طاب مساعدة لاخوكم المبتدأ ... فى جولييت 2004

**the necromance** · 31-10-2013 09:19 PM

السلام عليكم
ماشاء الله لقيت هنا ناس كتير خبراء وعندهم علم وبيحيوا مساعدة الناس لله واستفدت كتير من المنتدى الرائع ده
وده شجعني اطلب منكم الطلب ده واتمنى الافاده
العبدلله معنديش اي خبره في العربيات واتنقلت نقله كبيره بالنسبالي من 127 كحيانه الى دايو جوليت 2004 منوال لسه شاريها مستعمله ماشية 115 الف
طبعا قبل ما اشتري كشفت عليها في مركز صيانه وكمبيوتر قالولي تمام واتوكلت على الله
دلوقتي بقى مشكلتي اني مش عارف احدد هل العربيه سليمه فعلا وده الطبيعي بتاعها ولا محتاجه تتظبط بحكم خبرتي القليله مع العربيات النضيفه :)

1- اول مشكله بحس ان العربيه مبتسحبش او مبتجريش زي ما كنت متخيل بفضل دايس على البنزين كتير لحد ماتجمع يعني مثلا ممكن توصل ل 100 كم بعد اكتر من نص دقيقه او دقيقه كمان ب rbm طبيعي من غير حرق وعلى الطوالي مبتعديش ال 120-130 !!!

2- تاني حاجه مش عارف احدد استهلاك البنزين طبيعي ولا لأ لان العداد بيهيس بيثبت فترة ومره واحده الاقيه قل جدا لكن عموما انا حطيت 30 لتر قعدوا معايا يومين لف طول اليوم جوه البلد وطوالي مش قادر احدد مشيت كام كيلو ياريت تقولولي كده كويس ولا ايه ؟

3- تالت حاجه بقى والاخيرة بسمع صوت طقطقه من العجل ورا وقدام ناحية اليمين على المطبات والحفر او لما ادوس فرامل

ياريت تقولولي هل عندي حاجه تتظبط واعمل فيها ايه ولا كده طبيعي ؟
اسف على الاطاله ومتشكر جدا مقدما

**the necromance** · 31-10-2013 10:01 PM

وعموما تنصحوني بايه عشان اطمن على العربيه واخد احسن كفاءة منها ؟

**Salamonti** · 01-11-2013 01:35 AM

أول نقطة = اسطوانة دبرياج (طقم الدبرياج بيعمل حوالي 500 جنيه)

تاني نقطة = احسب استهلاك تفويلة كاملة على عداد الكيلومتر بتاع العربية وشوف خدت كام لتر ومشيت كام كيلو

آخر نقطة بقا روح لعفشجي واكشف عالمساعدين لأن معروف ان الدايو ناعمة أوي ومش مفروض تسمع الطقطقة دي خالص

**a_mohamedsamir** · 01-11-2013 07:58 AM

أولا ألف مبروك
وربنا يديك خيرها ويكفيك شرها

ثانيا

المشاركة الأصلية كتبت بواسطة the necromance

1- اول مشكله بحس ان العربيه مبتسحبش او مبتجريش زي ما كنت متخيل بفضل دايس على البنزين كتير لحد ماتجمع يعني مثلا ممكن توصل ل 100 كم بعد اكتر من نص دقيقه او دقيقه كمان ب rbm طبيعي من غير حرق وعلى الطوالي مبتعديش ال 120-130 !!!

راجع على البوجيهلت واسلاك البوجيهات لانها ممكن تأثر على السحب والاستهلاك
ومعتقدش اسطوانه وديسك لان العربيه مش ماشيه كتير

المشاركة الأصلية كتبت بواسطة the necromance

2- تاني حاجه مش عارف احدد استهلاك البنزين طبيعي ولا لأ لان العداد بيهيس بيثبت فترة ومره واحده الاقيه قل جدا لكن عموما انا حطيت 30 لتر قعدوا معايا يومين لف طول اليوم جوه البلد وطوالي مش قادر احدد مشيت كام كيلو ياريت تقولولي كده كويس ولا ايه ؟

علشان تحسب الاستهلاك صح
فول التانك لحد الزور
امشى مشوار 100 كيلو بدون تكييف فى طريق مفتوح
من غير قرص على العربيه يعنى الخامس وسرعه 100
ارجع لنفس المحطه
فول لحد الزور
شوف استهلكت كام لتر

المشاركة الأصلية كتبت بواسطة the necromance

3- تالت حاجه بقى والاخيرة بسمع صوت طقطقه من العجل ورا وقدام ناحية اليمين على المطبات والحفر او لما ادوس فرامل

ياريت تقولولي هل عندي حاجه تتظبط واعمل فيها ايه ولا كده طبيعي ؟
اسف على الاطاله ومتشكر جدا مقدما

روح لحد بتاع عفشه كويس يكشف عليها

**shur3000** · 01-11-2013 03:38 PM

صوت طقطقة ورا وقدام فى الغالب بيقى بلى عجل الخلفى الجوز ب100 واﻻمامى ب140

**ahmed_3omda** · 01-11-2013 04:14 PM

جبتها بكام ياباشا وربنا يباركلك فيها :)

**elnakshabandy** · 01-11-2013 04:36 PM

قبل اي حا جه اعمل طقم صيانه
تغيير زيت وفلتر
تغيير فلتر الهواء ونظف البوابه
تغيير البوجيهات وسلكها
الكا تينه والبليه والسير اسأل صاحب العربيه القديم غيرهم امتى على كم كيلو تقريبا
للامان غيرهم احسن
اعمل اختبار لدبرياج

ربنا يباركلك فيها ويعطيك خيرها ويكفيك شرها

**the necromance** · 01-11-2013 06:15 PM

متشكر جدا ياشباب ربنا يكرمكم ويجازيكم خير

**Mahmoud.Fathy** · 01-11-2013 08:36 PM

اعمل صيانة الأول ... غير بوجيهات - سلوك بوجيهات - فلتر هواء - فلتر بنزين - فلتر زيت - زيت موتور - سير كاتينة - بلية شداد كاتينة - سير دينامو - سير تكييف - اكشف على مياه الريداتير - اربط العفشة كويس - اكشف على الكاوتش - رجلش فرامل اليد - اكشف على تيل الفرامل لو محتاج يتغير غيره واسحب منها الهوا

لو السحب متظبطش يبقى ممكن حاجات كتير (طلمبة بنزين ضعيفة - ديسك واسطوانة - احد الحساسات مش شغال كويس ودا هيحتاج سكانر) ... على العموم متقلقش كلها مشاكل بسيطة بس المهم ندور على المشكلة بالتدريج عشان متصرفش كتير على الفاضي

اخر حاجة زي ما الناس قالولك روح لعفشجي كويس يقولك الطقطقة من ايه ...