الموضوع: مطلوب أخس 20 كيلو (عاوز اعرف مركز جيم كويس بمدينة نصر )

السلام عليكم ورحمة الله وبركاته،،،

أكبر غلط إنك تبص للرجيم إنه فتره مؤقته هاتنتهي لما توصل للوزن اللي إنت عاوزه

وأكبر غلط برضه إنك تعمل رجيم قاسي

ممكن تخس في شهر بس غالباً هاتتخن تاني وإحتمال أكتر من الأول

الحل إنك تغير أسلوب حياتك وتتخلى عن العادات الغذائيه السيئه وتغير عقليتك

يعني مثلاً:

حاول تقلل السكر بالتدريج. أنا كنت باشرب 3 ملاعق سكر دلوقت بقالي سنين باشرب ملعقه واحده وباستمتع جداً بطعم الحاجه كده.

حط لنفسك قانون إن بعد الساعه 7 مساءاً ما تاكلش أي حاجه تقيله .

إبعد عن الوجبات السريعه وقللها على قد ما تقدر

لما تتزنق في الشغل أطلب سندوتشات فول بدل سوسيس مثلاً. الفول أفيد وسعراته أقل

في حاجات ممكن تتخلى عنها بسهوله وهاتفرق معاك كتير في السعرات. زي المايونيز مثلاً. المايونيز ده قنبلة سعرات.

حاول تبطل البيبسي أو تقلله خالص. وما تشربش دايت بيبسي عشان في كلام إنه مضر وعشان أنا قرأت إنه بيخلي جسمك يحتاج سكر زياده أصلاً وبيخليك تاكل سكريات.

خلي المشي كل يوم نص ساعه أو أكتر كده حاجه مقدسه زي الصلاه ما فهاش مجال للتفكير أصلاً إذا كنت تعملها ولا لأ.

عود نفسك إن السلاطه دي حاجه ما ينفعش تاكل من غيرها. ولما تاكل فاكهه كلها قبل الأكل مش بعده

إعمل رجيم طبعاً بس مش قاسي: وماتخليش الرجيم يبوظلك حياتك. يعني لما تكون معزوم كل عادي وفي المناسبات زي العيد مثلاً كل عادي. وطبعاً ليك يوم فري كل أسبوع ويستحسن يكون في الويك إند


الموضوع ده هايخسسك بس على مدى طويل شويه, بس مش هاتحس إنك متعاقب ولا متأزم

وفي النهايه هايخليك تكتسب عادات غذائيه وصحيه كويسه هاتفضل معاك طول عمرك