عاوز اخد راى الاعضاء فى موضوع شخصى بخصوص الشغل

**eng/muhamad** · 31-10-2013 09:42 PM

السلام عليكم
اخوكم محمد مهندس مدنى دفعة 2011
بدون الخوض فى تفاصيل الوقت من ساعه التخرج الى الان
المهم انا دلوقتى شغال فى شركة مقاولات غير معروفة بنتعامل مع الجيش
حجم الماريع مش صغير و مش كبير يعنى فى حدود ال 30 مليون
لكن اسما هى غير معروفة
من كام يوم عملت انتر فيو فى شركة يابانية فاتحة فرع جديد فى مصر و الحمد لله نجحت
لحد دلوقتى مفيش اى مشكله
نيجى للاهم
انا حاليا فى شغلى مليش مواعيد ثابته يعنى تقريبا بروح الساعه 9 و بمشى 2 او 3 يوم ما بتاخر بمشى 4
فى الشركة الجديدة مواعيد الشغل من 8 ل 5
حاليا انا قريب من بيتى الشركة الجديدة بعيده و لو نزلت موقع هيكون فى اكتوبر يعنى بعيده جدا
الخبرة طبعا فرق كبير فى مستوى الخبرة شغلى حاليا شغل نمطى لكن الشركة اليابانية هيكون فيها شغل هندسة تقيل و فى خبرة كويسة
بعد كل ده نيجى للاهم جدا و هو المرتب هاخد فى الشركة اليابانية نفس مرتبى الحالى مفيش زيادة
انا بقى محتااااااااااااااااار اقبل العرض اليابانى و لا لا
ياريت راى الاعضاء و كل واحد يقولى اختار رايه بناء على ايه

**matrix_it** · 31-10-2013 09:49 PM

راى انك تروح الشركة اليابانية حتى لو مفيش فرق مادى بس الميزة انك هتكون (نحلة) يعنى كل يوم فيه جديد و خبرة دة لو فعلا الشغل هيبقى تقيل و هتطور نفسك و هترفع سعرك بعد الخبرة اليابانية :d

**aw2100** · 31-10-2013 11:35 PM

بص انا من النوع الحريص قوى وخصوصا فى اكل العيش
انا شايف ان اللى تعرفة احسن من اللى ماتعرفوش وطالما مافيش منفعة من التعيين فى الشركة اليابانية ودرجة المخاطرة هنا عالية خصوصا فى شركات الأستثمار ممكن يمشوك فى اى وقت وباهيف سبب وحصلت مع ناس كتير ودول مافيش مشاعر بمعنى ممكن يستغنوا عنك فى اى وقت فلو مافيش امكانية الرجوع لوظيفتك الحالية لو سيبتها مانصحش تسيبها لكن لو تاخد اذن صاحب الشغل الحالى وتشرحله الموضوع وتقولة انك حتجرب الشغل ده وتاخد وعد لو ماعجبكش ممكن ترجع شغلك تانى يبقى روح بس حاسب قوى وفكر كويس وربنا يوفقك !!

**saddam** · 01-11-2013 02:08 AM

صديقي المواطن
من خلال عملي مع بعض الشركات اليابانية سابقا مع شركات العطور والتجميل فأحب أقلك إذهب إليهم ولو بنصف مرتبك ﻷن هناك العمل متعب ولكن مستواك سيرتفع وإن نصحت معهم فسيوصلوك للآفاق ولما تسيبهم بخبرتك وإسم الشركة ده حيضمنلك شغل كويس جدا في الخليج أو ألمانيا وبعدين اﻹلتزام بالمواعيد حيخلي حياتك متعبة ولكن أسعد من دلوأتي

وهناك باب آخر لكي أنصحك بها وهو عندي أهم شيء
شوف يا صديقي المواطن لو لم تكن مقداما زي 90% من المصريين ومحبتش تطور نفسك وتطمح نحو اﻷفضل ودايما حاطط في بالك عصفور فب اليد خير من عشرة عالشجرة وشوية اﻷمثلة المسيئة للشخصية المصرية من قبيل من خاف سلم وإن مرحتش فإنت كده حتقتل روح الطموح والحلم واﻹرتقاء بنفسك نحو اﻷفضل وحتفضل طول عمرك هو ده تمامك والشاعر بيقول
ومن يتهيب صعود الجبال يعش أبد الدهر بين الحفر

وأنا شايف إن مرتب الشركة الجديدة أحسن إزاي بقه وإنت بتقول هو هو نفس المرتب حنجاوبك ونقول إنت بقالك 200 سنة شغال في شركتك ولسه حالا وصلت لمرتبك الحالي أما شركتك الجديدة فأول طريق النضال حيبتدي بنفس مرتبك فمش معقول بعد سنتين من الشغل معاهم مثلا حتفضل نفس المرتب
هذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**saddam** · 01-11-2013 02:14 AM

المشاركة الأصلية كتبت بواسطة aw2100

بص انا من النوع الحريص قوى وخصوصا فى اكل العيش
انا شايف ان اللى تعرفة احسن من اللى ماتعرفوش وطالما مافيش منفعة من التعيين فى الشركة اليابانية ودرجة المخاطرة هنا عالية خصوصا فى شركات الأستثمار ممكن يمشوك فى اى وقت وباهيف سبب وحصلت مع ناس كتير ودول مافيش مشاعر بمعنى ممكن يستغنوا عنك فى اى وقت فلو مافيش امكانية الرجوع لوظيفتك الحالية لو سيبتها مانصحش تسيبها لكن لو تاخد اذن صاحب الشغل الحالى وتشرحله الموضوع وتقولة انك حتجرب الشغل ده وتاخد وعد لو ماعجبكش ممكن ترجع شغلك تانى يبقى روح بس حاسب قوى وفكر كويس وربنا يوفقك !!

صديقي المواطن
أنت في جمهورية مصر العربية ولست في المدينة الفاضلة أي صاحب عمل لو علم أن موظفه يريد العمل في مكان آخر حيمشيه قبل أن يروح للشركة التانية فعلا وكمان لو لا قدر الله ورجعله فحيدوس في بطنه جامد بحجة جرب غيري تعرف خيري
هذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**eng/muhamad** · 01-11-2013 10:30 AM

و الله انا فى حيرة كبيييييييرة

**Nistelrooy** · 02-11-2013 03:35 AM

" صلاه استخارة "

**ياسر مصطفي** · 02-11-2013 03:56 AM

صلاة استخارة اولاً

بعدين انا عن نفسي كنت بروح شغل في اماكن بعيدة واوقات بدون مرتب عشان اخد بس خبرة

وانت بتتكلم عن شركة يابانية يعني خبرة بجد وشغل بجد

اعتقد ان الفرق الوحيد هوا ان الشغل يبقي بعيد شوية اسمحلي اقلك

لو بعيد وفلوس اقل وتعب اكتر .. مقابل بس انك تاخد خبرة على حسب كلامك اذهب وتوكل على الله

المسلم كَيسُ فطن
أعقلها وتوكل

**Ahmed_Adham** · 02-11-2013 06:19 AM

انت لسه شاب وفي بدايه حياتك وان مكنتش تتعب وتاخد المخاطرات دلوقتي هتتعب وتخاطر امتى؟ لما يبقى عندك بيت وأولاد والتزامات؟

انقل للشركه والجديده وربنا يكرمك ومفيش مانع تحاول تساوهم على زياده عن الراتب القديم ولو حتى بسيطه بس عشان العامل المعنوي عندك يتحسن انما مفيش شك الشغل في شركه كبيره هيفيدك فنيا وبعد كده لما تطلع من عندهم لو حبيت هتطلع على حاجه محترمه بالاسم اللي انت هتسيبه والخبره اللي معاك.

بس هما ازاي نشنو بالمللي على نفس الراتب القديم؟ ولا انت كنت كاتبه لما قدمت عندهم؟

الموضوع: عاوز اخد راى الاعضاء فى موضوع شخصى بخصوص الشغل

LinkBack

أدوات الموضوع

عرض

عاوز اخد راى الاعضاء فى موضوع شخصى بخصوص الشغل - انشر الموضوع فى :

-

-

-

-

المواضيع المتشابهه

موضوع عاوز اخد رأيكو فيه بخصوص الجين2

ملاحظات على المناقشه التي تمت بين الاعضاء بخصوص موضوع الحمد لله على نعمة الهوندا

ملاحظات على المناقشه التي تمت بين الاعضاء بخصوص موضوع الحمد لله على نعمة الهوندا

موضوع لافادة الاعضاء بخصوص التيش والبارات

الكلمات الدلالية لهذا الموضوع

المفضلات

المفضلات

ضوابط المشاركة