تركيب اريال كهربا لفيرنا هاف اوبشن
ازيكم يا جدعان اخباركم ايه :Ka_che1[1]:
طبعا بقالي يومين تلاتة اربعة كدة بسأل على الاريال الكهربا وانواعه والكلام دا :nemoflow:
النهردة الحمد لله جبت اريال تايواني من التوفيقية بسعر 130 جنيه
طبعا انا قلت تركيبه مش هياخد 10 دقايق وهنجز في الوقت وأركبه انا
وفعلا لما رجعت الجراج فكيت الفبر الي في الجنب ناحية الاريال وشلت الاريال المانيوال وبدأت اشوف هوصل الكهربا دا ازاي !
هو فيه 3 سلوك
أسود وأحمر وأخضر -دا بالنسبة للاريال - الاسود دا أرضي والاحمر دا كهربا والاخضر دا اوديو
المفروض اني الاقي الوان مشابهة في العربية
لقيت فيشة واصل ليها 3 سلوك أحمر ورمادي وأسود
بعد تتبع السلوك وكدة تأكدت ان دي الخاصة بالاريال ولكن الفيشة دي متركبش على سلوك الاريال !
طب اعمل ايه ممممممممممممممممممممممممم :mahf(5):
قلت خلاص مبدهاش أقطع الفيشة دي مش مشكلة يعني
وكان تفكيري المنطقي ان سلوك العربية الاحمر دا كهربا والرمادي دا اوديو والاسود دا ارضي
ووصلت السلوك على هذا الاساس
ياعم الحج انطق واطلع حالف يمين بعظيم مهو طالع :argue1:
وانا وقفت وبلمت ومش فاهم فيه ايه
بالخطأ لمست السلكين الاسود والرمادي ودا عمل قفلة مع الكاسيت وهنا قلبي وقع في رجليا بصراحة :eek:
قلت الكاسيت طار وبعد شوية من الهدوء قلت اكيد فيوز فتحت علبة الفيوزات وقعدت ادعبس على الفيوز لحد ما لقيت فيوز الكاسيت وفعلا كان ضرب فقمت جايب فيوز الاير باج من جوا -فيوزات اضافية- وقمت مركبه مكان فيوز الكاسيت واشتغل زي الفل
بعد دعبسة قاربت من 3 ساعات تقريبا وتجربة السلوك وما شابه اكتشفت مدى عبقرية العم غبور الله يحرقه :nemoflow:
هو عامل الرمادي كهربا والاحمر اوديو والاسود دا ملهوش اي لزمة في الحياة اساسا !
وصلت احمر الاريال برمادي العربية
وأخضر الاريال بأحمر العربية
والاسود بتاع الاريال قمت رابطه بمسمار في جسم العربية زي الاريال المانيوال بالضبط
شغل الكاسيت يا عم الحج
هيييييييييييييييييييييييي ييييييييييييييييييييييه الاريال طلع :tumb:
كان التحدي التاني !
هثبته ازاي خصوصا انه جاي بدون هولدر ليه وانا برده وقفت مبلم تاني بس اللي خلانا نعرف نوصله مش هنعرف نثبته يعني :mahf(5):
قلت طب ما تبتكر يا واد يا اشرف
هو جاي معاه حديدة طويلة كدة معرفش طريقة تركيبها ايه
ولكن قمت فاكك الهولدر بتاع الاريال القديم وقمت موسعه على قد الجديد وقمت مركبه وبعدين قمت عامل وصلة بالحديدة اللي جاية مع الجديد وقمت رابطهم في بعض وقمت مثبته في جسم العربية
بعد التركيب لقيته مايل لقدام شوية :mahf(5): وانا ميعجبنيش الحال المايل :nemoflow:
قمت فاكك تاني وعدلت وضعه بحيث يبقا فيه ميل بس لورا :tumb:
وقفلت على كدة وقبل ماقفل الفبرة تاني قمت مشغل وقافل كذا مرة -بطمن بقا - :nemoflow:
لقيت كله زي الفل فقمت مقفل على كدة
للأسف القصة اللي كان المفروض تاخد 10 دقايق خدت 3 ساعات بسبب لخبطة السلوك وبسبب اني مش متمكن اوي في قصة الكهربا دي :mahf(5):
بس بيني وبينكم بعد التركيب ونقاء الصوت وخصوصا اني لسة مغير السماعات فانبسطت بصراحة وقلت مبروك عليا :nemoflow:
معذرة معرفتش أصور لأني كنت لوحدي والدنيا كانت ضلمة وكنت شغال بكشاف
بس التجربة تستحق بصراحة :tumb: