكر لأخويا كريم منير و الأسطى محمد كابوريا
ايه الحكاية
الموضوع باختصار فى نقاط
يوم الجمعة 11 اكتوبر كنا نازلين القاهرة لتمضية العيد
نزلت الشنط 5 صباحا و باكشف على الزيوت و مياه التبريد لقيت زيت الباور ناقص حوالى 1 سم
زودته و قعدت الف الدركسيون لقيت نقط ضعيفة بتنزل من عند علبة الدركسيون بس الدنيا كانت ضلمة و ماشفتش كويس
صحيت زميلى ميكانيكى الفندق، غسل علبة الدركسيون كويس و رفع العربية و جرب لقى ترسيب من خرطوم و شد على الافيز اللى ماسكه
قالى خلى معاك علبة زيت و اتوكل على الله و ان شاء الله سليمة
طول الطريق كنت قلقان و كشفت حوالى 5 مرات كان بيبقى فى تسريب بسيط، يعنى اقعد ربع ساعة عقبال ما تنزل نقطة واحدة
الحمد لله وصلنا القاهرة و تانى يوم الصبح كنت واقف قدام مركز صيانة منصور اللى فى مدينة نصر الساعة 08:00 صباحا
العربية دخلت كشف الساعة 10:00 تقريبا و لحسن الحظ دخلوها فى المنطقة الوحيدة اللى باينة من زجاج الاستراحة
2 فنيين، فتحوا الكبوت و بصوا 10 ثوانى و بعدين رفعوا العربية و بصوا من تحت 10 ثوانى
جالى المهندس قالى علبة الدركسيون و خرطوم باور محتاجين تغيير علشان ضاربين، العلبة 4500 جنيه و الخرطوم 800 جنيه، يعنى بالمصنعية و الضريبة اكتر من 6500 جنيه
قلتله يا باشمهندس انت متأكد؟ انا مش شايف انهم كشفوا كويس
قالى انا متأكد، قلتله خلاص انا هاخد العربية علشان مش معايا المبلغ ده.
خرجت من هناك فى اتجاه الحرفيين و صحيت كريم منير من النوم قلتله الحقنى، كتر خيره بعتنى لورشة نايل موتورز و خلى احمد يروح معايا الأول للعفشجى
كشف العفشجى على العلبة قالى سليمة و خلى الميكانيكى يشوف التسريب منين
ودانى احمد حسب تعليمات كريم لمحمد كابوريا الميكانيكى
قعدنا حوالى 4 ساعات، نغسل الحوض و نزود زيت و نراقب التسريب جاى منين لغاية ما تأكد ان خرطوم طوله حوالى 10 سم بيسرب
بعتنى اشتريت ربع متر خرطوم ضغط باور و افيزين، دفعت 10 جنيه
غير الخرطوم و رحت رفعت العربية فى بنزينة موبيل اللى عند منزل الكوبرى و غسلت العفشة و الحوض كويس قوى
رجعتله و قعدنا نجرب نص ساعة الحمد لله مفيش تسريب
قالى اعمل النهاردة و بكرة مشوارين تلاتة و شوف و كلمنى لو حتى فى اجازة العيد اجيلك مطرح ما تكون
الحمد لله من ساعتها العربية ماشية زى الفل و عملت بيها ييجى 1000 كم
يوم الثلاثاء اللى فات كلمت خدمة عملاء منصور و اشتكيت و امبارح كلمنى مهندس و حكيتله تانى الموضوع
الموضوع خلص على انه الحمد لله ان ربنا ستر و احنا اسفين و لو تحب تطمئن روح اقرب مركز خدمة نكشفلك على العربية
الحمد لله تانى و تالت و ربنا يكملها بالستر و شكرا يا كيمو على المساعدة القيمة و شكرا لمحمد كابوريا على امانته.
