كسر زجاج عربيتى وسرقة محتويات بها

**A.Saad** · 30-10-2013 04:53 AM

الحمد لله اولاً
حسبى اله ونعم الوكيل ثانياً

امبارح الصبح ركنت امام شغلى فى القرية الذكية
وبعدين لقيت ان المحفظة فى جيبى فقلت اسيها فى العربية لانى نسيتها فى الشغل ساعات
فرجعت وفتحت الباب اليمين وحطيتها على الكرسى اللى جنبى
الركنة قدام الشغل
بين العربية وبين بوابة المبنى الرئيسية حوالى 100 متر
جنبى جنينة
اخر النهار نزلت لقيت الزجاج الجانبى مكسور
التابلوة مفتوح
محتويات درج الباب مبعترة فى السيارة
على ما استوعبت الصدمة لقيت ان المحفظة اتاخدت وتليفون قديم
الكاسيت والولاعة والطفاية زى ما هى
المفاجأة : اتصلت بالبنك اوقف الفيزا
لقيت ال............ اللى سرقنى حاول يسحب بيها فلوس من داندى مول ويشترى كمان من كارفور
الشرا منفعش لان الفيزا كانت تطلب الباسورد اما تشترى بيها وللاسف دى انا كنت هاوقفها وانقل حسابى بنك تانى

عايز اركب زجاج جديد
المفروض اعمل ايه

**Khaled Lanos** · 30-10-2013 05:13 AM

حمد لله على سلامتك يا استاذ سعد وربنا يعوض عليك
بصراحة انت غلطان لأن الموضوع دا قتل بحثا في المنتدى ودايما كنا نقول محدش يسيب حاجة ملفتة للنظر خالص في العربية وانت حاطط المحفظة على الكرسي فهتلفت نظر جامد وبالتالي هتكون معرضة أكتر من غيرها للسرقة.
لكن متزعلش على الحاجة اللي راحت هي نصيبها كدا الحمد لله المهم تاخد بالك المرة الجاية.
بالنسبة للزجاج ممكن تروح دكتور جريش مثلا لو الإزاز نفس النوع.
هو إزاز لعربية ايه؟

**A.Saad** · 30-10-2013 05:21 AM

وضع المحفظة غلط تماما بس الواحد كان مدى الامان لان المكان قدام البوابة ومش سمعنا عن حاجة هناك قبل كدة
فى المشاوير اللى برة كنت بحرص واخللى المحفظة معايا
لكن بصراحة انا فعلا غلطان
الزجاج كيا بيكانتو 2009

**Ahmed Amin** · 30-10-2013 05:24 AM

المشاركة الأصلية كتبت بواسطة ahmed_adham

قدر الله وما شاء فعل. مهما كان المكان أمان متسيبش حاجه فيها الطمع باينه من الازاز والمحفظه كانت تبقى في الدرج أحسن من ما تسيبها على الكرسي.

كنت عايز أقول نفس الكلام دا وأكد عليه,
حتي لو ركنت راكن في باركنج عليه حراسة, متسيبش حاجة علي الكرسي الجانبي أو علي الطابلوة أو حوالين الفتيس ملفتة للنظر,

وربنا يعوضك خير, وحسبي الله ونعم الوكيل في اللي أستحل أنو يكسر أزاز عربيتك ويسرقك ويحاول يشتري حاجات بالفيزا بتاعتك.

**Silent~Dream** · 30-10-2013 06:01 AM

حسبى الله و نعم الوكيل انا مش عارف الناس دى بتقبل ازاى فلوس حرام على نفسها ؟ و زى الاخوه الاعضاء ما وضحوا ان الموضوع ده اتقتل بحث فى المنتدى عشان منهريش كثير الواحد بلاش يسيب فرصه واحده فى الميا تكون سبب فى كسر ازاز حتى لو سندويتش بجنيه فما بالك بمحفظه او سرقه عربيه الواحد يسيب العربيه شغاله ثوانى هيجيب حاجه و يحاول يركب انذار و قفل دركسيون و يركن فى مكان مضمون و ربنا يستر

**Elawany13** · 30-10-2013 08:07 AM

ياعم حرام عليك
وانت راجل مخضرم فى المنتدى وشوفت قصص وحكايات وروايات فى الفترة اللى فاتت
وتسيب المحفظة على الكرسى !!!
ده الواحد بيخاف يسيب الفكه أو كيس فيه شويه طماطم على الكنبة !!!

قدر الله وماشاء فعل
خير الحمد لله