تقيم لوجان ما بعد 7000 كم

السلام عليكم و كل عام و انت بخير رمضان كريم
كما و عدتكم ..ده تقيمي المتواضع من واقع تجربة السيارة فعليا حتى 7000 كم و استنادا على خبرتي البسيطة

فى البداية ده الينك بتاع موضوع ليا عن السيارة حتى 1300 كم ارجو الرجوع اليه الاني هكمل عليه
http://www.nilemotors.net/Nile/showthread.php?t=34629

المميزات :
ما في الموضع المذكور اعلاه بالاضافة الى
- علو السيارة ميزة قوية في شوارعنا العظيمة + عفشة من الواضح انها حمالة قسية . الحمد لله الحمد لله محكتش في ولا مطب مهما كان حمولتها و لا العربية بتريح على العجل الي ورا . و انا بأكد مهما كانت حمولتها ...اتمنى تستمر على كده يا رب
- كمبيوتر الرحلات الى فيها ...اختراع عظيم جميل جدا انه يكون موجود في عربيتك
- الباكتات السوداء الى في الاكصدمات الي في ناس كتير بتكرها بداعى الشياكة ...بتحمى الاكصدام من الحكات البسيطة و تحافظ على منظره العام

العيوب :
- من وجهة نظري التكيف بيأثر على اداء الموتور لكنى متكيف مع هذة التأثير لأني مقتنع بأن طبيعي ان التكيف يأثر على موتور من هذا النوع و القوه شواء في اللوجان او غيره - هو عندي بيبان على الاول و التاني لكن لما بتجري بيخف لحد ال120 يظهر تاني شوية

التوكيل:
رحت عملت الصاينة بتاعت ال 5000 في المقطم ..ناس كويسين ..اخدت معاد بالتلفون ...رحت في معادي العربية اعدت ساعة و ربع و استملتها و مدفعتش جنيه ..لكن الملحوظة انهم مرضيوش يشتغلو فيها بالنسبة لوضوع الصوت العالى للمحرك و قالوي لازم اجيبها يوم من 8 الصبح و ده مينفعش غير بعد رمضان و الا العربية هتبات عندهم عشان مواعيد رمضان ..بصراحة مشيت لأني مكنش ينفع اسيبها و قلت هعملها مع الصيانة الي جاية ...و اكدت عليهم ان لوفي حاجة هتتغير هتكون على حساب الضمان قالو ايوه

اتمنى اكون مفيد لكم و انا تحت امركم في اى سؤال

ربنا يبارك ليك فيها يارب بس كنت عايز استفسر ايه اخبار الباور و هل هو كهربا و لا هيدروليك

شكرا يا باشا على التقييم

شكرا على التقييم .... بس هو كمبيوتر الرحلات ده فايدته ايه يعنى بالضبط؟؟؟ ..... يعنى صوت الموتور العالى ده حيبقى ليه حل عندهم وحيقل يعنى؟؟... كمان ايه احسن طريقة تستخدم بيها التكييف وميأثرش على الموتور والسحب لان وانت ماشى فى البلد الواحد بيجيب التانى كتير برضه مش قليل ؟؟؟؟

شكرا على الاهتمام

الف شكر علي التقييم ربنا يباركلك فيها

جزاكم الله كل خير يا استاذ عمرو على التقييم وربنا يبارك لحضرتك في العربيه ان شاء الله وتفضل على طول مبسوط معاها ويبعد عنك اي مشاكل .

hobby10 ==== السؤال عن كمبيوتر الرحلات.

هو عباره عن معلومات موجوده في الشاشه اللي في العدادات ودي وظيفتها اكتر من حاجه يعني
1-عداد مسافات وده اتنين يعني نقدر نقيس مسافة كبيره مثلاً زي ما انا باستخدم اصفر واحد كل شهر مثلاً عشان اقدر احسب متوسط الكيلو متر المقطوع الشهر ده قد ايه .....والثاني باصفره كل ماعمل سفريه مثلاً او مشوار محتاج اعرف مسافته قد ايه بالظبط.
2-بيحسب البنزين المستخدم قد ايه من آخر مره اتصفر فيها .
3-بيحسب العربيه فاضل فيها بنزين قد ايه ويمشيها كام كيلو متر كمان.
4-بيحسب ميعاد صيانة العربيه كيلو متر و وقت يعني كل 10.000 وتقريباً كل سنه لئن الزيت في الموتور يفقد خصائصه الوظيفيه تقريباً بعد الوقت ده......(قد يكون اقل من سنه لكن اقصد توضيح ان في حساب زمني يحسب )
5-بيحسب متوسط استهلاك الينزين قد ايه ودي حاجه ممتازه جداً لئنه دقيق وبالنسبه لي انا مؤشر بعتمد عليه لمعرفة صحه العربيه عموماً كويسه ولا في مشاكل .
6-بيحسب كمان متوسط السرعه اللي مشينا بيها فتره معينه .

ده معنى كمبيوتر الرحلات ........اتمنى اكون جاوبت حضرتك بإفاده ان شاء الله .

الف مبروك يا عمرو على الـ 7 الاف كيلو و ربنا يبارك لك فيها

شكرا جزيلا يأستاذ رامى ... جزاك الله كل خير

لا شكر على واجب يا جماعة ..اتمنى اكون مفيد للمنتدى

انا بس عايزكو تدعوا للعربية لحسن دي من ساعة ماجت و الدنيا ملطشة معاها خالص و الحمد لله
حكة فى رفرف ادام يمين و الحمد لله موصلتش للبوية
و خربوش على غطا التانك
و واحد معرفش سند ايه على الشنطة جرها
واوحد خبطنى من وره على كوبرى اكتوبر بس الحمد لله جت في الحته السوده في الاكصدام
و اخيرا واحد ربنا يكرموا زارع عمود حديد في الارض في مكان ملوش اي معنا و ياريته باين عده من تحت الاطصدام الى ورا و انا بركن و قطع منه حته من تحت خالص و الاسوء ان مكان ربط المسمار الي شايل الاكصدام من الجنب اتكسر و بقى جانب الاكصدام ناطر لبره

كل ده في حوالى 45 يوم ....الحمد لله ربنا عايز كده

الاستاذ الى بيسأل عن الباور ....مفيش حاجة قالت انه كهربا و انا من استخدامى ليه اعتقد انه هيدروليك عادي

شكرا علي التقييم وان شاء الله مستنيين تقييمك بعد ال 10000

الف مبروك و عقبال صيانه ال 70 الف
يا تري استهلاك البنزين بتاعها عامل ازاي بعد ال5000 كيلو
باعتبار انها 1600 يا تري بنزينها عالي ولا قليل؟؟

استهلاك البنزين قياسا على كمبيوتر السيارة من 7 لتر / 100 كم الى 7.7 لتر / 100كم يعني على حسب ظروف القيادة

جزاك الله خيرا

الف مبروك على الصيانة وشكرا ليك على التقيميين الجمال دول وربنا يباركلك فيها غن شاء الله وبخصوص الحاجات البسيطة اللي حصلت في العربية نقول قدر الله وما شاء فعل ونصيحة تتطلع حاجة لله
بس معلش ليا سؤال هو صوت الماتور قالولك في التوكيل ليه حل فعلا؟
وسؤال تاني معلش.. هو انت عندك هزة في عصا الفتيس؟

اقتباس:

---

المشاركة الأصلية كتبت بواسطة ash257

الف مبروك على الصيانة وشكرا ليك على التقيميين الجمال دول وربنا يباركلك فيها غن شاء الله وبخصوص الحاجات البسيطة اللي حصلت في العربية نقول قدر الله وما شاء فعل ونصيحة تتطلع حاجة لله
بس معلش ليا سؤال هو صوت الماتور قالولك في التوكيل ليه حل فعلا؟
وسؤال تاني معلش.. هو انت عندك هزة في عصا الفتيس؟

---

اشكرك
موضوع الصوت بصراحة محدش ادانى فيه عقاد نافع
و فعلا انا عندى هزة بسيطة فى عصاية الفتيس بتكون محسوسة اكتر لما بيكون التكيف شغال و هالعربية واقفة

عقبال تقيم ال 70000000 ان شاء الله

الف مبروك على ا لصيانة وعقبال ال 1000000 الف ومستنين تقيمات اكتر واكتر