الموضوع: كار كير فى قسم رينو لوجان

السلام عليكم جميعا وكل سنة وانتم طيبين بمناسبة شهر شعبان واقتراب شهر رمضان المعظم
الموضوع دة للناس اللى دماغها رايقة زى حلاتى كدة وبتحب تعتنى بالعربية بنفسها
بجانب طبعا الكار كير او الغسيل والكلام دة
كل واحد فينا بيكون عنده شنطة فيها الاسلحة الحربية اللى بيستخدمها فى العناية بالعربية فكل واحد يفتح الشنطة بتاعته
ويطلع منها المستحضرات اللى بيستخدمها حتى لو مستحضر واحد لعل وعسى حد يستفاد من مشاركته
يالا افتحو الشنطة وطلعوا الكراسات قصدى طلعوا العدة وانا حبدأ

......
(1)
SONAX
polish & wax color

دة طبعا البوليش الشهير 2 × 1 بوليش وشمع سوناكس بلون العربية وطريقة استخدامه بتكون سهلة وبسيطة
لكن بتحتاج مجهود جامد والنتيجة بتكون لمعة رائعة وملمس ناعم لدهان العربية
طريقة استخدامه بعد غسلة محترمة والعربية تتنشف كويس جدا بتجيب كيس قطن وترج علبة السونكس كويس
علشان مكوناته تختلط كويس
وتحط شوية سونكس على قطعة القطن وتدهن بيها العربية كل قطعة على حدة كبوت لوحده والرفرف لوحده
وكل ما تحس ان القطنة خلاص اتبلت تاخد قطعة تانية وهكذا
تدهن مثلا الكبوت كله بالسوناكس وتنتظر 10 دقائق لتتفاعل مكوناته مع الدهان
وتبدأ تدعك الكبوت فى حركة دائرية وسريعة باستخدام فوطة ميكروفيبر واهم حاجة السرعة واتفرج على احلى مراية
ملحوظة مهمة > اى نوع بوليش يتم استخدامه على دهان العربية لازم يكون الدهان بارد بعيد عن الشمس
او الحرارة وكمان التراب
ملحوظة اخرى > ان استخدام الصاروخ بيعطى نتيجة مع البوليش عن استخدام اليد لكن كتر الصاروخ بيكون مش مفيد خاصتا
لو بتستخدم البوليش باستمرار لان الصاروخ بيكون حامى على دهان العربية غير الدلع بتاع دعك اليد
.....................
(2)
carnauba wax

دة شمع وبيعمل طبقة على دهان العربية وبيحميها من التراب والعوامل الجوية ومهم جدا استخدام الشمع
للناس اللى بتسافر كتير على الطرق السريعة
لانه بيحمى دهان العربية من التراب اللى بيصطدم بدهان العربية مع السرعة دة غير الرمل المتطاير من العربيات النقل
وكل دة بيعمل زى صنفرة للدهان
والشمع بيحمى الدهان من الجزئية دى دة غير انه بيعطى للدهان نعومة بحيث التراب ما يلزقش على الدهان
طريقة استخدامه بتاخد قطع منه وتبدأ توزع على كل جزء فى العربية كلا على حدة كبوت لوحده وشنطة لوحدها وهكذا
وتبدأ تدعك بالفوطة الميكرو فيبر او بقطعة قطن كبيرة شوية وبعد كدة تدخل على القطعة اللى بعدها
ملحوظة > استخدام الصاروخ مع الشمع بيعطى نتيجة افضل بكتييير من استخدام راحة اليد
لانه مش زى البوليش مجرد سائل وبينشف لا دة بيكون عامل زى كريم بس تقيل شوية
وبالتالى بيحتاج جهد اعلى
.....................
(3)
carnauba paste wax

البوليش دة من اسوء بوليش على وجه الارض واستخدامه بيحتاج مجهود جبار لانه بينشف بسرعة وبيمسك فى الدهان بقوة
بس مع الصاروخ حكاية بيخلى العربية بروبروق
لكن انا عن نفسى بستخدمه استخدام اخر
بيصادف تنزل من البيت لا بيك ولا عليك تلاقى واحد ابن حلال سايبلك شوية بوية على الرفرف او المراية
وبعد الشر عنكم ويبعد عننا هذه المواقف
البوليش دة بيطلع من الشنطة فى الوقت دة وبدهن بيه مكان البوهية اللى طالعة فى العربية نتيجة احتكاك العربية التانية
واتركه 5 دقائق بيكون نشف وبقى ماسك بقوة فى لون االبوهية مكان الحكة و اجيب شوية تراب ناعم
ايون تراب ناعم بيكون موجود فى الارض وماتخافش التراب مش حيعمل حاجة لدهان العربية
علشان عليها بوليش بالاضافة انك بتاخد التراب الناعم اوى اللى عامل زى البودرة
مش رمل صغير لا بتاخد اللى عامل زى البودرة
وتبدأ تدعك بالفوطة فى المكان اللى عليه البوليش والرملة الناعمة جدا بشكل دائرى
وساعتها حتشكر الراجل اللى خبطك لان المكان ة حيطلع منه البوية بالاضافة انه حيبقى بروبرق
.....................
(4)
ABRO scratch remover

المنتج دة لعلاج الخدوش السطحية ... بيعتمد على انه بيسيح الدهان ويخلية يتمدد شوية على اطراف الخدش
طبعا مش مجدى مع الخدوش العميقة لكن بيقللها وبيحسن منظر العربية مكان الخدش بحيث الخدش ما يظهرش من على بعد
طريقة استخدامه بعد طبعا مكان الخدش ما يكون نضيف .. بيترج كويس و بيوضع جزء صغير منه على الخربوش باستخدام قطعة قماش نضيفة من القطن
و بتدعكه مع الحركة الدائرية وتفضل تدعك لحد ما تلاحظ ان الخدش قل بعد كدة بتمسح اى اثر للمنتج ( بعد كدة بتعمل بولش وواكس لمكان الخدش )
ملحوظة المنتج دة لا يستخدم او يلامس اى شيئ بلاستك او جلد او كاوتش فى العربية

.....................
(5)
armorall original protectant

يا عم عارف انك عارفه انا لاقيته فى الشنطة هههه
ملحوظة لو مش بتستخدمه كتير هات الزجاجة الصغيرة علشان لما بيقدم بيبقى عامل زى الزبادى خلاط
مش بيبقى سائل زى ما كان جديد
السفنجة اللى جنبه دى انا كنت اشترتها فى مرة من كارفور علشان تلميع التابلوه
بس للاسف ملمعتش بيها التابلوه ولا مرة علشان كل ما اشوفها اللمع بيها الجزمة هههههه
وكل مرة لما اجى اقفلها الاقى مرسوم عليها دركسيون اقول يا خوسارة بس بيلمع الجزمة حلو اوى بصراحة ههههه
.....................
(6)
ARMORALL
Foaming cleaner

دة فوم من شركة ارمور اول الشهيرة والفوم دة اكثر من رائع وهو متعدد الاستخدامات وممكن تستخدمه على اى جزء
من اجزاء العربية بمنتهى الامان
وبيستخدم لتنظيف الجلد والفبريكات والكاوتش وحوض الماتور والجنوط والطاسات والموكيت وكله كله كله
طريقة استخدامه بيترج كويس ويترش وتتركه شوية وتدعك بالميكرو فيبر وصباح النضافة والتعقيم

.....................

(7)
wd 40

طبعا غنى عن التعريف واستخدامه مع مفصلات الابواب والشنطة ولا يؤثر على الدهان مطلقا
لو عندك حاجة لازقة على الدهان ممكن تنظف بيه بدون اى مشكلة
ملحوظة لا يلامس اى شيئ بلاستيك او كاوتش .. ومحدش يرش بيه المراية او مفصلاتها الداخلية حتى لا تتلف المفصلات وتلاقى المراية مش راضية تقفل
ودة خطأ كنا بنعمله من فترة وواجب علينا تعديل اى خطأ كنا بنعمله فى السابق
.....................
(8)
trooper spray paint

زى ما انتو شايفين اسبراى سلفر للطاسات
طبعا الشغل كله فى الطاسات لازم تديها غسلة كويسة جدا وتستخدم مع الغسيل صنفرة دوكو
علشان تدعك بيها الطاسة وتساوى الحروف والخيوط اللى طالعة منها
بعد الغسل والتنظيف وبعد ماتساوى كل حاجة لازم ترش الطاسات فى مكان مافيهوش تراب
علشان مايعملش فقاقيع او اخرام تبوظ شكل الطاسة
المكان اللى ترشه ماترجعلهوش تانى علشان الاسبراى مايسيلش وتبقى مشكلة كبيرة لان الاسبراى
ممكن يدخل فى الحواف زى الدائرة اللى حولين علامة رينو
الفكرة دى تنفزها لو لاقيت الطاسة فعلا بقى شكلها وحش من اثار بلدنا الجميلة ومحتاجة تنضف شوية
علشان تكون النتيجة مرضية
وطبعـــا الافضل انك ترشها عند البوهيجى وتريحنا كلنا ههههههههه
.....................
على الهامش
Maxell lithium battery

دى صورة لحجر الريموت بالمرة ومقاس الحجر 20 16 .. والنوع دة كويس جدا اسمه ماكسيل صناعة يابانى ب 10 بوند
عايز اقلكوا ان من ساعت ما غيرت الحجر بفتح العربية من بعييييييييد غير الاول كنت لازم اقرب منها علشان تفتح ودة طبعا علشان كان حجر الفبريكة ضعف
.....................
كدة خلاص مافيش حاجة فى الشنطة غير ازازة ماية فاضية مش معقول حصورها دى كمان والا الادارة حتوقفنى
ومنتظر اقتراحتكم واى حد استخدم اى منتج سواء معطرات او عناية بالعربية من الداخل والخارج يشاركنا
لعل وعسى حد فينا يستفاد
ومحدش يجيب منتج بيستخدم فيه الدعك علشان انا تعبت من كتر الدعك فى الموضوع دة ههههههههه
وسلامى للجميع