that moment .. امبارح كان عندي فرح في دار "المدفعجية" في شارع الثورة
خلصت اليوم روحت اركب العربية ادور مش عايزة تدور .. حاولت معاها كتير مفيش فايدة .. قولت يبقى اكيد فلتر البنزين شكله عملها خصوصاً اني مغيرتوش بقالي كتير
قعدت اكارك بنزين لحد ما دارت العربية قولت كدة اتظبطت خلاص
وانا ماشي في طريقي وفي بنزينة وطنية جمب سيتي ستارز دخلت احط بنزين وبغبائي بطلت العربية ![Fun 36 3 4[1]](images/smilies/fun_36_3_4[1].gif)
طبعا العربية مدارتش تاني بعد ماعملت قرد ونزلت تحت العربية وفكيت فلتر البنزين وقولت اسلكه بالهوا وقد كان .. بس مفيش فايدة لقيت العربية مش عايزة تدور
فكرت في طلمبة البنزين هيا السبب بس لقيتها شغالة وبتعمل زنة .. بصيت على البطارية وسلوك البوجيهات وكل حاجة طبعاً انا كنت لوحدي والوقت كان داخل على حظر ومفيش ميكانيكي في البنزينة قولت اركنها لحد تاني يوم
النهاردة روحت وخدت اساحبي يحيي معايا عشان نشوف ايه الكلام .. في اللحظة دي مبقاش في صوت طلمبة بنزين تحس انها ميتة .. وكمان المارش مبيلفش .. ولما اجي ادور العربية اسمع تكتكة كأن البطارية نايمة !!!!!!
جبت عربية خدت منها وصلة لقيت التكتكة اختفت والمارش شغال عادي يبقى ناقص نشوف الطلمبة
جبت ميكانيكي من المحطة بص عليها قال دي طلمبة فاصلة روحت طيران على شارع دمشق جبت قلب الطلمبة بتاعت كريستالة 99 ب 100 جنيه والاختلاف بسيط بينها وبين الاصلية هتتحل بــ" ترامل " وجبت سلك وعدة وروحت راجع للعربية
طبعاً فك الطلمبة معجزة واللي ساعدني اكتر ان يحيي صاحبي عنده خلفية في الكلام ده .. وقد تم فك الطلمبة بنجاح
نيجي بقى لفك القلب وده المستحيل في حد ذاته .. وبعد محاولات كتير مني ومنه معرفناش نوصل لحل
يحيي اقترح ان بعد الترزيع في الطلمبة والخبط ومحاولة الفك ده انه ياخد وصلة من الطلمبة للبطارية علطول وفعلا تم والمفاجأة ان الطلمبة سليمة
بعد كدة نيجي لعملية التركيب المتعبة جداً واصعب من فكها بس الحمد لله تم التركيب بنجاح نيجي نوصل الفيشة بتاعت الكهربة مش شغالة .. طب ايه يا عم يحيي هنعمل ايه قالك ناخد وصلة تاني نجرب هتشتغل ولالا خصوصاً ان مستحيل افك الطلمبة تاني بعد التركيب
وبعد ماخدت الوصلة لقيتها اشتغلت والبنزين نازل من مكان الخرطوم
نيجي بقى للحاجة الغريبة جداً وهيا دي لب الموضوع .. طلع في اخر اليوم ده ان العيب من "الارضي" بتاع الطلمبة .. وتم حل المشكلة اني خدت حتة سلك من الفيشة بتاعت الطلمبة وتم توصيلها بمسمار تثبيت الحزام في الكنبة
نيجي بقى للسؤال الصعب .. ايه اللي يخلي الارضي يفصل ؟ وازاي ؟ واشمعنا ؟
معلش انا طولت بس قولت احكي كل حاجة بالتفصيل عشان لو حد لاقدر الله وقع في المشكلة دي
المفضلات